ەندى قىتايعا ىرگەدەگى تاشكەنتكە بارعانداي ەمىن-ەركىن ساپارلاي الامىز. ەكى ەل اراسىنداعى ۆيزاسىز رەجىم قۇجاتى كۇشىنە ەندى. ەل ازاماتتارى تۋريستىك ماقساتتا شەكارادان ەركىن ءوتىپ, 30 كۇن بويى جۇرە الادى. بۇرىندا دا قايناپ جاتاتىن پانفيلوۆ اۋدانىنا قاراستى «نۇر جولى» وتكىزۋ بەكەتىنىڭ جۇمىسى ودان ءارى قىزايىن دەپ تۇر.
بۇل جوبا – تەك تۋريستىك ماقساتتا ەمەس, ەكى ەل اراسىنداعى ەكونوميكالىق ىقپالداستىقتى تەرەڭدەتۋگە مۇمكىندىك بەرەتىن باستى باعىتتىڭ ءبىرى. ناتيجەسىندە, جاڭا تۋريستىك جولدار اشىلماق. بۇگىندە ەلىمىزدىڭ 13 قالاسىنا «اشىق اسپان» رەجىمى ەنگىزىلىپ, 80 مەملەكەتتىڭ ازاماتىنا ۆيزاسىز كەلۋگە رۇقسات بەرىلىپ وتىر. قىتاي دا سول قاتارعا قوسىلدى.
«قازاقستان قىتاي تۋريستەرى ءۇشىن تارتىمدى باعىتتىڭ ءبىرى بولا الادى. وتىز كۇنگە دەيىن ۆيزاسىز ءجۇرۋ تۋرالى ۇكىمەتارالىق كەلىسىمگە قول قويىلدى. بۇل قادام ەلىمىزگە قىتايدان تۋريستەردىڭ كوپتەپ كەلۋىنە جول اشارى ءسوزسىز», دەگەن ەدى مەملەكەت باسشىسى.
دەگەنمەن ۆيزاسىز رەجىمنىڭ كۇشىنە ەنۋى شەكاراداعى باقىلاۋ بەكەتتەرى مەن اۋماقتاعى باسقا دا قىزمەتتەردىڭ جۇمىسىنا قوسىمشا سالماق تۇسىرگەلى تۇر. اسىرەسە كولىك قوزعالىس, جولاۋشىلار تاسىمالى, قوناقۇي مەن تاماقتانۋ ورىندارىنىڭ قىزمەتىنە قاتىستى دايىندىق جۇمىستارىن شيراتۋ كۇن تارتىبىندە. بۇل جۇمىس جەتىسۋ وبلىسىنىڭ پانفيلوۆ اۋدانىندا دا ءجۇرىپ جاتىر. اۋدان اۋماعىندا بىرنەشە شەكارالىق بەكەت بار. ونىڭ ىشىندە «نۇر جولى» وتكىزۋ بەكەتىنىڭ جۇمىسى قىزايىن دەپ تۇر. ەكى ەل ازاماتتارى نەگىزىنەن وسى بەكەت ارقىلى ءوتىپ, قاتىنايدى.
وسىعان وراي پانفيلوۆ اۋدانى اكىمدىگىنىڭ جانىنداعى كەزەكتەن تىس اۋداندىق جەدەل شتاب وتىرىسى ءوتتى. وتىرىستا قىتاي ەلىمەن ۆيزاسىز رەجىمنىڭ كۇشىنە ەنۋىنە بايلانىستى شەكارالىق اۋماقتا تۋىندايتىن ماسەلەلەر تالقىلاندى.
جيىنعا پروكۋراتۋرا, ۇلتتىق قاۋىپسىزدىك كوميتەتى, شەكارا, كەدەن قىزمەتى مەن قۇقىق قورعاۋ ورگاندارىنىڭ باسشىلارى, سونداي-اق وزگە دە مەكەمە باسشىلارى قاتىستى.
وتىرىستا اۋدان اكىمى مارات ساعىمبەك «نۇر جولى» وتكىزۋ بەكەتىندەگى جولاۋشىلاردى قابىلداۋ ءبولىمى ونداعى كورسەتىلەتىن قىزمەتتەر ءتۇرى مەن اۆتوبۋس تاسىمالى سىندى ماسەلەلەردى جەتكىزىپ, بىرقاتار مەكەمە باسشىسىنا كەمشىلىكتەردى جويۋ تۋرالى تاپسىرما بەردى.
«ۆيزاسىز رەجىم ەلىمىزدەگى ءتۋريزمدى دامىتۋعا سەرپىن بەرەدى. ءبىز تۋريستىك ايماق رەتىندە ساپالى قىزمەت كورسەتۋىمىز قاجەت. بۇل ءبىزدىڭ اۋدانىمىزدىڭ ەكونوميكاسى ءۇشىن ايتارلىقتاي پايدالى. بولاشاقتا ءتۇرلى قىزمەت كورسەتۋ ورنىن اشىپ, تۋريستىك باعىتتا جۇمىستار جۇرگىزبەكپىز. قازىردىڭ وزىندە وعان قاتىستى جوسپارلارىمىز بار. باستىسى – شەكارا ماڭىن تارتىپكە كەلتىرىپ, ءبارىن ءبىر جولعا قويىپ, زاڭدى تۇردە جۇمىس جۇرگىزۋ مىندەتى تۇر», دەيدى پانفيلوۆ اۋدانىنىڭ اكىمى م.ساعىمبەك.
وسى ماقسات شەڭبەرىندە قىتاي حالىق رەسپۋبليكاسىنىڭ شۇار حالىقارالىق ساۋدانى دامىتۋعا جاردەمدەسۋ كوميتەتى مەن جەتىسۋ وبلىسىنىڭ كاسىپكەرلەر پالاتاسى اراسىندا حالىقارالىق ىنتىماقتاستىق تۋرالى مەموراندۋمعا قول قويىلدى. بۇل ماڭىزدى ساياسي ءراسىم قحر شىڭجاڭ-ۇيعىر اۆتونوميالىق ولكەسىنىڭ ءۇرىمجى قالاسىندا وتكەن «قىتاي-ورتالىق ازيا» فورۋمى بارىسىندا جۇزەگە استى.
مەموراندۋمدى تابىستى ىسكە اسىرۋ قازاقستان مەن قىتاي اراسىنداعى ساۋدا-ەكونوميكالىق, عىلىمي-تەحنيكالىق بايلانىستاردى كەڭەيتۋگە مۇمكىندىك بەرەدى. وسىلايشا, ىسكەرلىك بايلانىستاردى دامىتۋ, ءوزارا ءتيىمدى ىنتىماقتاستىقتى كەڭەيتۋ, ينۆەستيتسيالار تارتۋ ءۇشىن قولايلى جاعدايلار جاسالادى.
«مەموراندۋم ەكى ەلدىڭ شاعىن جانە ورتا بيزنەس سۋبەكتىلەرى اراسىنداعى ىنتىماقتاستىقتى نىعايتۋعا سەپتىگىن تيگىزەدى, ساۋدا سالاسىندا سەرىكتەستەر ىزدەۋدىڭ جاڭا مۇمكىندىكتەرى اشىلادى», دەيدى وبلىستىق كاسىپكەرلەر پالاتاسىنىڭ توراعاسى داۋرەن وڭالباەۆ.
ءوز كەزەگىندە قىتاي حالىقارالىق ساۋدانى دامىتۋعا جاردەمدەسۋ كوميتەتى باسشىسىنىڭ ورىنباسارى چەن تسزيانان كوميتەت ۇكىمەتتىك دەڭگەيدە قازاقستان تاۋار وندىرۋشىلەرىنىڭ قىتاي جانە شەتەل نارىقتارىنا شىعۋ مۇمكىندىكتەرىنىڭ سپەكترىن كەڭەيتۋگە جاردەمدەسۋگە دايىن ەكەنىن اتاپ ءوتتى.
فورۋمعا قازاقستاننان عانا ەمەس, وزبەكستان, رەسەي, سونداي-اق تمد مەن الەمنىڭ باسقا ەلدەرىنەن وكىلدەر قاتىستى. حالىقارالىق ءىس-شاراعا قاتىسۋشىلار شىڭجاڭدا حالىقارالىق اربيتراج پلاتفورماسىن قۇرۋ ساۋدا داۋلارى بويىنشا ءتيىمدى شەشىمدەردى ىلگەرىلەتۋ ءۇشىن ماڭىزدى ەكەنىن اتاپ ءوتتى. ءىس-شارا سوڭىندا قىتاي حالىقارالىق ساۋدا جانە ەكونوميكالىق تورەلىك كوميسسياسىنىڭ ورتالىق ازيا فيليالى قۇرىلدى.
جەتىسۋ وبلىسى