قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى قىزمەتىنە نۇركەن ءاشىروۆ تاعايىندالدى. بۇگىن مادەنيەت جانە اقپارات ءمينيسترى ايدا بالاەۆا اتالعان قىزمەتكە تاعايىندالعان نۇركەن ءاشىروۆتى ونەر-ءبىلىم ورداسىنىڭ ۇجىمىنا تانىستىردى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
نۇركەن ءاشىروۆ قازاقستاننىڭ ەڭبەك سىڭىرگەن قايراتكەرى, مەملەكەتتىك ستيپەنديا يەگەرى. 2004-2010 جىلدارى ن.تىلەنديەۆ اتىنداعى «وتىرار سازى» فولكلورلىق-ەتنوگرافيالىق وركەسترىنىڭ باس كونتسەرتمەيستەرى جانە ءسوليسى قىزمەتىن اتقارعان. 2018-2019 جىلدار ارالىعىندا قۇرمانعازى اتىنداعى قۇك حالىق مۋزىكاسى فاكۋلتەتىنىڭ دەكانى بولىپ قىزمەت ەتتى. 2019 جىلدان باستاپ وسى كۇنگە دەيىن احمەت جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ ديرەكتورى قىزمەتىن اتقاردى. ايدا بالاەۆا قازاق ۇلتتىق كونسەرۆاتورياسىنىڭ جاڭا باسشىسىن قۇتتىقتاپ, قىزمەتىن ابىرويمەن اتقارارىنا زور سەنىم ءبىلدىرىپ, جۇمىسىنا ساتتىلىك تىلەدى.