قۋاندىق ءۋاليحان ۇلى بيشىمباەۆ 1980 جىلى تۋعان. قازاق مەملەكەتتىك باسقارۋ اكادەمياسىن, م.دۋلاتي اتىنداعى تاراز مەملەكەتتىك ۋنيۆەرسيتەتىن, «بولاشاق» باعدارلاماسىمەن اقش-تىڭ دج.ۆاشينگتون اتىنداعى ۋنيۆەرسيتەتىندە وقىپ, ماگيستر دارەجەسىن العان.
ونىڭ مانساپ جولى «قازاقستان دامۋ بانكى» اق-نىڭ باس مەنەدجەرى قىزمەتىنەن باستالادى. ەكونوميكا جانە بيۋدجەتتىك جوسپارلاۋ ءمينيسترىنىڭ جانە پرەمەر-ءمينيستردىڭ كەڭەسشىسى, يندۋستريا جانە ساۋدا ءمينيسترىنىڭ ورىنباسارى, پرەزيدەنتتىڭ كومەكشىسى بولدى. 2010-2011 جىلدارى ەكونوميكالىق دامۋ جانە ساۋدا ءمينيسترىنىڭ ورىنباسارى, 2011-2013 جىلدار ارالىعىندا «سامۇرىق-قازىنا» اق باسقارماسى توراعاسىنىڭ ورىنباسارى قىزمەتىن اتقاردى. 2013 جىلى 33 جاسىندا «بايتەرەك» ۇلتتىق باسقارۋ حولدينگى اق باسقارماسىنىڭ توراعاسى لاۋازىمىنا تاعايىندالدى. 2016 جىلدىڭ مامىر ايىندا ۇلتتىق ەكونوميكا ءمينيسترى قىزمەتىنە كىرىسىپ, سول جىلدىڭ جەلتوقسان ايىنا دەيىن اتقاردى. 2017 جىلدىڭ 10 قاڭتارىندا قاماۋعا الىنىپ, قىلمىستىق كودەكستىڭ 28-بابىنىڭ 3-ءبولىمى («قىلمىستىق قۇقىق بۇزۋشىلىق جاساۋدى ۇيىمداستىرعان نەمەسە ونىڭ ورىندالۋىنا باسشىلىق ەتۋ, سول سياقتى قىلمىستىق توپتى قۇرۋ نە وعان باسشىلىق ەتۋ»), 189-بابى 4-ءبولىمىنىڭ 2-تارماعى («توپ بولىپ نەمەسە استىرتىن ءسوز بايلاسىپ, سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋدى ۇيىمداستىرۋ») بويىنشا ايىپتى دەپ تانىلدى.
2018 جىلدىڭ ناۋرىز ايىنا دەيىن سوزىلعان سوتتا پروكۋرور 12 جىل جازا كەسۋدى سۇراعانىمەن, سۋديا 10 جىلعا سوتتاپ, ءومىر بويى مەملەكەتتىك ورىنداردا باسشىلىق قىزمەت اتقارۋ قۇقىعىنان ايىرىپ, قىلمىستىق جولمەن جيعان مۇلكىن تاركىلەۋگە ۇكىم وقىدى. سوتتىڭ ۇكىمىمەن 37 جاسىندا 10 جىل جازا ارقالاپ, قاتاڭ رەجىمدەگى كولونيادا جازاسىن وتەۋى ءتيىس ەدى. الايدا 2017 جىلدىڭ 10 قاڭتارىنان باستاپ جازاسى ەسەپتەلگەن ق.بيشىمباەۆ 2019 جىلدىڭ كۇزىندە شىمكەنت قالاسىنداعى تۇرمەدەن بوستاندىققا شىقتى. بۇرىنعى ۇلتتىق ەكونوميكا ءمينيسترى پرەزيدەنتتىڭ جارلىعىمەن راقىمشىلىققا ءىلىنىپ, جازاسىن وتەۋ مەرزىمى 10 جىلدان 4 جىلعا قىسقاردى. وسىلايشا ول جازاسىنىڭ ۇشتەن ەكى بولىگىن وتەگەندە تۇزەۋ مەكەمەسىنىڭ باسشىلىعى وڭ مىنەزدەمە جازىپ بەردى. سۋديا قىلمىستىق پروتسەسسۋالدىق كودەكستىڭ 476, 480 جانە 483 باپتارىن نەگىزگە الىپ, قۋاندىق بيشىمباەۆتىڭ 4 جىلدىق جازا مەرزىمىنىڭ تۇگەسىلۋىنە 1 جىل 3 اي, 13 كۇن قالعاندا بوستاندىققا شىعارۋ جونىندە قاۋلى قابىلدادى.
2019 جىلدىڭ 11 قازانىندا تۇرمەدەن بوساپ شىققان ەكس-مينيستر ارادا 4 جىل 1 اي وتكەندە ايەلىن ءولتىردى دەگەن كۇدىكپەن ۇستالىپ وتىر. بۇل تۋرالى كەشە حابارلاعان ەدىك.