بۇگىن پرەزيدەنت اكىمشىلىگىنىڭ كەلىسىمى بويىنشا, قالا اكىمىنىڭ وكىمىمەن سارسەن اباي ۇلى قۇرانبەك شىمكەنت قالاسى اكىمىنىڭ ورىنباسارى لاۋازىمىنا تاعايىندالدى, دەپ حابارلايدى Egemen.kz شىمكەنت قالاسى اكىمىنىڭ ءباسپاسوز قىزمەتىنە سىلتەمە جاساپ.
سارسەن اباي ۇلى 1976 جىلى الماتى وبلىسى, كەربۇلاق اۋدانى, قىزىلجار اۋىلىندا تۋعان.
ءال-فارابي اتىنداعى قازاق ۇلتتىق ۋنيۆەرسيتەتىن, قازاقتىڭ سپورت جانە تۋريزم اكادەمياسىن جانە قازتۇتىنۋوداعى قاراعاندى ەكونوميكالىق ۋنيۆەرسيتەتىن فيلوسوفيا ءپانىنىڭ, دەنە شىنىقتىرۋ مادەنيەتىنىڭ وقىتۋشىسى, كاراتە جاتتىقتىرۋشىسى, قۇقىقتانۋ ماماندىقتارى بويىنشا بىتىرگەن.
ەڭبەك جولىن 1995 جىلى الماتى قالاسىنداعى «№ 4 وليمپيادالىق رەزەرۆتەگى مامانداندىرىلعان بالالار-جاسوسپىرىمدەر مەكتەبى» مەملەكەتتىك كوممۋنالدىق قازىنالىق كاسىپورنىنىڭ جاتتىقتىرۋشى-وقىتۋشىسى بولىپ باستاعان.
2003–2023 جىلدار ارالىعىندا جەكە سەكتوردا جانە ورتالىق مەملەكەتتىك ورگانداردا جاۋاپتى باسشىلىق قىزمەتتەر اتقارعان.
2023 جىلدىڭ اقپان ايىنان باستاپ بۇگىنگە دەيىن مادەنيەت جانە سپورت ۆيتسە-ءمينيسترى لاۋازىمىن اتقاردى.