تۇركى اقپارات اگەنتتىكتەرىنىڭ اليانسى (Alliance of Turkic News Agencies-ATNA) قۇرىلدى. ونىڭ قۇرامىنا QAZCONTENT اق (قازاقستان), Anadolu Ajansı (تۇركيا), AZERTAC (ازەربايجان), KABAR (قىرعىزستان), UZA (وزبەكستان) حالىقارالىق اقپارات اگەنتتىكتەرى كىردى. ىستانبۇلداعى ءتيىستى دەكلاراتسياعا وسى مەديا كومپانيالاردىڭ باسشىلارى قول قويدى.
بۇعان دەيىن استانادا تۇركى مەملەكەتتەرىنىڭ 10-ءسامميتى بارىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ تاريحى مەن مادەنيەتى ورتاق, ءتىلى مەن ءدىلى ورتاق تۇركى ەلدەرىنىڭ بىرلىگىن دارىپتەۋدىڭ ماڭىزى وتە زور ەكەنىن اتاپ وتكەن بولاتىن. ATNA قۇرۋ تۋرالى دەكلاراتسياعا 6 قاراشادا Anadolu Ajansı ۇيىمداستىرعان «باق-تاعى بىرلىك جانە بولاشاققا دەگەن كوزقاراس» اتتى تۇركى مەملەكەتتەرىنىڭ اقپاراتتىق اگەنتتىكتەرىنىڭ مەديا-ءسامميتى اياسىندا قول قويىلىپ وتىر.
«ايتا كەتۋ كەرەك, تۇركى ەلدەرى اراسىندا باق سالاسىنداعى بايلانىس جىل سايىن نىعايىپ كەلەدى. تەلەارنالار اراسىندا ىنتىماقتاستىق ورناپ, ءوزارا كونتەنت الماسۋ باستالدى. اتاپ ايتقاندا, بىرلەسكەن تەلەجوبالار مەن سەريالداردىڭ جارىق كورۋى وسىنىڭ ايعاعى. اقپارات اگەنتتىكتەر اراسىندا بايلانىس تاپشىلىعى جوق. دەگەنمەن قازىر جاڭا مەديا ءداۋىرى. دەمەك, ءبىز ينتەرنەت-جۋرناليستيكا سالاسىنداعى ىنتىماقتاستىقتى ارقاشان جاڭا دەڭگەيگە كوتەرۋىمىز كەرەك», دەدى «Qazcontent» اق باسقارما توراعاسى بەكزات ءجۇسىپ.
سونداي-اق ول تۇركى ەلدەرى اراسىنداعى قارىم-قاتىناستى نىعايتۋ جانە جالعان اقپاراتقا قارسى كۇرەس جونىندە بىرقاتار ۇسىنىستار ەنگىزدى.
بۇگىنگى كۇنى «Qazcontent» اق تۇركى مەملەكەتتەرى اراسىنداعى اقپاراتتىق بايلانىستاردى نىعايتۋ جانە ولاردىڭ مادەني-تاريحي مۇرالارىن ناسيحاتتاۋ بويىنشا جۇمىس جۇرگىزىپ كەلەدى. تۇركى مەملەكەتتەرىنىڭ اقپارات اگەنتتىكتەرىنىڭ مەديا-ءسامميتى وسى بايلانىستاردى نىعايتۋعا ىقپال ەتە وتىرىپ, تۇركى ەلدەرىنىڭ باق اراسىندا ديالوگ پەن تاجىريبە الماسۋ ءۇشىن ايرىقشا الاڭ ۇسىندى.
ء«بىزدىڭ ماقساتىمىز - تۇركى اقپارات اگەنتتىكتەرىنىڭ ورتاق ءتىلى, جۇمىسى مەن كوزقاراسىن بىرىكتىرەتىن جەتەكشى قاۋىمداستىق قۇرۋ», دەدى «Anadolu Ajansı» باسقارما توراعاسى سەردار قاراعەز.