اتىراۋ وبلىسىنىڭ يساتاي جانە قىزىلقوعا اۋداندارىندا قاناتقاقتى رەجىمدە سايلاۋ ءوتتى. ەكى اۋداننىڭ 34 سايلاۋ ۋچاسكەسىندە تىركەلگەن ەلەكتوراتتىڭ 56 پايىزى داۋىس بەردى. قىزىلقوعا اۋدانى بارىنشا بەلسەندىلىك تانىتتى. سايلاۋعا 57,2 پايىز حالىق قاتىستى.
اتىراۋ وبلىسىندا ۆاحتالىق رەجىمدەگى ءوندىرىس ورىندارىندا جۇمىس ىستەيتىن ادامدار بار. سايلاۋ كەزىندە ولاردىڭ داۋىس بەرۋىنە جان-جاقتى جاعداي جاسالدى. ءسويتىپ, يساتاي اۋدانىندا – 480, قىزىلقوعا اۋدانىندا 66 ۆاحتالىق ادىسپەن ەڭبەك ەتەتىن ەلەكتورات ساياسي باسەكەگە ءوز ۇلەستەرىن قوستى. سونىمەن قاتار مۇمكىندىگى شەكتەۋلى جانداردىڭ دا جاعدايى ەسكەرىلدى. ولارعا ارنايى كابينالار, برايل قارپىندەگى بيۋللەتەندەر, اۋديوجازبالار, سۋردواۋدارماشىلار, ۇلعايتقىشتار, ارنايى كومپيۋتەرلەر قويىلدى. سونداي-اق قاريالار, مۇمكىندىگى شەكتەۋلى جانداردىڭ وتىنىشىمەن ءۇي-جايدان تىس داۋىس جيناۋ جۇرگىزىلدى.
وڭىرلەردىڭ سايلاۋ ۋچاسكەسىندە 269 بايقاۋشى داۋىس بەرۋ بارىسىن بايقاپ وتىردى. ولار سايلاۋ ۇدەرىسىنىڭ اشىق, زاڭعا سايكەس ءوتۋىن قاداعالادى. يساتايدا – 127, قىزىلقوعا اۋدانىندا 142 بايقاۋشى بولدى. جالپى العاندا, ورتا ەسەپپەن ءاربىر ۋچاسكەگە 8 بايقاۋشىدان قاتىستى.
سايلاۋ زاڭ تالاپتارىنا سايكەس ءوتتى. زاڭ بۇزۋشىلىق تىركەلگەن جوق. ارىز-شاعىم تۇسپەدى. داۋىس بەرۋ ناتيجەسىنە سايكەس يساتاي اۋدانى اكىمى بولىپ نۇرىم مۋسين ەسىمدى ازامات سايلاندى. ول يساتاي اۋداندىق ءماسليحاتىنىڭ توراعاسى قىزمەتىن اتقارعان. ال قىزىلقوعا اۋدانىنىڭ اكىمى لاۋازىمى حالىقتىڭ تاڭداۋى قانات قادىرجان ۇلىنا ءتۇستى.
جالپى, بۇل دودانىڭ ماڭىزى زور. بىرىنشىدەن, وڭىرلەردىڭ ورتالىقسىزداندىرۋ ماسەلەسىنە قاتىستى. تۇرعىنداردىڭ وزدەرىنە تاڭداۋ جاساۋىنا ۇلكەن مۇمكىندىك تۋدى. ەكىنشىدەن, پرەزيدەنتتىڭ رەفورماسىنا سايكەس بۇل جەرگىلىكتى جەردەگى سايلاۋ جۇيەسىنە تىڭ سەرپىن بەردى. حالىق ءوزى سەنگەن ادامدى تاڭدادى.
ازامات ايماناكۋموۆ,
اتىراۋ وبلىستىق اۋماقتىق سايلاۋ كوميسسياسىنىڭ توراعاسى