ءتۇبى, توپىراعى, كوشى ءبىر الىس جانە جاقىن شەتەلدەردە تۇراتىن تۇركىتىلدەس جۇرتپەن قاتىناستىڭ ماڭىزى جوعارى. ويتكەنى ورتاق مۇددەلەرىمىز كوپ.
ەگەر حالىقارالىق, ايماقتىق مادەني-رۋحاني ءھام ەكونوميكالىق-الەۋمەتتىك ينتەگراتسياعا سالساق, بۇدان ۇتارىمىز دا مول. تۇركى كەڭەسىن قۇرۋ باستاماسىن كوتەرگەلى باقانداي ون جىل ءوتتى. بۇل – قۇر ءسوز ەمەس, ناعىز سىرتقى ساياساتتاعى ۇندەستىك ينتەگراتسياسى. بۇل ۇيىمنىڭ كەلەشەگى – يدەياسىندا.
كەشەگى جيىندا پرەزيدەنت قاسىم-جومارت توقاەۆ «TURKTIME!», ياعني «تۇركى ءداۋىرى!» دەگەن ۇراندى تاستاپ, سول ۇراننىڭ اينالاسىندا قانداي قۇندىلىقتاردىڭ جاتقانىن بايانداپ بەردى. سوندىقتان بۇل ۇيىمعا مۇشە ەلدەردىڭ ارقايسىسىنىڭ ارتقان ءۇمىتى زور. تۇركى مەملەكەتتەرى ۇيىمىنىڭ ينتەگراتسيالىق ساياساتىندا تۇركىلىك, اتاجۇرت پەن ورتاق شاڭىراق يدەياسى جاتىر. ال بۇل – ءوز كەزەگىندە شانحاي ىنتىماقتاستىق ۇيىمى, ەۋرازيالىق ەكونوميكالىق وداق سەكىلدى باسقا دا ۇيىمداردىڭ ۇستانىمدارىنان اناعۇرلىم ەرەكشە, قۇندى. وسى تۇرعىدان العاندا, ۇيىمنىڭ قاتىناسى مىعىم بولماق.
تۇركى مەملەكەتتەرى ۇيىمىنىڭ اتقارعان ءىس-شارالارىنا كەلسەك, اپاتتى ارال سۋ باسسەينىنە كوكتەمگە دەيىن مول مولشەردە سۋ كولەمىن جىبەرۋ ماسەلەسى شەشىمىن تاپتى. ەكونوميكالىق دالىزدەردىڭ وڭتايلى ءارى جەدەل قولعا الىنۋى جولعا قويىلدى. اسىرەسە ترانسكاسپي تورابىمەن ەنەرگەتيكالىق كوزدەردى, تاۋارلار تاسىمالداۋدىڭ گەوساياسي احۋالدارعا بايلانىستى ورنىقتى باعىتى انىقتالدى. ءوزارا تاۋار اينالىمىندا ينۆەستيتسيالىق ورتاق باعدارلامالار, جوبالار ەكىجاقتى كەلىسىمدەرگە كوشتى.
ساياسي شەشىمدەر بەيرەسمي كۇن تارتىپتەرىندە, اسىرەسە گەوساياسي باعىتتا, پلانەتارلىق دەڭگەيدەگى تاقىرىپتاردا اراگىدىك كوتەرىلىپ ءجۇر. اسكەري شەشىمدەر دە قابىلدانىپ جاتىر. مۇنى تۇركيانىڭ جاڭا اسكەري يننوۆاتسيالىق قۇرىلعىلارى – «Bayraktar»-ىن جىبەرۋدەن دە كورۋگە بولادى. بۇل شەشىمدى ورتاق شەكارالاردىڭ تۇتاستىعىن ساقتاۋ مەن قورعانىس كۇشتەرىن ارتتىرۋ ماقساتىندا جاسالعان قادام دەپ قابىلداۋىمىز كەرەك. ۇيىمعا مۇشە ەلدەر الەمنىڭ ساياسي وزگەرىستەرگە پىكىر بىلدىرۋگە قۇقىلى ەكەنىن دالەلدەپ كەلەدى. بۇل دا – جاريالىلىق پەن دەموكراتيالىق قاعيدالاردىڭ تۇركى مەملەكەتتەرى ۇيىمى شەڭبەرىندە جۇزەگە اسىرىلىپ جاتقاندىعىنىڭ ءبىر كورىنىسى.
ءبىر سوزبەن ايتقاندا, تۇركى الەمىنە جار سالعان «تۇركى ءداۋىرى!» دەگەن قۇندىلىعى زور ۇراننىڭ باستاماسى تەك ەگەمەندىگى بار تۇركى ەلدەرىنە عانا ەمەس, تۇركىلىك ۇلتتىق كودىن ساقتاپ وتىرعان وزگە دە تۇركىتىلدەس حالىقتار مەن ەلدەرگە دە تاۋەلسىزدىكتەن ءۇمىت ۇزبەي, ورتاق شاڭىراق استىنا جينال دەگەن مەسسەدجدى بىلدىرگەندەي بولدى.
ماقسات جاقاۋ,
ساياساتتانۋشى