گۋربانگۋلى بەردىمۇحامەدوۆ تۇركى مەملەكەتتەرى ۇيىمىنىڭ مەرەيتويلىق سامميتىنە قاتىسۋعا شاقىرعانى ءۇشىن قاسىم-جومارت توقاەۆقا العىس ايتىپ, ەكى ەلدىڭ ىنتىماقتاستىعىن جوعارى باعالادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
– ءبىز وسى جىلدار ىشىندە سىرتقى ساياسات, ساۋدا-ەكونوميكالىق جانە مادەني-گۋمانيتارلىق بايلانىستارىمىز بويىنشا قۇقىقتىق بازا قالىپتاستىردىق. سىرتقى ساياسي ماسەلەدە سىزگە العىسىمىز شەكسىز. ءسىز ءبىزدىڭ بەيتاراپ ۇستانىمىمىزدى ءاردايىم قولداپ كەلەسىز. بۇدان بولەك بىرىككەن ۇلتتار ۇيىمى قۇرىلىمىندا باسشىلىق قىزمەت ىستەي ءجۇرىپ, ءبىزدىڭ سىرتقى ساياسي باعدارىمىز ءۇشىن كوپ جۇمىس اتقاردىڭىز. سول ءۇشىن سىزگە العىسىمىز شەكسىز, – دەدى تۇرىكمەنستان حالك ماسلاحاتىنىڭ توراعاسى.
تاراپتار ءوزارا ساۋدا-ساتتىقتا وڭ ديناميكا بار ەكەنىن اتاپ ءوتىپ, ەنەرگەتيكا, ونەركاسىپ, كولىك, لوگيستيكا جانە باسقا دا سالالارداعى جوبالاردىڭ جۇزەگە اسىرىلۋ بارىسىن تالقىلادى.
سونىمەن قاتار كەزدەسۋ بارىسىندا قاسىم-جومارت توقاەۆ پەن گۋربانگۋلى بەردىمۇحامەدوۆ مادەني-گۋمانيتارلىق بايلانىستاردى ودان ءارى نىعايتۋعا دايىن ەكەنىن راستادى.