پرەمەر-مينيستر ءاليحان سمايىلوۆ پارلامەنت ماجىلىسىندە وتكەن بريفينگ بارىسىندا مەملەكەتتىك بيۋدجەت كىرىستەرىن ارتتىرۋ باعىتىنداعى جوسپارلانعان شارالار تۋرالى ايتتى.
ءاليحان سمايىلوۆ اتاپ وتكەندەي, ۇكىمەت الدىندا ۇلتتىق قوردان بولىنەتىن ترانسفەرتتەردىڭ مولشەرىن ازايتۋ جانە ونى كەلەشەك ۇرپاققا ساقتاۋ مىندەتى تۇر.
«سوندىقتان مەملەكەتتىك بيۋدجەتتىڭ كىرىسىن كوبەيتۋ قاجەت. بىرىنشىدەن, بۇل ماقساتتا كەدەندىك جانە سالىقتىق اكىمشىلەندىرۋدى تسيفرلاندىرۋ شارالارى قابىلدانۋدا. ەكىنشىدەن, ءبىز كولەڭكەلى ەكونوميكا دەڭگەيىن تومەندەتۋ بويىنشا جۇمىس ىستەپ جاتىرمىز», دەدى پرەمەر-مينيستر.
ونىڭ ايتۋىنشا, تاعى ءبىر باعىت – سالىق مولشەرىن, اتاپ ايتقاندا, جتس جانە ققس ارتتىرۋ.
«قوسىلعان قۇن سالىعىنا كەلەتىن بولساق, ول بىرىنشىدەن يمپورتتالعان تاۋارلاردىڭ باسەكەگە قابىلەتتىلىگىن تومەندەتەدى. ال وتاندىق تاۋارلارعا كەلەتىن بولساق, ءبىزدىڭ شارۋالار قوسىلعان قۇن سالىعىن تولەمەيدى. بۇل ورايدا اۋىل شارۋاشىلىعى ونىمدەرىن وڭدەيتىن كومپانيالار 70% مولشەردە جەڭىلدىك الادى. بۇل جەڭىلدىكتەر ساقتالادى. ميكرو جانە شاعىن بيزنەس قوسىلعان قۇن سالىعىن تولەۋشىلەر قاتارىنا كىرمەيدى», دەدى ءا.سمايىلوۆ.
سوندىقتان وتاندىق نەگىزگى ازىق-ت ۇلىك تاۋارلارىن وندىرۋشىلەرگە بۇل ەشقانداي كەرى اسەر ەتپەيدى. سونىمەن قاتار اتالعان شارا رەسپۋبليكالىق بيۋدجەت كىرىستەرىن شامامەن 2 ترلن تەڭگەگە ارتتىرۋعا مۇمكىندىك بەرەدى.
«وندا ءبىز, ارينە, ۇلتتىق قوردان تارتىلاتىن ترانسفەرتتى وسى كولەمدە ازايتامىز», دەپ تۇيىندەدى ءسوزىن پرەمەر-مينيستر.