قر ەڭبەك جانە حالىقتى الەۋمەتتىك قورعاۋ مينيسترلىگى مەن مەملەكەتتىك الەۋمەتتىك ساقتاندىرۋ قورى كوستەنكو اتىنداعى شاحتادا ورىن العان اپات سالدارىنان قازا تاپقان 17 كەنشىنىڭ بالالارىنا جاردەماقى مەن تولەمدەر تاعايىندادى, دەپ حابارلايدى Egemen.kz.
قايتىس بولعان 46 كەنشىنىڭ 21-ءىنىڭ قامقورلىعىنداعىلارعا رەسپۋبليكالىق بيۋدجەت قاراجاتى ەسەبىنەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى تولەنەدى.
«وسى جاردەماقىنىڭ مولشەرى قايتىس بولعان ادامنىڭ اسىراۋىنداعى ادامداردىڭ سانىنا قاراي ايقىندالادى جانە ولاردىڭ اي سايىنعى مولشەرى 37 322 تەڭگەدەن (1 بالاعا) 111 560 تەڭگەگە دەيىن (5 بالاعا) بولادى. جاردەماقىنىڭ بۇل ءتۇرى 8 جاسقا دەيىنگى بالا كۇتىمىن جۇزەگە اسىراتىن جۇمىس ىستەمەيتىن انالارعا دا تاعايىندالدى», دەپ حابارلادى مينيسترلىك.
سونداي-اق مەملەكەتتىك الەۋمەتتىك ساقتاندىرۋ قورىنىڭ قاراجاتى ەسەبىنەن اسىراۋشىسىنان ايىرىلۋ جاعدايى بويىنشا الەۋمەتتىك تولەم بەرىلەدى.
«بۇل تولەمنىڭ مولشەرى قايتىس بولعان ادامنىڭ تابىسى مەن ونىڭ الەۋمەتتىك ساقتاندىرۋ جۇيەسىنە قاتىسۋ ءوتىلى نەگىزىندە انىقتالادى. تولەمدەر مولشەرى ايىنا 56 مىڭ تەڭگەدەن 272 مىڭ تەڭگەگە دەيىنگى ارالىقتى قۇرايدى. قولدانىستاعى زاڭناماعا سايكەس اسىراۋشىسىنان ايىرىلۋ جاعدايى بويىنشا تولەمدەر بالالار 18 جاسقا تولعانعا دەيىن, ال جوعارى وقۋ ورىندارىندا كۇندىزگى بولىمدە وقىعان جاعدايدا 23 جاسقا دەيىن تولەنەتىنىن ەستەرىڭىزگە سالامىز», دەلىنگەن حابارلامادا.
ايتا كەتۋ كەرەك, جاردەماقىلار مەن الەۋمەتتىك تولەمدەر قايتىس بولۋ تۋرالى كۋالىك نەگىزىندە تاعايىندالادى. بۇل باعىتتاعى جۇمىس جالعاسىپ جاتىر جانە قر ەڭبەك جانە حالىقتى الەۋمەتتىك قورعاۋ مينيسترلىگىنىڭ, ماسق جانە «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باقىلاۋىندا بولادى.