سەناتتا ينكليۋزيا جونىندەگى كەڭەستىڭ وتىرىسى ءوتتى. وتىرىسقا قاتىسۋشىلار كەزدەسۋ بارىسىندا توراعانى تاڭداپ, الداعى جۇمىس جوسپارىن تالقىعا سالدى.
ينكليۋزيا جونىندەگى كەڭەس سەنات جانىنان قۇرىلعان بولاتىن. بۇل تۋرالى پالاتا توراعاسى ماۋلەن اشىمباەۆ وسى جىلدىڭ قىركۇيەك ايىندا وتكەن «مۇگەدەكتىگى بار ادامداردىڭ وزەكتى ماسەلەلەرى جانە ولاردى شەشۋ جولدارى» تاقىرىبىنا ارنالعان دوڭگەلەك ۇستەل وتىرىسىندا ايتقان بولاتىن. كەڭەس مۇشەلەرى مۇگەدەك ادامداردىڭ ءومىرىن جاقسارتۋعا باعىتتالعان ۇسىنىستار مەن ولاردى ىسكە اسىرۋ جولدارىن ازىرلەۋگە ءتيىس.
وتىرىس بارىسىندا قاتىسۋشىلار كەڭەس توراعاسى رەتىندە سەناتور ءلاززات قالتاەۆانى تاڭدادى. دەپۋتات ارىپتەستەرىنە العىسىن ءبىلدىرىپ, كەڭەس جۇمىسىنىڭ نەگىزگى باعىتتارىن اتاپ ءوتتى.
«قازاقستان پرەزيدەنتى قاسىم-جومارت توقاەۆ مۇگەدەكتىگى بار ادامداردىڭ ماسەلەلەرىن شەشۋگە ەرەكشە نازار اۋدارىپ كەلەدى. بۇل ولاردىڭ ءومىر ءسۇرۋ دەڭگەيىن ارتتىرۋعا مۇمكىندىك بەرەتىن زاڭنامالىق جانە ينستيتۋتسيونالدىق بازانى جەتىلدىرۋگە دە قاتىستى. پارلامەنت سەناتىندا پالاتا توراعاسى ماۋلەن اشىمباەۆتىڭ قولداۋىمەن وسى سالا بويىنشا جۇيەلى تۇردە جۇمىستار جۇزەگە اسىپ وتىر. كەڭەس مەملەكەتتىك ورگانداردىڭ, جەرگىلىكتى ءوزىن ءوزى باسقارۋ ورگاندارىنىڭ, قوعامدىق بىرلەستىكتەردىڭ, عىلىمي جانە باسقا دا ۇيىمداردىڭ ىنتىماقتاستىعىنا ارنالعان الاڭ بولىپ تابىلادى, ولاردىڭ ماقساتى – مۇگەدەك ادامداردىڭ قۇقىقتارىن قورعاۋ, ولار ءۇشىن تەڭ مۇمكىندىكتەر جاساۋ جانە ءومىردىڭ بارلىق سالاسىنا قاتىسۋعا قول جەتكىزۋدى قامتاماسىز ەتۋ», دەپ اتاپ ءوتتى ءلاززات قالتاەۆا.
كەزدەسۋگە سونداي-اق ەڭبەك جانە حالىقتى الەۋمەتتىك قورعاۋ, وقۋ-اعارتۋ, مادەنيەت جانە اقپارات مينيسترلەرىنىڭ ورىنباسارلارى, سونداي-اق ساراپشىلار مەن مۇددەلى قوعامدىق بىرلەستىكتەردىڭ وكىلدەرى قاتىستى.