سولتۇستىك قازاقستان وبلىسىنىڭ اققايىڭ اۋدانىندا تۇراتىن 28 جاستاعى پارساحان الدياروۆ پويىزدىڭ ەكى ۆاگونىن سۇيرەپ, جۇرتتى ەرەكشە كۇشىمەن ءتانتى ەتتى, دەپ حابارلايدى Egemen.kz «حابار 24» ارناسىنا سىلتەمە جاساپ.
الىپ كۇش يەسى اتا جۇرتىن اڭساپ كەلگەن جانداردىڭ ءبىرى ەكەن. ول 2000 جىلدارى وزبەكستاننان سولتۇستىك قازاقستان وبلىسىنا قونىس اۋدارعان. جاس كەزىنەن اۋىر زاتتى ۇرشىقشا يىرەدى. سالماعى 23 توننادان اساتىن ۆاگوندى ەش دايىندىقسىز 60 مەترگە دەيىن سۇيرەپ تاستادى.
دەسە دە پارساحان اۋىر اتلەتيكاعا ەشقاشان قىزىقپاعانىن العا تارتتى. الايدا قارا كۇش يەسى بۇل كورسەتكىشپەن توقتامايتىنىن جاسىرمادى.
سىرت كوزگە قاراعاندا, ول ءبىر الىپ كۇش يەسى ەمەس سياقتى كورىنەدى. بىراق جالپى سالماعى 40 توننادان اساتىن 2 بىردەي ۆاگوندى وپ-وڭاي سۇيرەگەن. پارساحان مۇنداي كورسەتكىشتى باعىندىرۋ ءۇشىن ارنايى دايىندىقتان دا وتپەگەن.
ايتا كەتسەك, پارساحان الدياروۆ اۋدانداعى ورت ءسوندىرۋ ءبولىمىنىڭ جۇرگىزۋشىسى بولىپ قىزمەت ەتەدى.
«بۇل جەردە قارا كۇشتەن گورى ەپتىلىك قاجەت. قۇتقارۋشىلار كۇنىنە وراي چەللەندج ۇيىمداستىرىلدى. مەنىڭ باستىعىم ۆاگون تارتىپ كورەيىك دەپ ايتتى. مەن وسىندا جۇمىس ىستەگەم. بۇعان دەيىن 2-3 ادام بولىپ ۆاگوندى تارتىپ جۇرگەنبىز. سالماق كوبىنەسە قازىر مىنا اياققا جانە العا قاراي ەڭكەيىپ تارتىلعان سوڭ تروسقا, تروستان يىققا تۇسەدى. بۇل 23 توننا ۆاگوندى ەڭ باستىسى – ورنىنان قوزعالتىپ الۋ», دەيدى جۇرتتى ءتانتى ەتكەن ەر ادام.
ەندى پارساحان اۋىر تراكتوردى تارتىپ, كوپشىلىكتى تاعى ءبىر تاڭعالدىرسام دەيدى. ول بۇل تريۋكتى تاۋەلسىزدىك كۇنىندە جاساماقشى.