سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتىپ, دەپۋتاتتار 2 قاراشا كۇنى وتەتىن سەنات وتىرىسىنىڭ كۇن ءتارتىبىن بەكىتتى.
بيۋرو وتىرىسى ءبىر مينۋت ۇنسىزدىكپەن باستالىپ, سەناتورلار مەن اپپارات قىزمەتكەرلەرى قاراعاندى وبلىسىندا بولعان توتەنشە جاعداي سالدارىنان قازا تاپقان كەنشىلەردى ەسكە الدى.
ماۋلەن اشىمباەۆ قازا تاپقانداردىڭ وتباسىلارى مەن جاقىندارىنا كوڭىل ايتتى. سونداي-اق سەنات توراعاسى مەملەكەت باسشىسى اپاتتىڭ ءمان-جايىن انىقتاپ, ءتيىستى شەشىم قابىلداۋ ءۇشىن وقيعا ورنىنا ارنايى بارعانىن اتاپ ءوتتى. پرەزيدەنت كەنشىلەردىڭ وتباسىلارىمەن جانە جاقىندارىمەن كەزدەسىپ, ولارعا قولداۋ كورسەتىپ, اپاتتىڭ سەبەبىن انىقتاۋ ءۇشىن ءتيىستى ورگاندارعا ناقتى تاپسىرمالار بەردى.
الداعى پالاتا وتىرىسىندا سەناتورلار «استانادا (قازاقستان رەسپۋبليكاسى) دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق وڭىرلىك كوميتەتىنىڭ جەتپىس ءۇشىنشى سەسسياسىن ۇيىمداستىرۋ تۋرالى قازاقستان رەسپۋبليكاسىنىڭ ۇكىمەتى مەن دۇنيەجۇزىلىك دەنساۋلىق ساقتاۋ ۇيىمى اراسىنداعى كەلىسىمدى راتيفيكاتسيالاۋ تۋرالى» زاڭ جوباسىن قارايدى.
بۇل قۇجات قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى حالىقارالىق ىنتىماقتاستىقتى ودان ءارى دامىتۋدى كوزدەيدى. زاڭدى راتيفيكاتسيالاۋ ۇيىمعا مۇشە مەملەكەتتەر اراسىندا قازاقستاننىڭ بەدەلىن نىعايتۋعا جانە ءبىزدىڭ ەلگە دەگەن سەنىمدى ارتتىرۋعا ىقپال ەتپەك.
سونداي-اق سەنات توراعاسى الداعى پالاتا وتىرىسىندا مەملەكەت باسشىسىنىڭ بيىلعى جولداۋى اياسىندا قولعا الىناتىن ۇلتتىق جوبالاردى ىسكە اسىرۋعا جانە ەلىمىزدىڭ ءۇش جىلدىق بيۋدجەتىنە قاتىستى ماسەلەلەر تالقىلاناتىنىن اتاپ ءوتتى.