ءسۇت يمپورتىنا تاۋەلدىلىكتى تومەندەتەدى

ەسكە سالساق, پرەزيدەنت قاسىم-جومارت توقاەۆتىڭ وسى جىلدىڭ قىر­كۇيەك ايىنداعى گەرمانياعا ساپارى اياسىندا قازاقستاننىڭ وڭتۇستىگىندە مال شارۋاشىلىعى سالاسىنىڭ قىزمەت­كەر­لەرىن وقىتۋ جونىندەگى ءسۇت ورتالىعىن قۇرۋ تۋرالى ۇشجاقتى شارتقا قول قويىل­دى.

جوبانى GFA Consulting Group GmbH (گەرمانيا), قازاق اگروتەحنيكالىق ۋني­ۆەر­سيتەتى جانە «بايسەركە اگرو» عىلىمي-وندىرىستىك ورتالىعى (قازاقستان) ىسكە اسىرۋدى باستاپ كەتتى.

KFM باعدارلاماسىنىڭ ءبىرىنشى كەزەڭى بارىسىندا اقمولا, قوستاناي, پاۆلودار جانە سولتۇستىك قازاقستان وبلىستارىنىڭ 16 قاناتقاقتى شارۋاشىلىعىنىڭ ءتورت جۇزدەن استام ماماندارى وقىتىلىپ, پراك­تيكالىق جۇمىس ناتيجەسىندە سيىر­لاردىڭ ونىمدىلىگىن ارتتىرۋعا, جەمگە تالداۋ جۇرگىزۋگە, فەرماداعى جۇمىس حاتتاماسىن جاساۋعا جانە ساقتاۋعا باعىتتالعان بىرقاتار شارا يگەرىلگەن.

ال وڭتۇستىك وبلىستاردا ءسۇت ءوندى­رىسى سالا­سىنداعى بىلىكتىلىكتى ارتتىرۋ جۇ­مىس­تارى الماتى قالاسىنىڭ ما­ڭىندا ورنالاسقان «بايسەركە اگرو» وقۋ عىلىمي-وندىرىستىك ورتالىعىنىڭ بازا­سىندا جۇرگىزىلەدى. وسىعان وراي, وقىتۋ ورتالىعىنىڭ اشىلۋ سالتاناتى ءوتتى. شاراعا قاتىسۋشىلار ورتالىقتىڭ ايماق­تاعى ءسۇت ءوندىرىسىن دامىتۋعا ايرىق­شا ىقپال ەتەتىندىگىن اتادى.

اگروحولدينگ وقۋعا قاتىسۋشىلاردى 30 ورىندىق دايىن جاتاقحاناسى بار ينفراقۇرىلىم, اسحانا, تەوريادان ءوتۋ ءۇشىن وقۋ سىنىپتارى, پراكتيكالىق داعدىلاردى الۋ ءۇشىن ساۋدىڭ زاماناۋي تۇرلەرى بار ءسۇت-تاۋار فەرماسىمەن قامتاماسىز ەتەدى.

ورتالىقتىڭ جۇمىسى KFM باعدارلا­ما­سىنىڭ جەتەكشىسى ۋۆە ۆەدديگەنىڭ جەتەكشىلىگىمەن جۇزەگە اسىرىلادى. ورتا­لىقتىڭ الەۋەتتى كونتينگەنتى – اگرار­لىق ۋنيۆەرسيتەتتەردىڭ تۇلەكتەرى مەن ستۋدەنتتەرى, سونداي-اق شارۋا قوجالىق­تا­رىنىڭ ماماندارى. وقىتۋ – كادر تاپشىلىعىن قىسقارتۋعا, جاڭا جانە جۇمىس ىستەپ تۇرعان ءسۇت فەرمالارىندا پەرسونالدىڭ بىلىكتىلىگىن ارتتىرۋعا, سونداي-اق ءسۇت وندىرىسىندە جۇمىس ىستەۋگە جاستاردى تارتۋعا ىقپال ەتپەك.

ءسۇت ءوندىرىسى سالاسىندا پراكتيكا­لىق داعدىلاردى يگەرۋ, شارۋا قوجالىق­تا­رى­نىڭ رەنتابەلدىلىگىن ارتتىرۋمەن قاتار, قايتا وڭدەۋ كاسىپورىندارىنا وتكىزۋ ءۇشىن ءسۇت ساپاسىن جاقسارتۋدى ماقسات ەتكەن جوبا­نىڭ جۇزەگە اسۋى مەملەكەتتىڭ ءسۇت يمپورتىنا تاۋەلدىلىگىن 39 پايىزدان 11 پايىزعا دەيىن تومەندەتەدى دەگەن سەنىمدە.

وقۋ ورتالىعىندا جەكەلەگەن ءسۇت فەر­مالارىنىڭ (قاناتقاقتى) تەحنيكالىق جانە باسقارۋ پەرسونالىنىڭ, سونداي-اق جەرگىلىكتى كونسۋلتاتسيالىق قىزمەت كورسەتۋشىلەر مەن مامانداندىرىلعان مەكەمەلەردىڭ بىلىكتىلىگىن ارتتىرۋ جوس­پارلانۋدا. قاناتقاقتى فەرما قىز­مەتكەرلەرى ۇزاقمەرزىمدى پەرسپەك­تيۆادا ءسۇت ءوندىرىسىن ۇلعايتۋ ماق­ساتىندا زاماناۋي, تۇراقتى جانە جان­ۋار­لاردىڭ ءال-اۋقاتىنا, وندىرىس­تىك جۇ­يە­لەرگە با­­عىتتالعان ينۆەستيتسيالار­دى جوس­پارلاۋ جانە ىسكە اسىرۋ بو­يىنشا كە­ڭەستەر الا الادى. سوعان سايكەس مامان­دان­دى­رىلعان سەمينارلار, پراك­تي­كالىق كۋرس­تار, تاعىلىمدامالار مەن ترەنينگتەر ۇيىمداستىرىلاتىن بولادى.

الماتى وبلىسى