تەمىر جولدى سايىن دالانىڭ بۇلكىلدەپ سوققان تامىرى دەسەك, بايتاق ەلدىڭ تىنىسى تاعى ءبىر رەت كەڭەيدى دەپ ايتا بەرۋگە بولادى. الىستاعى اعايىنى ءۇشىن الىس جول ءجۇرۋدى اۋىر كورمەيتىن قازاققا ماۋسىم ايىنىڭ 2-سىنەن باستاپ № 41-42 الماتى-اتىراۋ باعىتىنداعى جاڭا قۇرامداعى سۋ جاڭا جۇردەك پويىز قىزمەتىنە كىرىستى.
جايىق بويىنداعى توي جاساپ جاتقان تۋىسقاننىڭ شاقىرتۋىمەن ءبىز دە جاڭادان تۇساۋى كەسىلگەن پويىزدىڭ كەزەكتى ءبىر ساپارىنا كۋاگەر بولدىق. ۆاگون ىشىنە ەنگەن ساتتەن ونداعى توسەك-ورىن, ۇستەل, پەردەلەردىڭ قولدان جاڭا شىققاندىعى كوزگە ۇرىپ تۇردى. جولاۋشىلار جايعاسقان ورىندارىنىڭ “بەتىن اشۋ” وزدەرىنە بۇيىرعانىنا ءماز بولعانداي, ءبىر-ءبىرلەرىنە جاڭا ۆاگون تۋرالى ايتىپ شۇيىركەلەسىپ كەتتى. پويىز دا ورنىنان قوزعالىپ, باتىستى باعىت ەتكەن بويى وڭتۇستىك جەرىمەن ءجۇرىپ كەلەدى. كاسىبىمىز جۋرناليست بولعان سوڭ وزگە ۆاگون تۇرعىندارىنا دا قۇتتى بولسىن ايتايىق ءارى قۋانىشىن بولىسەيىك دەپ ءبىز دە ۆاگون ارالاپ كەلەمىز. ايتا كەتەتىن نارسە, جولاۋشىلاردى وڭتۇستىكتىڭ شۇجىق شىجعىرتۋعا كۇشى جەتەتىن ىستىعىنان ۆاگون ىشىندەگى اۋا تازارتقىش ءارى جەلدەتكىش قۇرىلعى قۇتقارىپ وتىردى. ادەتتە, قولىنداعى ورامالىمەن بەتىن جەلپىپ وتىراتىن جولاۋشىلار قوسىمشا جۇمىستان قۇتىلعانىنا ريزا بولىستى.
جاڭا پويىزدىڭ ءمان-جايىمەن تانىسۋ ماقساتىندا پويىز باستىعى اسانحان بىلالوۆپەن ءتىلدەسكەن ەدىك. ول بىلاي دەدى: “ون سەگىز جىلدان بەرى وسى سالادا قىزمەت ەتىپ كەلەمىن. زاۋىتتان شىعىپ ەل يگىلىگىنە اينالىپ ۇلگەرگەن پويىزدىڭ نوقتا اعاسى بولعانىما قۋانىشتىمىن. بۇل پويىز جولاۋشىلار تاسقىنىنىڭ ارتۋىنا بايلانىستى بۇرىنعى پويىزعا قوسىمشا كۇش رەتىندە جولعا شىعارىلىپ وتىر. بۇعان “وڭتۇستىك” ايماقتىق فيليالىنىڭ ديرەكتورى اسقار شۇكىرباەۆتىڭ ەڭبەگى ءسىڭدى دەپ ايتۋعا تولىق نەگىز بار. سول ازامات كەلگەلى ۇجىمنىڭ جۇمىسى العا جىلجىپ, قىزمەتكەرلەردىڭ جاعدايى جاقساردى. ال ءوزىم باسقاراتىن پويىز تۋرالى ايتسام, ءار ۆاگوندا ەكى جولسەرىك قىزمەت ىستەيدى. بارلىعى – 14 ۆاگون. ونىڭ 4-ءۋى پلاتسكارت, 4-ءۋى ەكى ورىندىقتى جۇمساق ۆاگون, 6-ۋى كۋپەلى ۆاگون. بۇرىنعى پويىزدا تەك ارنايى ۆاگوندارعا عانا جەلدەتكىش ورناتىلسا, قازىر ول قۇرىلعى ءبىزدىڭ پويىزدىڭ بارلىق ۆاگونىندا بار. جولاۋشىلارعا قانت-شاي ۇلەستىرىلەدى. گيگيەنالىق تازالىققا اسا مۇقيات قارايمىز. ۆاگوندا ىستىق سۋ دا, سۋىق سۋ دا بار. سونىمەن قوسا, رەستوراندىق قىزمەت كورسەتۋ ورتالىعى جۇمىس ىستەيدى”.
ۆاگونىمىزعا قايتا كەلىپ جايعاساردىڭ الدىندا جولسەرىكپەن اڭگىمە جۇرگىزۋدى ءجون كوردىك. جاسى وتىزدار شاماسىنداعى جىگىت جالاقىسىنا كوڭىلى تولاتىنىن باسا ايتتى. سۋ جاڭا فورماسى بويىنا جاراسقان ازامات “تەك ايەلىڭنىڭ قاسىڭدا بولمايتىنى قيىنداۋ, قالعانىنىڭ ءبارى جاقسى”, دەپ ازىلدەپ قويدى. پويىز اقىرعى ايالداماسىنا ەكى ءتۇندى ورتاعا سالىپ كەشكى 23.30-دا اتىراۋ قالاسىنا توقتادى. ەندى جاڭا پويىزدى كەرى جول كۇتىپ تۇر.
بەيبىت ايات, جۋرناليست.
الماتى-اتىراۋ.