مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» اق-نىڭ كوستەنكو اتىنداعى شاحتاسىندا ورىن العان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ونىڭ قۇرامىنا پرەمەر-ءمينيستردىڭ ءبىرىنشى ورىنباسارى رومان سكليار, توتەنشە جاعدايلار ءمينيسترى سىرىم ءشارىپحانوۆ, ىشكى ىستەر ءمينيسترى ەرجان سادەنوۆ, دەنساۋلىق ساقتاۋ ءمينيسترى اجار عينيات, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, ونەركاسىپ جانە قۇرىلىس ءمينيسترى قانات شارلاپاەۆ, قۇقىق قورعاۋ ورگاندارىنىڭ, قاراعاندى وبلىسى اكىمدىگىنىڭ, ەڭبەك ينسپەكتسياسىنىڭ, «قورعاۋ» كومىر وندىرۋشىلەر كاسىپوداعىنىڭ وكىلدەرى جانە تاعى باسقالار كىردى.
«شاحتاداعى ءورتتىڭ سالدارىنان توپتىق جازاتايىم جاعدايدىڭ سەبەپتەرىنە جان-جاقتى تەرگەۋ جۇرگىزىلەدى. سونىمەن قاتار كەلتىرىلگەن زالالدى باعالاۋ, زارداپ شەككەندەرگە جانە قازا تاپقانداردىڭ وتباسىلارىنا العاشقى كومەك كورسەتۋ جونىندە شارالار قابىلدانادى», دەلىنگەن حابارلامادا.
سونداي-اق ۇكىمەت «ارسەلورميتتال تەمىرتاۋ» اق اكتسيونەرلەرىمەن الدىن الا ۋاعدالاستىققا قول جەتكىزگەنىن جانە كاسىپورىننىڭ مەنشىك قۇقىعىن قازاقستان پايداسىنا بەرۋ تۋرالى كەلىسىمشارتتى راسىمدەۋ اياقتالىپ قالعانىن حابارلادى.