جاھاندىق مەديا جانە اقپاراتتىق ساۋات اپتالىعى اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە بۇۇ جاھاندىق كوممۋنيكاتسيالار دەپارتامەنتى وكىلدىگى – الماتىداعى بۇۇ قوعامدىق اقپارات دەپارتامەنتىمەن ىنتىماقتاستىقتا «تسيفرلى كەڭىستىكتەگى مەديا جانە اقپاراتتىق ساۋات» اتتى IV ورتالىقازيالىق عىلىمي سەمينار ءوتتى.
ءىس-شارانىڭ اشىلۋىندا ءسوز سويلەگەن ۋنيۆەرسيتەتتىڭ اكادەميالىق ماسەلەلەر جونىندەگى پرورەكتورى ل. ەركىنباەۆا: «اقپاراتتىڭ دالدىگى, شىنايىلىعى جانە قۇقىقتىق قورعالۋى مەملەكەتتىك ساياساتتىڭ باسىم باعىتى. تسيفرلى ءبىلىم بەرۋدە اكادەميالىق ىقپالدى ارتتىرۋداعى عىلىمي زەرتتەۋلەردىڭ ۇلەسى ارتىپ كەلەدى», دەپ اتاپ ءوتتى.
اقپارات جانە مادەنيەت مينيسترلىگى باق سالاسىنداعى مەملەكەتتىك ساياسات باسقارماسىنىڭ وكىلى انەل كوشكەنباەۆا العىسوزىندە ءار ادامنىڭ اقپارات الۋدا جەلىلەردىڭ, ارنالاردىڭ بەلسەندى تۇتىنۋشىسى بولىپ وتىرعان كەزدە, مەديا ساۋاتتى بولۋى ەڭ باستى ماسەلە ەكەندىگىن اتاپ ءوتتى. كاسىبي جۋرناليستيكانىڭ بۇل تۇرعىدا ءرولى ەرەن. مينيسترلىك وسى تۇرعىدا ءال-فارابي اتىنداعى قازۇۋ-مەن سالالىق جۋرناليستيكا دامىتۋعا باعىتتالعان باعدارلامالاردى بىرلەسە ورىنداپ وتىر.
بۇۇ جاھاندىق كوممۋنيكاتسيالار دەپارتامەنتىنىڭ قازاقستان رەسپۋبليكاسىنداعى وكىلى – الماتىداعى بۇۇ اقپاراتتىق بيۋروسىنىڭ باسشىسى ۆلاستيميل سامەك بۇۇ-نىڭ ۇجىمدىق كۇن تارتىبىندە تسيفرلى كەڭىستىكتەگى مەديا جانە اقپاراتتىق ساۋات ماسەلەسى ەكەندىگىن ەرەكشە اتادى. اقپارات اعىنىنىڭ توسقاۋىلسىز اعىنى ونىڭ شىنايىلىعىن تەكسەرۋدى قاجەت ەتەتىنى راس. جاساندى ينتەللەكتىنىڭ تسيفرلى اقپاراتقا ىقپالى ارتىپ وتىر. اقپارات پريزماسىن تانۋ كاسىبي ماماندارعا جاڭا مىندەتتەر جۇكتەۋدە, اقپاراتتى تاراتۋ الگوريتمى وزگەرىپ جاتىر. سوندىقتان مەديا جانە اقپاراتتىق ساۋاتتىڭ قوعام يگىلىگى ءۇشىن ماڭىزى ارتىپ وتىر.
سەمينار جۇمىسىنا رەسەي, قازاقستان, تاجىكستان, وزبەكستان, قىرعىزستان, ارمەنياداعى اۋديوۆيزۋالدى ىنتىماقتاستىق جونىندەگى اتتاشە ەممانۋەل فوسيلون «قازۇۋ جۋرناليستيكا فاكۋلتەتىمەن بىرلەسكەن تسيفرلى مەديا سالاسىندا «فاكتچەكينگ», ء«موبيلدى ءتۇسىرىلىم» باعدارلامالارى ورتالىق ازيا ەلدەرىنىڭ جۋرناليستيكا فاكۋلتەتتەرى قاتىسۋىمەن ناتيجەلى اياقتالعانىن, الداعى ۋاقىتتى VR جۋرناليستيكا سالاسىندا ءبىلىم بەرۋ جوبالارى ۇسىنىلادى», دەپ ءسوزىن قورىتىندىلادى.
سەمينار بارىسىندا قازۇۋ عالىمدارىنىڭ «قازاقستانداعى جالعان اقپارات پەن دەزينفورماتسيا ينديكاتورلارىن انىقتاۋعا ارنالعان تسيفرلى ساۋات سالاسىندا اقپاراتتىق رەسۋرس ازىرلەۋ» قر عىلىم جانە جوعارى ءبىلىم مينيسترىگىنىڭ قولدانبالى زەرتتەۋلەرگە گرانتتىق جوباسى تانىستىرىلدى. وسى جوبانىڭ عىلىمي كەڭەسشىسى LMU Munich ۋنيۆەرسيتەتىنىڭ باق جانە كوممۋنيكاتسيا كافەدراسىنىڭ مەڭگەرۋشىسى, پروفەسور توماس حانيتسش جۇمىس ىستەيتىن عالىمدار توبى الەۋمەتتىك مەديا جانە بۇقارالىق كوممۋنيكاتسيا سالاسىنداعى جالعان اقپارات پەن دەزينفورماتسيا ينديكاتورلارىن زەرتتەۋ جانە انىقتاۋ بويىنشا زەرتتەۋلەر جۇرگىزەتىنىن اتاپ ءوتتى. زەرتتەۋ ناتيجەلەرى حالىقتىڭ مەديا جانە اقپاراتتىق ساۋاتتىلىقتى زەرتتەۋدەگى مۇمكىندىكتەرىن كەڭەيتۋگە جانە جاستاردىڭ اقپاراتتىق مادەنيەتىن جاقسارتۋعا ىقپال ەتەتىن بولادى.
گەرمانيا, قىرعىزستان, سلوۆاكيا, تاجىكستان, وزبەكستان ەلدەرىنىڭ عالىمدارى, سونداي-اق جۋرناليستيكا فاكۋلتەتىنىڭ ماگيسترانتتارى مەن PhD دوكتورانتتارى قاتىستى.