24 قازان - كىتاپحاناشىلار كۇنى. وسى ورايدا اقتوبە وبلىستىق زاعيپ جانە كوزى ناشار كورەتىن ازاماتتارعا ارنالعان كىتاپحانانىڭ ديرەكتورى قۇرالاي رايىمباەۆامەن تىلدەسكەن ەدىك.
اتالعان ارناۋلى كىتاپحانا 1969 جىلدان بەرى زاعيپتارعا, كوزى ناشار كورەتىندەر ادامدارعا, ولاردىڭ وتباسىلارىنا جانە قالانىڭ ءسۇت زاۋىتى اۋدانىندا تۇراتىن تۇرعىندارعا قىزمەت ەتىپ كەلەدى.
«كىتاپحانامىزدىڭ نەگىزگى باسىمدىق باعىتى زاعيپ ادامدارعا قىزمەت ەتۋ, ارينە, جالپى ادامدارعا دا قىزمەت ەتەمىز, كىشكەنتاي بالادان ەڭكەيگەن قارتقا دەيىن كەلەدى. كوزى كورمەيتىن ازاماتتار اۋديوكىتاپتاردى تىڭدايدى نەمەسە نۇكتەلى بەدەرلى برايل قارپىندەگى كىتاپتاردى ساۋساقتارىنىڭ ۇشتارىمەن وقيدى. ىزدەگەن كىتاپتارىنىڭ اۋديونۇسقالارى بولماسا, كىتاپتاردى كىتاپحاناشىلار وقىپ بەرىپ تۇرامىز», دەيدى قۇرالاي سەرىكقىزى.
كىتاپحانا ديرەكتورىنىڭ ايتۋىنشا, مۇمكىندىگى شەكتەۋلى جانداردىڭ كوبى وتە ءبىلىمدى. بارلىق سالا بويىنشا كىتاپتار بار, جاستار كوبىنە موتيۆاتسيالىق-پسيحولوگيالىق كىتاپتار وقىسا, ۇلكەن كىسىلەر تاريحي شىعارمالار وقيدى.
«نۇكتەلى بەدەرلى برايل قارپىندەگى قازاقشا كىتاپتاردى سوڭعى ەكى جىلدا عانا الىپ جاتىرمىز, وعان دەيىن قازاقشا ونداي كىتاپتار شىققان ەمەس. سوندىقتان ن.نازارباەۆ زياتكەرلىك مەكتەبىمەن بىرلەسە وتىرىپ, اۋديوكىتاپتار شىعارىپ جاتىرمىز, ياعني زياتكەرلىك مەكتەپ وقۋشىلارى كىتاپتاردى مانەرلى داۋىسپەن وقۋى ارقىلى اۋديوكىتاپتار ازىرلەۋ جۇمىستارىن جۇرگىزىپ جاتىرمىز», دەدى كىتاپحانا باسشىسى.
كۇرالاي رايىمباەۆانىڭ سوزىنشە, اتالعان كىتاپحانادا بارلىعى 36 مىڭ دانا كىتاپ, ونىڭ ىشىندە اۋديودىبىستالعان 14 مىڭ, نۇكتەلى بەدەرلى برايل قارپىندەگى 6 مىڭ كىتاپ بار.