پرەزيدەنت مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمدە تاۋەلسىزدىكتى ساقتاۋ بۇل – ەڭ الدىمەن, تۇتاس ۇلتتىڭ جاۋاپكەرشىلىگى ەكەنىن اتاپ ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«قازاقستاننىڭ الدىندا بۇرىن-سوڭدى بولماعان جاڭا سىن-قاتەرلەر تۇر. وسى كۇردەلى كەزەڭدە مەملەكەتىمىزدىڭ ورنىقتى دامۋى وتە ماڭىزدى. ءبىز بولاشاققا سەنىممەن قاراعان ءبىرتۇتاس قازاق ەلىن كۇللى الەمگە تانىتۋىمىز كەرەك.
ەگەمەندىككە قول جەتكىزۋ وڭاي ەمەس, ال ونى ساقتاپ تۇرۋ ءتىپتى قيىن. شىن مانىندە, تاۋەلسىزدىك – بارىنەن قىمبات. تاۋەلسىزدىكتى ساقتاۋ بۇل – ەڭ الدىمەن, تۇتاس ۇلتتىڭ جاۋاپكەرشىلىگى.
ءبىز ەگەمەندىكتى تىنىمسىز ەڭبەكپەن, مىزعىماس بىرلىكپەن كۇن سايىن قورعاۋىمىز كەرەك. ەڭ باستىسى, ەلىمىزدەگى تۇراقتىلىقتى ساقتاۋىمىز قاجەت. سەبەبى, تىنىشتىق بولماسا, باسقانىڭ ءبارى بەكەر», دەدى ەل پرەزيدەنتى.