قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىسى» تۇراقتى بىرىنشىلىكتەگى كەزەكتى ويىنىن قىتايدىڭ «كۋنلۋن رەد ستار» كومانداسىمەن وتكىزدى.
قازىرگى تاڭدا ەكى ۇجىم دا قحل-ءدىڭ تۋرنير كەستەسىندە سوڭعى ورىنداردا قاتارلاس كەلە جاتىر. سوندىقتان جوعارى ورىندارعا كوتەرىلۋ ءۇشىن ەكى كومانداعا دا جەڭىس اۋاداي قاجەت ەدى. ماسكەۋدەگى «ارەنا «مىتيششي» سپورت كەشەنىندە وتكەن باسەكە ءا دەگەننەن اسا تارتىستى باستالدى. ويىننىڭ ەسەبىن 7-مينۋتتا «بارىس» ويىنشىسى داۆيد سكلەنيچكا اشقانىمەن, ەكىنشى كەزەڭ باستالعان بەتتە «كۋنلۋن» ساپىنان نولان مويل تارازى باسىن تەڭەستىرىپ كەتتى – 1:1. ارادا ەكى مينۋت وتكەندە ميحايل راحمانوۆ «بارىسقا» قايتا باسىمدىق سىيلاسا, ءۇشىنشى كەزەڭ اياقتالار تۇستا دەۆين بروسسو دالدىك تانىتىپ, ەسەپتى 2:2-گە جەتكىزدى.
ءسويتىپ, ويىننىڭ نەگىزگى كەزەڭى تەڭ ناتيجەمەن اياقتالعان سوڭ, باسەكە وۆەرتايمعا ۇلاستى. قوسىمشا ۋاقىتتا دا جەڭىمپاز كوماندا انىقتالعان جوق. ال بۋلليتتەر سەرياسىندا «بارىستىڭ» باعى جانىپ, قاتارىنان ەكىنشى جەڭىسىنە قول جەتكىزدى – 3:2.