كىتاپ وقيتىن ۇلتتىڭ رۋحانياتى دا, مادەنيەتى مەن ادەبيەتى دە بەرىك بولارى ءسوزسىز. ادامزاتتى يگىلىككە باستايتىن, اقىل-ويدىڭ تامىرشىسى كىتاپقا دەگەن قوعامنىڭ قۇرمەتى دە ارقاشان بيىك بولماق. وسى رەتتە رۋحاني ورداعا بالانعان كىتاپحانالار مەن ولاردىڭ شىراقشىسىنا اينالعان كىتاپحاناشىلاردىڭ ءرولى باسىم. مەملەكەت باسشىسى قاسىم-جومارت توقاەۆ كىتاپحانالار مەن كىتاپحاناشىلاردىڭ جاعدايىنا, زاماناۋي ساپاسىنا, اقىلدى ۇلت قالىپتاستىرۋ جولىنداعى جوسپارىنا ەرەكشە ماڭىز قويىپ, توقتالىپ وتىر. بيىل ەكىنشى رەت تويلانىپ جاتقان كىتاپحاناشىلار كۇنى – وسى سالاعا دەگەن سىندارلى ءىستىڭ ناتيجەسى.
بۇل مەرەكەلىك داتا كىتاپحانالاردىڭ جۇمىسىن جانداندىرىپ, سالا ماماندارىنىڭ بەدەلىن ارتتىرۋ ماقساتىندا بەكىتىلگەن ەدى. اتالعان مەرەكەگە وراي ەل استاناسىندا القالى جيىن ءوتىپ, ەلىمىزدىڭ تۇكپىر-تۇكپىرىنەن كەلگەن كىتاپحاناشىلار باس قوستى. مادەنيەت جانە اقپارات ءمينيسترى ايدا بالاەۆا ارنايى قاتىسقان سالتاناتتى ءىس-شارا اياسىندا كىتاپحاناشىلارعا «مادەنيەت سالاسىنىڭ ۇزدىگى» توسبەلگىسى تاپسىرىلىپ, قۇرمەت گراموتاسى جانە العىسحاتتارمەن ماراپاتتالدى.
«ادىلەتتى قازاقستان – ادال ازامات» ۇلتتىق قۇرىلتايىنىڭ ەكىنشى وتىرىسىندا مەملەكەت باسشىسى: «شىن مانىندە, كىتاپ وقيتىن ەل عانا اقىلدى ۇلتقا اينالادى. ءبىز جاس ۇرپاقتىڭ كىتاپقا دەگەن قۇشتارلىعىن وياتۋىمىز كەرەك», دەپ اتاپ ءوتتى. قاسىم-جومارت كەمەل ۇلى سىزدەرگە ۇلكەن ءۇمىت ارتىپ, جاس ۇرپاقتى ۇلتتىق قۇندىلىقتار نەگىزىندە تاربيەلەپ وتىرعان كىتاپحانالار مەن كىتاپحاناشىلاردىڭ جاعدايىنا ەرەكشە نازار اۋدارادى. بۇعان كاسىبي مەرەكە – وتكەن جىلى قازاقستاندا ۇكىمەتتىڭ قاۋلىسىمەن بەكىتىلگەن – كىتاپحاناشىلار كۇنى دالەل بولا الادى. ەلىمىزدە 11 مىڭعا جۋىق كىتاپحانا جۇمىس ىستەيدى, ولاردىڭ شتاتىندا 25 مىڭنان استام ادام بار, كىتاپ قورى 328 ميلليون دانادان استى. كىتاپحانا قىزمەتتەرىن پايدالانۋشىلار سانى 9,5 ميلليونعا جەتتى جانە بۇل كورسەتكىش جىل سايىن ارتىپ كەلەدى. ارينە, بارلىق جەتىستىككە كىتاپحاناشىلاردىڭ كاسىبي ەڭبەگى مەن اعارتۋشىلىق ءرولىنىڭ ارقاسىندا جەتتىك», دەدى ايدا بالاەۆا.
مەرەكەلىك جيىنعا قاتىسۋشىلار وڭىرلەردەگى كىتاپحانالىق قىزمەت كورسەتۋدەگى وزىق جوبالارمەن تانىسىپ, كىتاپحانا تاريحىنا ارنالعان ارنايى كورمەنى تاماشالادى. سونداي-اق اتالعان سالانى دامىتۋعا بايلانىستى وزەكتى ماسەلەلەر تالقىلاندى. مادەنيەت جانە اقپارات ءمينيسترى ايدا بالاەۆانىڭ توراعالىعىمەن وتكەن دوڭگەلەك ۇستەل جۇمىسىنا عالىمدار, اقىن-جازۋشىلار, باسپاگەرلەر, كىتاپحانا ماماندارى قاتىستى.
ءىس-شارانى مادەنيەت جانە اقپارات ءمينيسترى ايدا بالاەۆا اشىپ, كىتاپحانالار مەن وقىرمانداردىڭ ىنتىماقتاستىعىنا, بىرلىگىنە قاتىستى ويىن جەتكىزدى.
«مەملەكەت باسشىسى «جاس ۇرپاقتىڭ كىتاپقا دەگەن قۇشتارلىعىن وياتۋ» ناقتى مىندەتىن قويدى. پرەزيدەنت ءوزىنىڭ الدىڭعى سوزدەرىندە دە كىتاپحانا سالاسىن دامىتۋعا ەرەكشە نازار اۋداردى. وسىعان بايلانىستى ءبىز پرەزيدەنتتىڭ بارلىق تاپسىرماسىن ورىنداۋ بويىنشا قاجەتتى شارالاردى قابىلداپ جاتىرمىز», دەدى مينيستر.
سونداي-اق دوڭگەلەك ۇستەل بارىسىندا وسى باعىتتاعى جۇمىس ناتيجەلەرى تۋرالى باياندالدى. اتاپ ايتساق, مينيستر كىتاپحاناشىلاردىڭ جالاقىسىن 2025 جىلعا قاراي 100%-عا ارتتىرۋ ماقساتىندا كىتاپحانا قىزمەتكەرلەرىنىڭ جالاقىسىن جىل سايىن 25%-عا ۇلعايتۋ جونىندەگى جوسپارىمەن ءبولىستى. كىتاپ قورىن جاڭارتۋ بويىنشا دا بىرقاتار شارا قابىلدانىپ جاتىر. كەيىنگى 5 جىلدا مەملەكەتتىك تاپسىرىسپەن 4,5 ميلليون كىتاپ شىعارىلعان.
مينيستر شەتەلدىك بەستسەللەردى قازاق تىلىنە اۋدارۋ – ماڭىزدى اسپەكت ەكەنىن دە العا تارتتى. سونىمەن قاتار وقىرماننىڭ سۇرانىسىنا ساي كىتاپتار شىعارۋ ءۇشىن كىتاپ وقۋشىلار اراسىندا ارنايى الەۋمەتتىك ساۋالنامالار جۇرگىزۋ جوسپارلانىپ وتىر. ۇلتتىق ەلەكتروندىق كىتاپحانانى دامىتۋ جۇمىستارى دا بەلسەندى جۇرگىزىلىپ جاتىر.
«قازاقستاننىڭ ەلەكتروندىق كىتاپحاناسى» جوباسى اياسىندا وقىرمان «بىرىڭعاي بيلەت» ارقىلى ەلىمىزدىڭ كەز كەلگەن كىتاپحاناسىنىڭ ەلەكتروندىق بازاسىنا قول جەتكىزە الاتىنداي بارلىق كىتاپحانانى بىرىڭعاي اقپاراتتىق جۇيەگە قوسۋ جوسپارلانىپ وتىرعانى دا ايتىلدى.
بۇدان بولەك, دوڭگەلەك ۇستەلگە قاتىسۋشىلار سالانى دامىتۋعا قاتىستى ءوز پىكىرلەرىمەن ءبولىستى. قورىتىندى سوزىندە مينيستر ءىس-شارا بارىسىندا ايتىلعان بارلىق ۇسىنىس ەسكەرىلىپ, تالدانىپ, جۇمىسقا قابىلداناتىنىن اتاپ ءوتتى.
ايتا كەتەيىك, بۇگىندە ەلىمىزدە 11 مىڭعا جۋىق كىتاپحانا جۇمىس ىستەيدى. ونىڭ 7 مىڭنان استامى ءبىلىم جۇيەسىنە قاراستى بولسا, 3 مىڭنان استامى مادەنيەت سالاسىنا باعىنادى.