رەسپۋبليكا كۇنى قارساڭىندا شىمكەنتتە «كۇمىس قالام – 2023» پوەزيالىق سايىسى ۇيىمداستىرىلدى. بيىل ءۇشىنشى جىل قاتارىنان ءوتىپ جاتقان كونكۋرسقا ەلىمىزدىڭ ءار وڭىرىنەن ۇمىتكەرلەر جينالدى. سايىس شارتى بويىنشا 14-35 جاس ارالىعىندا جازبا اقىندار ءوزارا سىنعا ءتۇستى.
بايقاۋدىڭ سالتاناتتى اشىلۋىندا قۇتتىقتاۋ ءسوز سويلەگەن قالا اكىمىنىڭ ءبىرىنشى ورىنباسارى قۋانىش اسىلوۆ ۇمىتكەرلەرگە ساتتىلىك تىلەدى. بايقاۋدىڭ وتۋىنە مۇرىندىق بولعان – قالالىق ىشكى ساياسات جانە جاستار ىستەرى باسقارماسى مەن جاستار رەسۋرستىق ورتالىعى. سونىمەن تارتىستى ءمۇشايرادا سەرعازى قايىربولدى ءىىى ورىن, جادىرا بايبۇلانوۆا ءىى ورىن, ۇلىتاۋ وبلىسىنان كەلگەن جاس اقىن ايزادا راحىمجان ءى ورىن الىپ, «كۇمىس قالام – 2023» جۇلدەسىنىڭ يەگەرى اتاندى.
جازبا اقىندار ءمۇشايراسىنىڭ ءىزىن الا «تاۋەلسىزدىك – بابالار اماناتى» تاقىرىبىندا جاس ايتىسكەر اقىندار اراسىندا «كۇمىس دومبىرا» رەسپۋبليكالىق كونكۋرسى وتكىزىلدى. بايقاۋدا قازاقستاننىڭ ءار تۇكپىرىنەن كەلگەن 16 ايتىسكەر اقىن باق سىنادى. ايتىس ونەرىنىڭ مايتالماندارى, مادەنيەتتىڭ ەڭبەك سىڭىرگەن قايراتكەرلەرى كونكۋرسقا قازىلىق ەتتى. ءبىر-بىرىمەن ءسوز قاعىستىرعان, تاپقىر ويلارمەن قارسىلاسىن تۇقىرتىپ, جالىندى جىر شۋماقتارىمەن دەلەبەنى قوزدىرعان جاس اقىندار ايتىسى جينالعان كوپشىلىكتىڭ رۋحانياتقا سۋساعان ءشولىن ءبىر قاندىرىپ تاستادى.
قاراتاۋ ءداستۇرلى ونەر مەكتەبىندەگى ايتىس سىنىبىنىڭ جەتەكشىسى, وسى ونەردىڭ بەلدى وكىلدەرىنىڭ ءبىرى قاجىمۇقان ابزال تاۋەلسىزدىكتىڭ ارقاسىندا ءتول ونەرىمىز ناسيحاتتالىپ, قولداۋ تاپقانىن ايتتى. اقىن سونداي-اق «كۇمىس دومبىرا» بايقاۋى جىل سايىن بولا بەرسە ەكەن دەگەن تىلەگىن جەتكىزدى. بايقاۋ رەسپۋبليكالىق بولسا دا, قاتارىنان ءۇش جىل شىمقالادا ءوتۋى مەگاپوليستىڭ ءتول ونەرگە دەگەن جانارشىلىعىن بايقاتسا كەرەك دەگەن ويىن قوسا كەتتى.
رەسپۋبليكا كۇنى مەرەكەسىن, تاۋەلسىزدىكتى ارقاۋ ەتكەن ايتىسكەر جاس اقىنداردىڭ بايقاۋىنىڭ قورىتىندىسىنا كەلسەك, «كۇمىس دومبىرانىڭ» باس جۇلدەسىن شىمكەنتتىك ايان نيازبەك ەنشىلەدى. ودان بولەك, ەرداۋلەت ىبىراي مەن نۇرداۋلەت ومىربەك ءىىى ورىن, جامبىل وبلىسىنىڭ اقىنى مۇحتار قونارباي مەن تۇركىستاندىق احمەتراسۋل بايانباي ءىى ورىن, ال قاسيەتتى باياناۋىل جەرىنەن كەلگەن كەلگەن جاس اقىن مارەس بايرون ءى ورىن يەلەندى.
«كۇمىس دومبىرانىڭ» باس جۇلدە يەگەرى قاراتاۋ ءداستۇرلى ونەر مەكتەبىنىڭ ۇستازى ايان نيازبەك جۋرناليستەرگە بەرگەن سۇحباتىندا جاس اقىندار ايتىسىندا وسىمەن ءۇشىنشى جىل قاتارىنان باق سىناپ جۇرگەنىن جەتكىزدى. جارىستىڭ ءبىرىنشى كەزەڭىندە استانالىق شايىر ەرداۋلەت ىبىراەۆقا قارسىلاس بولسا, ەكىنشى كەزەڭدە تۇركىستاندىق اقىن احمەتراسۋل بايانبايمەن تالاسقا تۇسكەن. ول ايتىس ونەرىنە جاستاردىڭ قىزىعىپ كەلە جاتقانىن ايتىپ, قۋانىپ وتىر. زال تولى جاستاردى كورىپ سولاردىڭ قوعامداعى ماسەلەسىن قوزعاعانىن ايتتى.
ونەر دوداسىنان كەيىن ورىن العان جۇلدەگەرلەرگە شىمكەنت قالاسى اكىمىنىڭ ءبىرىنشى ورىنباسارى قۋانىش اسىلوۆ ارنايى سىيلىقتاردى تارتۋ ەتتى.
شىمكەنت