قۇتقارۋشىلار كۇنى قارساڭىندا استانا قالاسىنىڭ ماڭىنداعى ۇركەر شاعىن اۋدانىندا قىزمەت بابىندا ەرلىكپەن قازا تاپقان ءورت ءسوندىرۋشى اسقار سەرىك ۇلى زابيكۋليننىڭ اتى بەرىلگەن كوشەنىڭ رەسمي اشىلۋ سالتاناتى ءوتتى.
ءىس-شاراعا توتەنشە جاعدايلار مينيسترىلىگىنىڭ وكىلدەرى, اسقار زابيكۋليننىڭ تۋىستارى, جۇبايى مەن بالالارى, دوس-جاراندارى جانە ازاماتتىق قورعاۋ ورگاندارىنىڭ ارداگەرلەرى, استانا قالاسى تجد باسشىلىعى مەن جەكە قۇرامى قاتىستى. جيىن بارىسىندا دوستارى, تۋىستارى, ارىپتەستەرى اسقاردىڭ قىزمەت بارىسىنداعى ازاماتتىعى مەن جانكەشتىلىگىنە ەرەكشە توقتالىپ, كوپكە بەيمالىم قىرلارىن, ەرلىكتەرىن ايتىپ, تۋىستارى بۇگىنگىنىڭ حاس باتىرىنا اينالعان باۋىرىن ماقتانىشپەن ەسكە الدى. سونىمەن قاتار كوشەنىڭ سالتاناتتى اشىلۋى بارىسىندا اسقار زابيكۋليننىڭ جاقىندارى, تجد قىزمەتكەرلەرى مەن ارداگەرلەرى كوشە بويىنا اعاش وتىرعىزدى.
مەملەكەت باسشىسىنىڭ تاپسىرماسى بويىنشا استانا قالاسى ءماسليحاتىنىڭ 2023 جىلى 19 قاڭتارداعى شەشىمىمەن استانا قالاسىنداعى كوشەلەردىڭ بىرىنە ەرجۇرەك ءورت ءسوندىرۋشىنىڭ ەسىمىن ماڭگى ەستە ساقتاۋ ماقساتىندا اسقار زابيكۋليننىڭ ەسىمى بەرىلىپ, ەستەلىك تاقتايشا ورناتىلعان ەدى.
كوپشىلىكتىڭ ەسىندە بولسا كەرەك, استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى جەدەل كەزەكشىسىنىڭ كومەكشىسى اسقار زابيكۋلين بىلتىر ەلورداداعى ءورت ءسوندىرۋ كەزىندە ءۇش ادامنىڭ ءومىرىن قۇتقارىپ, العان اۋىر جاراقاتتان 20 قاراشا كۇنى اۋرۋحانادا كوز جۇمعان ەدى. ونىڭ ارتىندا جۇبايى مەن ەكى بالاسى قالدى.
قىزمەتتىك بورىشقا ادالدىق, ماماندىققا دەگەن سۇيىسپەنشىلىك, مىنەزدىڭ بەرىكتىگى مەن جاۋاپتىلىعى – بۇل اسقار زابيكۋليننىڭ بويىنداعى قاسيەتتەر ەدى. ونىڭ ەرلىگى مەن بەينەسى حالىق جادىندا ماڭگى قالادى.