«قورعاس-شىعىس قاقپاسى» اەا اۋماعىندا يندۋستريالىق پارك سالۋ جوباسى اياسىندا «قىتاي-قازاقستان حالىقارالىق يندۋستريالىق قالاسى» جشس قۇرىلىس جۇمىستارىنا كىرىستى. كاسىپورىن 200 گەكتار اۋماقتا قۇرىلىستىڭ العاشقى كەزەڭىن قولعا الماق. ونىڭ ىشىندە ينجەنەرلىك جەلىلەر جۇرگىزۋ مەن ماگيسترالدىق كوشەنىڭ قۇرىلىستارى بار.
ينۆەستورلار بيىلعى قاراشادان باستاپ اەا اۋماعىنان تىس سالىناتىن اكىمشىلىك عيماراتتار مەن قوناقۇي نىساندارىنىڭ العاشقى قاداسىن قاعىپ, قۇرىلىسىن باستاۋعا قۇلشىنىس تانىتتى.
ەستەرىڭىزگە سالا كەتەيىك, بۇل جوبانىڭ باستى ماقساتى – يندۋستريالىق پارك سالۋ جانە دە «قورعاس-شىعىس قاقپاسى» اەا-دا وندىرىستىك, لوگيستيكالىق قىزمەت كورسەتۋدى ۇيىمداستىرۋ, سونداي-اق ونەركاسىپتىك قۋاتتاردى قحر-دان قازاقستان اۋماعىنا اۋىستىرۋ. بۇل جوبالار قحر-دىڭ ء«بىر بەلدەۋ, ءبىر جول» ستراتەگياسىن, ينفراقۇرىلىمدى دامىتۋدىڭ «نۇرلى جول» مەملەكەتتىك باعدارلاماسىن جانە «نۇرلى جول» جاڭا ەكونوميكالىق ساياسات پەن قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى «جىبەك جولىنىڭ ەكونوميكالىق بەلدەۋى» اتتى باستامالارىن نەگىزگە الادى.
جوبانىڭ قۇنى – 330 ملرد تەڭگە. وعان ءبولىنىپ وتىرعان جالپى جەر كولەمى 1000 گەكتاردى قۇرايدى. سونىڭ ارقاسىندا جاقىن ەلدى مەكەن تۇرعىندارى ءۇشىن 2 مىڭنان استام جۇمىس ورنى اشىلادى دەپ كۇتىلەدى.