پالەستينا دەنساۋلىق ساقتاۋ مينيسترلىگىنىڭ مالىمەتىنشە, ءيزرايلدىڭ گازا سەكتورىنا جاساعان سوققىلارىنىڭ سالدارىنان قازا تاپقاندار سانى 2215-كە جەتتى, دەپ حابارلايدى Egemen.kz.
ۆەدومستۆونىڭ مالىمەتىنشە, 8714 ازامات جاراقات العان. دەنساۋلىق ساقتاۋ مينيسترلىگى ناقتىلاعانداي, يوردان وزەنىنىڭ باتىس جاعالاۋىندا 54 پالەستينالىق قازا تاۋىپ, 1100-دەن استامى جارالانعان.
يزرايلدە سوڭعى مالىمەتتەر بويىنشا قاقتىعىس كەزىندە 1,3 مىڭ ادام قازا تاۋىپ, 3,5 مىڭى جارالانعان. حاماس شابۋىلىندا قازا تاپقانداردىڭ ءمايىتىن انىقتاۋ جالعاسىپ جاتىر.
گازا سەكتورى ىشكى ىستەر مينيسترلىگىنىڭ مالىمەتىنشە, ءيزرايلدىڭ پالەستينالىق بوسقىندار كونۆويىنا جاساعان سوققىسى سالدارىنان 70 ادام قازا تاۋىپ, 200-دەن استام ادام جارالانعان. گازا تۇرعىندارى اۋىز سۋ تاپشىلىعىنا بايلانىستى اۋىلشارۋاشىلىق قۇدىقتارىنداعى اششى سۋدى ىشۋگە ءماجبۇر. سۋ توقتاپ قالعاندىقتان, تۇرعىندار تازا سۋعا قول جەتكىزە الماي وتىر.
بۇعان دەيىن يزرايل قورعانىس كۇشتەرى (IDF) گازا سەكتورىنىڭ بەيبىت تۇرعىندارىنا وڭتۇستىك اۋداندارعا ەۆاكۋاتسيالانۋعا تاعى التى ساعات ۋاقىت بەرگەن.
ەگيپەت گازا سەكتورىمەن شەكارالاس جالعىز رافاح وتكەلىنىڭ قاقپاسىن بەتون بلوكتارمەن جاۋىپ تاستادى.
ەكى ەل اراسىنداعى قاقتىعىس 7 قازاندا ۋشىعا ءتۇستى. كەيىنىرەك حاماس سودىرلارىنىڭ يزرايلگە شابۋىلىن 2022 جىلدان بەرى دايىنداپ كەلگەنى بەلگىلى بولدى.