مۋزىكا – بۇكىل الەم حالقىن بايلانىستىراتىن ورتاق ءتىل. تۇركى وركەنيەتىنىڭ وزىنە ءتان مۋزىكالىق ءداستۇرى قالىپتاسقان. ونىڭ كۇشتىلىگى سول, بۇگىننىڭ وزىندە ميلليونداعان ادام ونى تىڭداعاندا, كوڭىلى تولقىپ, ەرەكشە اسەر الادى. مۇنىڭ ايقىن كورىنىسى – ەڭ كونە مۋزىكالىق اسپاپ قوبىز بەن دومبىرانىڭ ءۇنى.
ۇلتىمىزدىڭ رۋحاني يگىلىگى حح عاسىرعا دەيىن جازباسىز تۇردە دامىپ, اۋىزدان-اۋىزعا اتا-بابانىڭ مۇرا ەتۋىمەن كۇنى بۇگىنگە دەيىن جەتتى. ءبىز وسى مىڭجىلدىقتار بويى ءجىبى ۇزىلمەگەن ۇلتتىق قۇندىلىقتارىمىزدى, اسىرەسە, قازاقتىڭ مۋزىكالىق مادەنيەتىن ساقتاۋىمىز كەرەك. بۇل – ءبىزدىڭ ۇلتتىق كودىمىز. بويداعى الپىس ەكى تامىردىڭ باستاۋى.
الەمدە ساياسي احۋال كۇردەلەنە تۇسكەندە, «وتانداستار» فورۋمىنىڭ جوعارى دەڭگەيدە وتكەنىن ايتپاسقا بولمايدى. بۇل بىرىنشىدەن, ءتول مادەني مۇرانى, رۋحاني سانانى جاڭعىرتۋ جولىندا اتقارىلعان يگى ءىس بولدى. ەكىنشىدەن, جاھاننىڭ تۇكپىر-تۇكپىرىندە ءتۇرلى سالادا قىزمەت ەتكەن قانداستاردىڭ باسىن قوسىپ, ىرگەلى ەلدىك ماسەلەلەردى تالقىلاۋعا مۇمكىندىك جاسادى.
شىعارماشىلىق ادامنىڭ مىندەتى – پەندەنىڭ رۋحانياتىن نىعايتۋعا سەپ بولۋ. وسى رەتتە تاجىريبەم كورسەتكەندەي, جاس تالانتتاردى جوعارى دەڭگەيدە قولداۋ قاجەت. بۇگىندە بۇل باعىتتاعى جۇمىستاردىڭ جۇيەلى ىسكە اسىرىلۋىنىڭ ارقاسىندا, الەمدىك ارەنادا قازاقستان ساياسي, ەكونوميكالىق تۇرعىدا عانا ەمەس, كينو, مۋزىكا سىندى سالالاردا دا بەلسەندىلىگىن ارتتىردى.
بايعالي سەركەباەۆ,
قازاقستاننىڭ ەڭبەك سىڭىرگەن قايراتكەرى, «A-Studio» توبىنىڭ پروديۋسەرى