جۋىردا پەتروپاۆلدىڭ ءورت سوندىرۋشىلەرى ءبىر بالانى اجالدان قۇتقارىپ, 12 ادامدى, ونىڭ ىشىندە 3 بالانى جالىن وشاعىنان ەۆاكۋاتسيالادى.
اجالدىڭ ارانىنان جاس بالانى امان الىپ قالۋ – ءومىر بويى ەستە قالاتىن ەرەكشە ەرلىك دەپ اتاساق, ەش قاتەلەسە قويماسپىز.
كۇتپەگەن دابىل 101 تەلەفونىنا 27 قىركۇيەكتە ساعات 14.00-دە ءتۇستى. جۋكوۆ كوشەسى, 3 ءۇي مەكەنجايىنداعى 6 قاباتتى تۇرعىن ءۇيدىڭ سوڭعى قاباتىنداعى پاتەردەن وت لاۋلاپ جاتقانى حابارلاندى. دەرەۋ جەتكەن پەتروپاۆلدىق ءورت سوندىرۋشىلەر باسپالداق تامبۋرىنا جەتەر-جەتپەستەن الدىڭعى ەسىكتىڭ استىنان بۋداقتاعان قالىڭ تۇتىنگە تاپ بولادى. ۋلى ءتۇتىن پاتەر تۇرعىندارىن, اسىرەسە جوعارعى قاباتتارداعى جانداردى ەۆاكۋاتسيالاۋعا كەدەرگى كەلتىردى. سوعان قاراماي ءورت سوندىرۋشىلەر 12 تۇرعىندى, ونىڭ ىشىندە 3 بالانى باسپالداقپەن كوشەگە شىعاردى, ال گازدى تۇتىننەن قورعايتىن قورعان-شلەمدەرى بار توپ ءتۇتىن بۇرقىراپ جاتقان پاتەرگە كىردى.
«پاتەردىڭ بارلىق بولمەسىن قويۋ ءتۇتىن تۇمشالاپتى. شاماسى جاتىن بولمە بولسا كەرەك, سول جاقتا شاتىرلاپ جەكە زاتتار جانىپ جاتتى. ءبىز بولمەلەردىڭ بىرىندە بالا بار ەكەنىن الدىن الا بىلدىك, ويتكەنى ول 101 قىزمەتىندەگى ديسپەتچەر جانەركە جيەنتاەۆاعا بەينە-قوڭىراۋ ارقىلى ءوزىنىڭ قاي جەردە ەكەنىن كورسەتكەن ەكەن. ءبىز ونى تۇكپىر بولمەدە باسىن بۇعىپ وتىرعان كۇيىندە تاپتىق. بىردەن تەرەزەنى شاعىپ, تازا اۋامەن دەم الدىردىق. قولىنان جەتەلەپ, كىرەبەرىستەن شىعارعان سوڭ جەدەل جاردەم قىزمەتكەرلەرىنە تاپسىردىق. جولدا ول مۇمكىندىگىنشە تىنىشتالدى. وسى كەزدە ءوزىمنىڭ ۇيدە كۇتىپ وتىرعان ءۇش بالام ەسىمە ءتۇستى», دەيدى تجد ءورت ءسوندىرۋ قىزمەتىنىڭ №2 مامانداندىرىلعان ءورت ءسوندىرۋ ءبولىمى بولىمشەسىنىڭ كومانديرى, ازاماتتىق قورعاۋ اعا سەرجانتى بالقات توكين.
ەلەكتر سىمدارىنىڭ قىسقا تۇيىقتالۋىنان تۇتانعان ءورت 14 ساعات 34 مينۋتتا تولىق ءسوندىرىلدى. ونىڭ شارپىعان اۋماعى 5 شارشى مەتردى قۇرادى. ءورت سوندىرۋگە جەكە قۇرامنىڭ 23 ادامى جانە 7 بىرلىك تەحنيكا جۇمىلدىرىلدى. تۇپكىلىكتى سەبەپ پەن زالال الداعى ۋاقىتتا انىقتالادى.
وسىلايشا, دەنساۋلىعىنا اسەر ەتۋ دارەجەسىن انىقتاۋ ءۇشىن اۋرۋحاناعا جەتكىزىلگەن 12 جاستاعى بالا اجالدان قۇتقارىلدى. قازىر ونىڭ ومىرىنە قاۋىپ جوق.
جابىرلەنۋشىنىڭ اكەسى يۋري گريگورەۆيچ ءورت سوندىرۋشىلەرگە شىن جۇرەكتەن العىسىن ءبىلدىردى. ول «شىن جۇرەكتەن» دەگەن ءسوزىن كوپ قايتالاپ, « ۇلىمدى قۇتقارعانى ءۇشىن ريزامىن... وسى قىزمەتكە راحمەت!» دەپ وبلىس ورتالىعىنىڭ ءورت سوندىرۋشىلەرىنە رياسىز كوڭىلدەن شىققان ريزاشىلىعىن ءبىلدىردى.
ەۆگەني جۋراۆلەۆ,
وبلىستىق تجد قوعاممەن بايلانىس توبىنىڭ باس مامانى
پەتروپاۆل