سەنات توراعاسى ماۋلەن اشىمباەۆ دىندەر سەزى حاتشىلىعىنىڭ وتىرىسىندا ءسوز سويلەدى, دەپ حابارلايدى Egemen.kz.
سەنات توراعاسى اۋەلى الەمدىك جانە ءداستۇرلى دىندەر ليدەرلەرى سەزىنىڭ جيىرما جىلدىعىمەن قۇتتىقتادى. فورۋم وسى ۋاقىت ىشىندە جاھاندىق دىنارالىق جانە وركەنيەتارالىق ديالوگتىڭ ماڭىزدى پلاتفورماسىنا اينالعانىن ءسوز ەتتى.
«وتكەن جيىرما جىلدا الەمدىك جانە ءداستۇرلى دىندەر ليدەرلەرى, مەملەكەت جانە قوعام قايراتكەرلەرى, حالىقارالىق ۇيىمداردىڭ وكىلدەرى قازاقستاننىڭ دىنارالىق ديالوگتى دامىتۋ جونىندەگى باستامالارىنا ۇلكەن قولداۋ كورسەتتى. فورۋمنىڭ ميسسياسى مەن ماقساتتارىن ىسكە اسىرۋعا زور ۇلەستەرىن قوستى. سوندىقتان سەزدىڭ بارلىق قاتىسۋشىلارىنا ايرىقشا العىسىمىزدى بىلدىرەمىز. بۇگىندە حاتشىلىقتىڭ وتىرىستارى سەزد جۇمىسىنىڭ ماڭىزدى بولىگىنە اينالدى. ءبىزدىڭ كەزدەسۋلەرىمىز قاشاندا سەنىم مەن اشىقتىق پرينتسيپتەرىنە نەگىزدەلەدى. سول ارقىلى ەڭ وزەكتى ماسەلەلەردى كونسترۋكتيۆتى تۇردە تالقىلاۋ يگى ءداستۇر رەتىندە قالىپتاستى», دەدى م.اشىمباەۆ.
سەزد حاتشىلىعىنىڭ ءححى وتىرىسىنا قاتىسۋ ءۇشىن استاناعا 22 ەلدەن 28 دەلەگاتسيا كەلدى. ولاردىڭ اراسىندا بۇعان دەيىنگى سەزدەر مەن وتىرىستارعا قاتىسىپ جۇرگەن, سونداي-اق, قازاق ەلىنىڭ استاناسىنا العاش رەت كەلگەن مەيماندار بار.
«جالپى, ءبىزدىڭ ءار وتىرىسىمىزدا سەزد يدەيالارى مەن ماقساتتارىن ىسكە اسىرۋدىڭ باعىت-باعدارى ايقىندالادى. سوندىقتان حاتشىلىقتىڭ بۇگىنگى وتىرىسى دا مازمۇندى ءارى ناتيجەلى وتەدى دەپ سەنەمىن», دەدى سەنات توراعاسى.