پارلامەنت سەناتىنىڭ توراعاسى – سەزد حاتشىلىعىنىڭ باسشىسى ماۋلەن اشىمباەۆ الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءححى وتىرىسىنا قاتىسۋ ءۇشىن ەلىمىزگە كەلگەن ءدىن ليدەرلەرىمەن بىرقاتار ەكىجاقتى كەزدەسۋ وتكىزدى. كەزدەسۋلەردە تاراپتار دىنارالىق جانە كونفەسسياارالىق ديالوگتى ودان ءارى دامىتۋ ماسەلەلەرىن تالقىلادى.
كاۆكاز مۇسىلماندارى ءدىني باسقارماسىنىڭ توراعاسى شەيح-ۋل يسلام اللاشۇكىر پاشازادەمەن كەزدەسۋ بارىسىندا ماۋلەن اشىمباەۆ اتالعان ءدىني باسقارمانىڭ سەزد ماقساتتارىنا قول جەتكىزۋگە ايتارلىقتاي ۇلەس قوسقانىن تىلگە تيەك ەتتى. سونداي-اق ول ازەربايجان قازاقستاننىڭ ستراتەگيالىق سەرىكتەستەرىنىڭ ءبىرى ەكەنىنە نازار اۋداردى. باۋىرلاس ەكى ەل اراسىنداعى ىنتىماقتاستىقتىڭ نىعايۋىنا, ەڭ الدىمەن, مەملەكەت باسشىلارىنىڭ جوعارى دەڭگەيدەگى ءوزارا قارىم-قاتىناسى ىقپال ەتىپ كەلە جاتقانى دا ايتىلدى.
ء«بىزدىڭ ەلدەرىمىز بەن حالىقتارىمىزدى عاسىرلارمەن ولشەنەتىن بەرىك دوستىق, ورتاق تاريح, ءداستۇر جانە مادەنيەت بايلانىستىرادى. قازاقستان ءسىزدىڭ ەلدىڭ بارلىق جەتىستىگىن ءاردايىم شىنايى قۋانىشپەن قابىلدايدى. بىلتىر ءبىز ەكى ەل اراسىنداعى ديپلوماتيالىق قارىم-قاتىناستىڭ 30 جىلدىعىن اتاپ وتتىك. وسى جىلدار ىشىندە كوپتەگەن سالادا مەملەكەتارالىق ىنتىماقتاستىق نىعايا ءتۇستى. بۇعان ەكى ەلدىڭ پرەزيدەنتتەرى قاسىم-جومارت كەمەل ۇلى توقاەۆ پەن يلحام گەيدار ۇلى اليەۆتىڭ تۇراقتى بايلانىستارى مەن ۋاعدالاستىقتارى ىقپال ەتكەنى ءسوزسىز. وسى ورايدا دىنارالىق ديالوگتى دامىتۋ جۇمىستارىن دا بىرلەسىپ جالعاستىرۋدىڭ ماڭىزى زور دەپ ەسەپتەيمىن», دەدى سەزد حاتشىلىعىنىڭ باسشىسى.
قاسيەتتى تاقتىڭ دىنارالىق ديالوگى جونىندەگى ديكاستەرياسى يسلام ماسەلەلەرى بيۋروسىنىڭ باسشىسى مونسەنور حالەد اكاشەمەن كەزدەسۋدە ماۋلەن اشىمباەۆ سەزد حاتشىلىعى مەن قاسيەتتى تاقتىڭ ءوزارا ءىس-قيمىل پەرسپەكتيۆالارىنا نازار اۋداردى.
ء«بىز سەزگە تۇراقتى تۇردە جانە بەلسەندى قاتىسىپ كەلە جاتقانىڭىز ءۇشىن, سونداي-اق فورۋمنىڭ ماقساتتارىنا قول جەتكىزۋگە قاسيەتتى تاقتىڭ ەلەۋلى ۇلەس قوسقانىنا ريزاشىلىعىمىزدى بىلدىرەمىز. ۆاتيكاننىڭ بەيبىتشىلىكتى ساقتاۋ, مادەنيەتتەر مەن دىندەر اراسىنداعى ديالوگتى دامىتۋ جونىندەگى قىزمەتىن ءاردايىم جوعارى باعالايمىز. ريم پاپاسى فرانتسيسكتىڭ بىلتىر قىركۇيەكتە قازاقستانعا جاساعان اپوستولدىق ساپارى ەكىجاقتى قارىم-قاتىناس تاريحىنداعى ماڭىزدى وقيعالاردىڭ ءبىرى بولدى», دەدى ماۋلەن اشىمباەۆ.
سەزد حاتشىلىعى ءدىن كوشباسشىلارىمەن عانا ەمەس حالىقارالىق ۇيىمدارمەن دە ءوزارا ءىس-قيمىلعا باسا ءمان بەرىپ كەلەدى. سەنات توراعاسى دۇنيەجۇزىلىك يسلام ليگاسى باس حاتشىسىنىڭ ورىنباسارى, دوكتور ابدۋراحمان ابدۋللا ءال-زايدپەن كەزدەسۋدە وسى باعىتتاعى باستامالاردىڭ ماڭىزدىلىعىنا توقتالدى.
«قازاقستان دۇنيەجۇزىلىك يسلام ليگاسىنىڭ دىنارالىق جانە كونفەسسياارالىق ديالوگتى دامىتۋ جونىندەگى قىزمەتىن ءاردايىم جوعارى باعالايدى. ءبىز دۇنيەجۇزىلىك يسلام ليگاسىن بەيبىتشىلىككە شاقىراتىن ساياساتتى جاقتاۋشى جانە جاھاندىق دىنارالىق ديالوگكە بەلسەندى قاتىسۋشى ۇيىم رەتىندە تانيمىز», دەدى پالاتا سپيكەرى.
سونىمەن قاتار سەزد حاتشىلىعىنىڭ باسشىسى ءال-ازھاردىڭ يسلام زەرتتەۋلەرى اكادەمياسىنىڭ باس حاتشىسى نازير مۇحاممەد ەلنازير ايادپەن كەزدەستى. كەزدەسۋدە الەمدىك جانە ءداستۇرلى دىندەر كوشباسشىلارى سەزى اياسىنداعى ىنتىماقتاستىقتى ودان ءارى كەڭەيتۋ ماسەلەلەرى ءسوز بولدى.
ء«ال-ازھار – دۇنيەجۇزىندەگى ەڭ كونە جانە مۇسىلمان الەمىندەگى بەدەلدى ءدىني جوعارى وقۋ ورىندارىنىڭ ءبىرى. قازاقستاندىق ستۋدەنتتەردى وقىتۋ باعىتىندا كورسەتكەن كومەگى ءۇشىن ءال-ازھارعا العىسىمىزدى بىلدىرەمىز. الماتىداعى «نۇر-مۇباراك» مىسىر يسلام مادەنيەتى ۋنيۆەرسيتەتى ءبىزدىڭ ماڭىزدى ورتاق جوبامىز ەكەنى بەلگىلى. سونداي-اق ءبىز ءال-ازھاردىڭ جوعارعى يمامى شەيح احمەد ات-تايەبتىڭ بىلتىر الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسقانىن جوعارى باعالايتىنىمىزدى اتاپ وتكىم كەلەدى», دەدى ماۋلەن اشىمباەۆ.
ءدىن كوشباسشىلارى ءوزارا قولداۋ كورسەتىپ, ىنتىماقتاسا ارەكەت ەتسە, ادامزات قازىرگى جاھاندىق سىن-قاتەرلەردى ءتيىمدى ەڭسەرە الادى. مۇسىلمان اقساقالدار كەڭەسىنىڭ باس حاتشىسى مۇحاممەد ابدەلسالاممەن كەزدەسۋدە ماۋلەن اشىمباەۆ وسى ماسەلەگە ەرەكشە نازار اۋداردى. سونداي-اق سۇحبات بارىسىندا دىندەر كوشباسشىلارى سەزىنىڭ اتالعان ۇدەرىستەگى ءرولى كەڭىنەن تالقىلاندى.
ءوز كەزەگىندە مارتەبەلى مەيماندار ءىس-شاراعا شاقىرعانى ءۇشىن سەزد حاتشىلىعىنىڭ باسشىسى ماۋلەن اشىمباەۆقا العىستارىن ءبىلدىردى جانە فورۋمدى وتكىزۋ الەمدىك قوعامداستىق ءۇشىن ماڭىزدى ەكەنىن ايتتى. سونداي-اق ءدىن ليدەرلەرى الەمدە بەيبىتشىلىكتى ساقتاۋعا, قاۋىپسىزدىك پەن تۇراقتىلىقتى نىعايتۋعا ارنالعان جۇمىستى ودان ءارى ارتتىرۋعا مۇددەلى ەكەندەرىن جەتكىزدى.
كەزدەسۋلەردىڭ قورىتىندىسى بويىنشا سۇحباتتاسۋشىلار ەكىجاقتى بايلانىستىڭ اۋقىمدى ماسەلەلەرىنە كوڭىل ءبولىپ, ىنتىماقتاستىقتى ءارى قاراي نىعايتۋدىڭ باسىم باعىتتارىن بەلگىلەدى.