ەل پرەزيدەنتى ماقۇلداپ, ۇكىمەت بەكىتكەن « ۇلىتاۋ وبلىسىن الەۋمەتتىك-ەكونوميكالىق دامىتۋدىڭ 2022-2026 جىلدارعا ارنالعان كەشەندى جوسپارى» اياسىندا كوزدەلگەن ءىس-شارالاردىڭ ءبىرى – وبلىس ورتالىعىنىڭ ەلىمىزدىڭ باسقا وڭىرلەرىمەن اۋە جولى ارقىلى بايلانىسىن قامتاماسىز ەتۋ بولاتىن. بۇعان دەيىن قالىپتاسقان استانا, الماتى, قاراعاندى قالالارىمەن اۋە ارقىلى قاتىناس قاتارىنا ەندى شىمكەنت قالاسى دا قوسىلدى.
ويتكەنى 11 قازاننان باستاپ «شىمكەنت – جەزقازعان – شىمكەنت» باعىتى بويىنشا اۋە رەيسى «QAZAQ AIR» اۋە كومپانياسىنىڭ كانادالىق «De-Havilland Dash 8-Q400» زامانۋي ۇشاعى ارقىلى ازىرگە اپتاسىنا ەكى رەت, سارسەنبى, جەكسەنبى كۇندەرى قاتىنايتىن بولادى.
بۇل باعىتتى وبلىس اكىمدىگى بيۋدجەت قارجىسى ەسەبىنەن سۋبسيديا جاساۋ ارقىلى جۇزەگە اسىرادى.
– بيلەت قۇنى 15 مىڭ تەڭگە بولىپ بەلگىلەندى. 14 جاسقا تولماعان بالالار ەلۋ پايىز جەڭىلدىكتى پايدالانا الادى. ءبىزدىڭ ويىمىزشا بۇل – قالتاعا سالماق تۇسىرمەيتىن باعا, – دەيدى ۇلىتاۋ وبلىسى جولاۋشىلار كولىگى جانە اۆتوكولىك جولدارى باسقارماسىنىڭ ءبولىم باسشىسى ەرنۇر ەدىلباەۆ.
بۇرىن ۇلىتاۋ جاقتان شىمكەنتكە تىكەلەي اۆتوكولىك تە, پويىز دا قاتىناماعانىن ەسكەرسەك, باراتىن جەرگە بار-جوعى 1 ساعات 40 مينۋتتا زىر ەتكىزەتىن ۇشاقتىڭ بيلەت باعاسى شىنىندا دا قىمبات دەۋگە كەلمەيدى.
الداعى ۋاقىتتا جەزقازعان اۋەجايىنان سان باعىتقا ۇشاتىن ۇشاقتار كوبەيە تۇسپەك. ويتكەنى قازىر وبلىس باسشىلىعى حالىق سۇرانىسىنا سايكەس وسكەمەن, بالقاش, اقتاۋ قالالارىنا اۋە قاتىناسىن جولعا قويۋ ماسەلەسى رەتتەۋ باعىتىندا جۇمىس ىستەپ جاتىر.
ۇلىتاۋ وبلىسى