ىلە جانە جوڭعار الاتاۋىنىڭ جەر بەدەرى مەن الاكول, بالقاش كولدەرى, قاپشاعاي سۋ قويماسى, ىلە وزەنى, تاعى باسقا ءتىرى تابيعات ەسكەرتكىشتەرى, قايتالانبايتىن فلوراسى مەن فاۋناسى, اشىق اسپان استىنداعى كەسەنەلەر ءتۋريزمدى دامىتۋعا قولايلىلىعىمەن كوپشىلىك نازارىن اۋدارادى. وسى قۇندىلىقتار قاتارىندا شارىن مەملەكەتتىك ۇلتتىق تابيعات پاركى ەل ۇكىمەتىنىڭ قاۋلىسىمەن 6 جىلدان بەرى ءوز جۇمىسىن جالعاستىرىپ كەلەدى. ۇلتتىق تابيعات پاركى تۋريزمدى دامىتۋ مەن عىلىمي جۇمىس ءجۇرگىزۋدە دە ماڭىزدىلىعىمەن ەرەكشەلەنەدى. دەمەك, ونى جۇيەلەۋ مەن پايدالانۋ – اسا قاجەت ۇدەرىس. تابيعات پاركىنىڭ بۇگىنى مەن ەرتەڭى جانە جوعارىداعى ماسەلەلەردىڭ قولعا الىنۋى كىمدى بولسا دا ويلاندىراتىنى انىق.
“ەگەمەن قازاقستاننىڭ” الماتى وبلىسىنداعى ءتىلشىسى كۇمىسجان بايجان وسى ماسەلەگە وراي اتالعان ۇلتتىق تابيعات پاركىنىڭ باس ديرەكتورى توقتام بەكتەمىسوۆكە:
– ءسىز بۇعان نە دەيسىز؟
– شارىن مەملەكەتتىك ۇلتتىق تابيعات پاركىنىڭ اۋماعى 127 050 گەكتار جەردى الىپ جاتسا, ونىڭ 5 014 گەكتارىن سارتوعاي, ەرەنتوعاي ەرەكشە قورعالاتىن تابيعات ەسكەرتكىشى قۇرايدى. پارك اۋماعىن سيرەك كەزدەسەتىن ەلىك, قاسقىر, تۇلكى, بورسىق, قابان ءتارىزدى ءسۇت قورەكتىلەردىڭ 24 ءتۇرى مەكەندەيدى. سونداي-اق, ەلىمىزدەگى “قىزىل كىتاپقا” ەنگەن بۇركىت, يتەلگى, ەنبەگەن قىرعاۋىل, كەكىلىك, ءشىل, تاعى باسقا اڭدار مەن قۇستار, ءتىپتى باۋىرىمەن جورعالاۋشىلاردىڭ ونداعان ءتۇرى بار. شارىن شاتقالىنىڭ, ياسەن توعايىنىڭ, بۇعىتى تاۋىنىڭ الاتىن ورنى مەن ەرەكشەلىكتەرى وسىنداي قۇندىلىقتارىمەن تانىمال. مۇندا تۋريزم جاقسى دامىعاندىقتان, وسىناۋ ەل بايلىعىن دۇرىس پايدالانىپ, قورعاۋ, ەڭ باستىسى زاڭناما شەڭبەرىندە ارەكەت ەتۋ ۇجىمنان جاۋاپكەرشىلىكتى تالاپ ەتەتىنى ايتپاسا دا تۇسىنىكتى.
ۇلتتىق باق اۋماعىنداعى تابيعات-انانىڭ تاڭعاجايىپ ەسكەرتكىشىن, ونىڭ بايلىعىن قورعاپ قانا قويماي, زەرتتەۋدى جالعاستىرۋ ماقساتىنداعى عالىمداردىڭ عىلىمي جۇمىس جۇرگىزۋىنە دە كەڭىنەن جول اشىلعان. وسىلايشا قازىر بولماسا دا اراعا ءبىراز جىل سالىپ, جوعالىپ كەتۋ قاۋپى بار وسىمدىكتەردى, جانۋارلاردى, قۇستاردى ساقتاپ قالۋدا, بولە-جارا كۇتىمگە الۋدا 46 قىزمەتكەر ۋاقىتپەن ساناسپاي ەڭبەك ەتىپ, بايلانىستارىن نىعايتا تۇسۋدە. عالىمدار ەرەنتوعايدىڭ وزگەرىستەرى تاقىرىبىنداعى جۇمىس اۋقىمىن كەڭەيتۋدە.
تابيعاتپەن سىرلاسا ءبىلىپ, باقتاعى اڭ مەن جانۋارلاردىڭ تابيعي جولمەن ءوسىپ-وركەندەۋىنە مۇمكىندىك تۋدىرىلعان. جاز ايلارىندا ۇلتتىق تابيعات باعىنا كەلىپ, ونىڭ اسەمدىگىنەن ءنار الاتىن تۋريستەر قاتارى دا ءوسىپ وتىر. تەك وتكەن جىلى مۇندا 3000-نان استام ساياحاتشىلار مەن تابيعات جاناشىرلارى كەلىپ, تابيعاتتىڭ اسەمدىگىمەن ءنارلەندى. باردىڭ باعاسىن ءبىلىپ, ونىڭ بايلىعىن كەلگەندەردىڭ نازارىنا ۇسىنۋ دا ۇجىمداعى قىزمەتكەرلەردىڭ كاسىبي بىلىكتىلىگىنە بايلانىستى دەسەك, جىل سايىن شارىن شاتقالىنا, ياسەن توعايىنا اتباسىن بۇراتىندار قاتارى مولىعۋدا. ەكسكۋرسيالار, تۋرلار وتكىزىلىپ, تاۋعا شىعۋ, مادەني-تانىمدىق ساپارلار جالعاستىرىلىپ, تابيعات پاركىنىڭ كەلەشەگىنە دەگەن سەنىم قالىپتاسقانىن ايتۋعا بولادى.
الماتى وبلىسى.