قاۋىپسىزدىك ماقساتىندا كوپتەگەن حالىقارالىق اۋەكومپانيالار تەل-اۆيۆكە جانە وسى قالادان ۇشاتىن رەيستەردى توقتاتا تۇرۋىنا قاراماستان, Air Astana اۋەكومپانياسى ۇشۋعا نيەت بىلدىرگەن جولاۋشىلاردى تاسىمالداۋدىڭ بالاما نۇسقالارىن ىزدەستىرۋدى جالعاستىرىپ جاتىر, دەپ حابارلايدى Egemen.kz اۋە كومپانياسىنىڭ ءباسپاسوز قىزمەتىنە سىلتەمە جاساپ.
«تەل-اۆيۆتەن الماتىعا جوسپارلانعان كس650 رەيسىنە 138 جولاۋشى بيلەت العان, ونىڭ ىشىندە 37-ءسى قازاقستان ازاماتى. 7 وتانداسىمىز Air Astana ينتەرلاين-سەرىكتەس اۋەكومپانيانىڭ رەيسىنە قايتا بروندالىپ, 19 ادام بيلەت قۇنىن تولىق قايتارۋدى تاڭداسا, 3 جولاۋشى ءوز شەشىمىن ءالى ويلاستىرۋدا. سونداي-اق اۋەكومپانيا الماتى-تەل-اۆيۆ باعىتى بويىنشا ورىندالماي قالعان كس649 رەيسىندەگى شەتەلدىك جولاۋشىلارىنا بيلەتتەردى قايتا برونداۋعا جاردەم كورسەتتى. جولاۋشىلاردىڭ قالاۋىنا سايكەس تۇركيا مەن گرۋزياعا ۇشۋعا بالاما بەرىلدى. Air Astana يزرايلدەگى قازاقستان ەلشىلىگى اشقان WhatsApp چاتىندا كەڭەس بەرىپ, قولداۋ كورسەتۋ ءۇشىن ارنايى قىزمەتكەرىن تاعايىندادى.
يزرايلگە ءھام يزرايلدەن ۇشۋعا قاتىستى ماسەلەلەر بويىنشا تاۋلىك بويى قىزمەت ەتەتىن جەدەل جەلى ىسكە قوسىلدى: +7 (727) 244 44 78, +7 702 702 0074 (WhatsApp). اۋەكومپانيا يزرايلدەن ۇشۋعا نيەت بىلدىرگەن بارلىق وتانداستاردىڭ ورالۋىن قامتاماسىز ەتۋ ءۇشىن بار كۇشىن سالىپ جاتىر», دەلىنگەن حابارلامادا. اۋە كومپانياسى جولاۋشىلارعا قاۋىپسىزدىكتى قاتاڭ ساقتاپ, اقپاراتتاردى مۇقيات قاداعالاپ وتىرۋدى ەسكەرتتى.