پارلامەنت ءماجىلىسىنىڭ جالپى وتىرىسىندا دەپۋتات قازىبەك يسا ءدىني راديكاليزممەن مەملەكەت بولىپ كۇرەسپەسە, ۇلتقا وراسان قاتەر تونەتىنىن ايتىپ, پرەمەر-ءمينيستردىڭ اتىنا ساۋال جولدادى, دەپ حابارلايدى Egemen.kz.
ء«دىني راديكاليزمگە زاڭمەن قاتاڭ تىيىم سالاتىن كەز جەتتى! ويتكەنى ولار ۇلتتى جويۋ كۇرەسىن قاتاڭ دا قاتتى قارقىنمەن جالعاستىرىپ جاتىر. «اق جول» پارتياسى پارلامەنتتە تالاي جىلدان بەرى ءدىني تەرىس اعىمدارعا قاتاڭ توسقاۋىل قوياتىن زاڭ قابىلداۋدى ۇسىنىپ كەلەمىز. تاۋەلسىز زايىرلى مەملەكەت قۇرۋ – الاشتىقتار ايقىنداعان جول! ءدىني راديكاليزمگە زاڭمەن تىيىم سالۋ كەرەكتىگى تۋرالى ءبىز, «اق جول» پارتياسى 2022 جىلى 26 قاڭتاردا قاڭتار قاسىرەتى شىندىعىن اشىق ايتۋ, پارلامەنتتىك تىڭداۋ جاساۋ تۋرالى پارلامەنتتە العاش كوتەرگەندە دە, كەيىن 14 ناۋرىزدا سول تىڭداۋ وتكەن, ماجىلىسكە باس پروكۋرور باستاپ كەلگەن قۇزىرلى ورگانداردىڭ ەسەبىندە دە, ەكى رەت جاساعان دەپۋتاتتىق ساۋالىمىزدا اتاپ ايتساق تا بىراق ءالى ناتيجە جوق. ء«دىنى باردا, ۇلتى جوق, ساقالى بار دا, مۇرتى جوق, ەل تۇبىنە سول جەتەر!» دەپ ءبىر عاسىر بۇرىن مۇرتسىز ساقالدىلاردان ساقتاندىرىپ جىر جازعان ءماشھۇر ءجۇسىپ اۋليە شىنىندا دا كورەگەن ەكەن. قازىرگى شەت ەلگە بارىپ, كۇماندى وقۋلاردا بىرنەشە اي وقىپ كەلىپ, جەلىدە جەلپىنىپ ءدارىس وقيتىن, تەرىس ۋاعىز ايتاتىن تەرىس اعىمدى «ۇستازدار» ۇلىلارىمىزدان ارتىق, اقىلى اسىپ, ءبىلىمى تاسىپ كەلگەندەر مە؟ ەڭ قاسيەتتى بولىپ سانالاتىن اسىل ءدىنىمىز يسلامدى ەڭ قاۋىپتى اعىمعا اينالدىرۋ ءۇشىن بارىن سالىپ جاتقاندار قازىر قايتا كۇشەيىپ كەلەدى. دىنگە, تىلگە, جەرگە قارسى ەلبۇزار تەرىس اعىمداردىڭ ءبارىن زاڭمەن توسقاۋىل قويىلۋى ءتيىس! ەل ءۇشىن ەڭ قىمبات – ۇلتقا, ادام ءۇشىن ەڭ اياۋلى – اكە-شەشەگە, قازاققا ەڭ ادال دومبىراعا قارسى شىققان حارام پيعىلدىلاردىڭ ەركىن تاراپ جاتقان ەل تۇبىنە جەتەر قاۋىپتى ۆيرۋسىن زاڭمەن شۇعىل توقتاتاتىن كەز جەتتى», دەدى ق.يسا.
تومەنگى پالاتا دەپۋتاتى ۇلتتىق مۇرات-مۇددەگە, ەلدىڭ ىنتىماق-بىرلىگىنە ىرىتكى سالۋدى كوزدەيتىن ءدىني تەرىس اعىم وكىلدەرىنىڭ تىرلىگىنە زاڭمەن تىيىم سالماسا بولمايتىنىن ەسكەرتتى.