قارتتار كۇنى – اعا بۋىنعا ريزاشىلىعىمىزدى ءبىلدىرىپ, شىنايى كوڭىل بولۋىمىزگە مۇمكىندىك بەرىپ قانا قويماي, ولاردىڭ قاجەتتىلىكتەرىنە نازار اۋدارۋعا جاقسى سەبەپ. قاريالاردى قولداۋ, ولارعا قامقورلىق كورسەتۋ – اعا بۋىنعا كورسەتكەن پارىزىمىزدىڭ از عانا بولىگى. وسى ورايدا «ارداگەرلەر ۇيىمى» رەسپۋبليكالىق قوعامدىق بىرلەستىگى جىلداعى ءداستۇرى بويىنشا «قارتتارعا قامقورلىق» اكتسياسىن ۇيىمداستىرىپ وتىر.
مەملەكەتىمىز قارت ادامدارعا دەگەن قامقورلىقتى ەكونوميكالىق داعدارىس كەزىندە دە توقتاتقان ەمەس. دەگەنمەن ەلىمىزدە ءالى دە بولسا الەۋمەتتىك كومەككە مۇقتاج ەگدە تارتقان ادامدار بار. ارداگەرلەر ۇيىمى وسىنداي قاريالاردى نازاردان تىس قالدىرماي, جان-جاقتى قولداۋ كورسەتۋگە ۇندەپ وتىر.
«كەيبىر قاريالار جاسى ۇلعايعان شاعىندا جان جىلۋى مەن مەيىرىمگە ءزارۋ. بارلىق ازاماتتى, جۇمىس بەرۋشىلەردى, بيزنەس قۇرىلىم وكىلدەرىن اعا بۋىننىڭ ەل يگىلىگىنە قوسقان ەسەلى ەڭبەگىن ۇلىقتاۋعا, «قارتتارعا قامقورلىق» ايلىق اكتسياسىنا اتسالىسۋعا شاقىرامىز. رەسپۋبليكامىزداعى اتقارۋشى ورگانداردى, جۇمىس بەرۋشىلەردى, بيزنەس قۇرىلىمدارىن, ەرىكتىلەردى, قاريالارعا, اسىرەسە مۇگەدەك ارداگەرلەرگە, جالعىز ىلىكتى زەينەتكەرلەرگە, از قامتىلعان قارتتارعا ارنايى كوڭىل بولۋگە ۇندەيمىز. ولارعا ماتەريالدىق تۇرعىدان قولۇشىن سوزۋعا, الەۋمەتتىك-تۇرمىستىق جاعدايلارىنا قولداۋ كورسەتۋلەرىڭىزدى سۇرايمىز. ءوز ەلىنىڭ پاتريوتى رەتىندە اكتسياعا بەيجاي قارامايتىن ازاماتتار جەرگىلىكتى اكىمدىكتەرمەن, وڭىرلىك ارداگەرلەر كەڭەستەرىمەن بايلانىسقا شىعىپ, ۇلەس قوسادى دەگەن ۇمىتتەمىز», دەلىنگەن اتالعان ۇيىمنىڭ حابارلاماسىندا.