وسىدان ءبىراز بۇرىن بەيتانىس جاننان ەستىگەن ءسوز تەرەڭ ويعا جەتەلەپ, كوپكە دەيىن قۇلاقتان كەتپەي قويدى.
...ادەتتەگىدەي اپتانىڭ العاشقى جۇمىس كۇندەرىنىڭ ءبىرى, تاڭەرتەڭگىلىك مەزگىل بولاتىن. ءىرى مەگوپوليس شىمقالاعا اۋىلدان كەلىپ, الدەبىر شارۋانىڭ ىڭعايىمەن كەڭسەگە شىققان بەتىم ەدى. اۆتوبۋس ايالداماسىنان ءتۇسىپ, اياقجولمەن اسىعا باسىپ كەلە جاتقانمىن. كەنەت ءبىر بەيتانىس جىگىت الدىمدى كەس-كەستەي بەردى. بۇرىن كورمەگەن ادامىم, ونىڭ ۇستىنە اماندىق-ساۋلىق جوق, بىردەن «شارۋاسىنا» كوشسىن:
«برات ء(دال وسىلاي دەدى), قازاقپىز عوي, وسى قازىر عانا ايىقتىرعىشتان شىققان بەتىمىز. قىسقاسى, باس اۋىرىپ تۇر, شاقاسىن بەرە سال دا, جولىڭنان قالماي كەتە بەرسەڭ بولادى».
دورەكى ازاماتتىڭ توسىن قىلىعى سەكەم الدىرعانداي ەدى. تۇرىنە كوز سالىپ, ەندى عانا بايقادىم: ساقال-شاشى ءوسىپ, بەت-اۋزى دومبىعىپ ءىسىپ كەتكەن جاننىڭ اۋزىنان شىققان جاعىمسىز ءيىس قولقانى قابادى. ويلانىپ ۇلگەرگەنىمشە بولعان جوق, تۋ سىرتىمنان تاعى دا: «چە تام؟» دەگەن داۋىس شىقتى. ەڭگەزەردەي بىرەۋ, ءسىرا, الگىنىڭ سەرىگى بولسا كەرەك, ءاي-شاي جوق, جاقىنداپ كەلىپ: «نە, بىردەڭە بەردى مە؟» دەدى جولداسىنا سۇراۋلى جۇزبەن قاراپ. اناۋ باسىن شايقادى بىلەم, «وندا اناۋ دۇڭگىرشەكتەن ءبالىش الىپ بەرسىن», دەدى وكتەم سويلەپ. بولسا دا اسىعىپ تۇرعان باسىم «بوتەن ەمەس, قازاقتىڭ جىگىتتەرى – باۋىرلارىم عوي» دەگەن ويمەن ايتقانىنا كونۋدەن باسقا امالىم قالماعان. «بالەدەن ماشايىق, قاشىپتى» دەگەندەي, قولىنداعىسىن قاربىتا اساپ تۇرعان «ەكى داۋدەن» قۇتىلعانشا اسىقتىم...
مىنا قىرسىقتى قويساڭىزشى, ءوزى اسىعىپ كەلە جاتقان مەنى جولدا تاعى ءبىر «كليەنت» توقتاتتى. قايتا ىنسابى بار جان ەكەن, ازىن-اۋلاق تيىن-تەبەن سۇراعانى بولماسا, جولدان قالدىرا قويمادى.
حوش دەڭىز, سونىمەن ءبىر كۇندە ەكى بىردەي كەلەڭسىز جايعا تاپ بولعان پاقىرىڭىز ۇنجىرعاسى ءتۇسىپ, اۋىر وي ارقالاپ قايتتى.
مۇمكىن بۇل بىرەۋلەر ءۇشىن ۇيرەنشىكتى جايت تا شىعار. الايدا ونىڭ وسى باستان الدىن الماساق, كەيىن كەش بولادى. مەن بۇل جەردە قايىرشىلاردى ايتىپ وتىرعان جوقپىن. اياق-قولى بالعاداي, تەپسە تەمىر ۇزەتىن, ەڭبەككە جارامدى, ەڭگەزەردەي قازاقتىڭ كەيبىر جىگىتتەرىنىڭ جۇمىس ىستەگىسى كەلمەي, ونىڭ ۇستىنە, ىشكىلىككە سالىنىپ, كوشەدە اركىمگە قول جايىپ تۇرۋى – ۇيات تىرلىك.
نەسىن جاسىرامىز, قازىر قوعامىمىزدا اۋىردىڭ استىمەن, جەڭىلدىڭ ۇستىمەن جۇرگىسى كەلەتىندەردىڭ, وڭاي ولجامەن مال تاپپاققا اۋەستەنۋشىلەردىڭ قاتارى ارتىپ بارا جاتىر. وعان جوعارىدا اڭگىمە ەتكەن ماسىلدىق پيعىلدى قوسىڭىز.
بارشاعا ءمالىم, مەملەكەت باسشىسى بيىلعى جولداۋىندا ەڭبەكتىڭ قادىر-قاسيەتىن ۇعىنۋ, ەڭبەكقورلىقتىڭ قۇندىلىققا, ۇلت سيپاتىنىڭ اسىل قاسيەتىنە اينالۋى قاجەتتىگى جونىندە قاداپ ايتقان بولاتىن. حاكىم اباي اتامىز دا ءوزىنىڭ قاراسوزىندە ەڭبەكتىڭ نە ەكەنىن, تابان اقى, ماڭداي تەردىڭ پايداسىن سانامىزعا قۇيىپ كەتتى. سونى ۇعارعا پايىم مەن پارىق كەرەك.
كارىباي امزە ۇلى,
زەينەتكەر
تۇركىستان وبلىسى,
سوزاق اۋدانى