«Bolashaq» حالىقارالىق ستيپەندياسى ستيپەندياتتارىنىڭ قاۋىمداستىعى 20 جىلدان استام تاريحى بار ەلىمىزدەگى ەڭ تابىستى قوعامدىق ۇيىمداردىڭ ءبىرى جانە الەمنىڭ جەتەكشى جوعارى وقۋ ورىندارىن پرەزيدەنتتىك ستيپەنديامەن بىتىرگەن 14 مىڭنان استام ستيپەندياتتىڭ مۇددەسىن قورعايدى.
2001 جىلدان باستاپ قاۋىمداستىق مۇشەلەرى قازاقستان رەسپۋبليكاسىندا ءبىلىم بەرۋ, كاسىپكەرلىكتى قولداۋ, قازاق ءتىلىن دامىتۋ سالاسىندا 150-دەن استام ءىرى الەۋمەتتىك جوبالاردى ىسكە اسىردى. العاش رەت 2021 جىلى قاۋىمداستىق توراعاسى مەملەكەتتىك قىزمەتشىلەر قاتارىنان سايلانعان جوق, ال قاۋىمداستىق كەڭەسىنە جەكە بيزنەس پەن اكادەميا وكىلدەرىنەن قۇرالعان جاڭا كوماندا كەلدى.
قازىر «بولاشاق» باعدارلاماسىنىڭ تۇلەكتەرى ءارتۇرلى سالالاردان جانە ءارتۇرلى جاس ساناتتارىنان قۇرالادى, سوندىقتان تۇلەكتەردى بىرىكتىرۋ ماقساتىندا قىزىعۋشىلىق كلۋبتارىن قۇرۋ يدەياسى پايدا بولدى. 10-نان استام كلۋب قۇرىلىپ, ولار ءوز جوبالارى مەن كومانداسى بار شاعىن ۇيىمدار رەتىندە جۇمىس ىستەي باستادى. ماسەلەن, «Bolashaq Medicine Club» مەديتسينالىق كلۋبتىڭ ۇزدىك وكىلدەرى دەمالىس كۇندەرى شالعاي اۋىلداردى ارالاپ, ناۋقاستاردى تەگىن قابىلدايدى.
وزگە قوعامدىق بىرلەستىكتەردەن ايىرماشىلىعى, قاۋىمداستىق حاتشىلىعى fulltime رەجيمدە جۇمىس ىستەيدى, ال كەڭەس مۇشەلەرى, قاۋىمداستىق مەملەكەتتىك الەۋمەتتىك تاپسىرىستار مەن گرانتتار ەسەبىنەن قارجىلاندىرىلماۋى كەرەك دەپ شەشتى, بۇعان 2021 جىلدىڭ سوڭىنان باستاپ قول جەتكىزىلدى. گارۆارد تۇلەكتەرىنىڭ قاۋىمداستىعى جاقسى ۇلگى, مىسالى, بوستون فيليالى 100 جىلدان استام جۇمىس ىستەيدى. گارۆارد بيزنەس مەكتەبىنىڭ تۇلەكتەرى جىل سايىنعى ۆەنچۋرلىق كاپيتال بايقاۋىن وتكىزەدى, وعان جۇزدەگەن جوبالار قاتىسادى.
ءبىز جاڭا ستراتەگيا قابىلدادىق, ونىڭ نەگىزگى باعىتتارىنىڭ ءبىرى – كاسىپكەرلىكتى دامىتۋدى قولداۋ.
وسى جىلى بيزنەس-كلۋب قۇرىلدى, ونىڭ توراعاسى بولىپ بەلگىلى كاسىپكەر ماكسيم بوجكو سايلاندى, ول ۇنەمى كەزدەسۋلەر, برەينستورمينگتەر جانە Bolashaq Business Forum وتكىزەدى.
قاۋىمداستىق التى بيزنەس فورۋمدى ءساتتى وتكىزدى, وعان ەلدار ابدىرازاقوۆ, ارمانجان بايتاسوۆ, قانات كوپباەۆ, ايدان كارىبجانوۆ سىندى بەلگىلى بيزنەسمەندەر قاتىستى. ولار جەتىستىككە جەتۋدىڭ قىر-سىرىنا توقتالىپ, كاسىپكەرلىك تاجىريبەلەرىمەن ءبولىسىپ, جاستارعا ءوز ءىسىن اشۋعا كەڭەس بەردى.
بىراق قاۋىمداستىقتىڭ بيزنەس سالاسىنداعى ەڭ قىزىقتى ءارى تانىمال جوباسى – 2015 جىلدان بەرى جۇزەگە اسىرىلىپ كەلە جاتقان العاشقى قازاقستاندىق بيزنەس-يدەيالار جوباسى – Startup Bolashaq ستارتاپ جوبالار بايقاۋى.
Startup Bolashaq بايقاۋىنىڭ بارلىق كەزەڭىندە 15 مىڭعا جۋىق ءوتىنىم جينالدى. 1000-عا جۋىق جارتىلاي فيناليستەر ۇزدىك بيزنەس-جاتتىقتىرۋشىلارمەن, اكسەلەراتسيا باعدارلاماسىمەن جانە تالىمگەرلەردىڭ كومەگىمەن وقۋ ساباقتارىن اياقتادى. 100-دەن استام جوباعا 600 ملن تەڭگە ينۆەستيتسيا تارتىلدى.
سونىڭ ءبىر جارقىن ۇلگىسى – Startup Bolashaq بايقاۋىنىڭ ءبىرىنشى ماۋسىمىنىڭ ءفيناليستى ەلدوس بايالىشباەۆ الاكول كولى ماڭىندا مۇمكىندىگى شەكتەۋلى جاندارعا ارنالعان «اسار» پانسيوناتىن اشۋعا 8 ميلليون تەڭگە گرانت ۇتىپ الدى. قازىر «اسار» پانسيوناتىنا قازاقستاننىڭ, قىرعىزستاننان, وزبەكستاننان ەمدەلۋگە ادامدار كەلەدى.
دياس تاستانبەكوۆ بايقاۋدىڭ ەكى ماۋسىمىنا قاتىستى, بىراق ەكىنشى ماۋسىم ول ءۇشىن ءساتتى بولدى, ول ءوزىنىڭ «Zertis Agro» ەكوفەرما 4.0» جوباسىنا گرانت ۇتىپ الدى.
«ەكىنشى ماۋسىمدا مەن ەڭ سوڭعى كۇنى ءوتىنىش بەردىم, تاعى ءبىر رەت قايتالاپ كورۋ كەرەك دەپ شەشتىم. مەن جوبانى تۇجىرىمدامالىق تۇردە وزگەرتكەن جوقپىن, بىراق ونى ەگجەي-تەگجەيلى ازىرلەدىم. بۇل اەروپونيكا ادىسىمەن وسىمدىكتەردى توپىراقسىز ءوسىرۋ تۋرالى جوبا», دەيدى دياس.
2021 جىلى «Bolashaq» قاۋىمداستىعىنىڭ 20 جىلدىعىنا وراي, باس سەرىكتەسى «Alawar Partners» كومپانياسىمەن بىرلەسىپ Startup Bolashaq بيزنەس-جوبالار بايقاۋىنىڭ بەسىنشى ماۋسىمىن باستايتىنىن جاريالادى.
بايقاۋعا قاتىسۋعا قازاقستاننىڭ تۇكپىر-تۇكپىرىنەن 5000-عا جۋىق ءوتىنىم قابىلدانىپ, ونىڭ ىشىندە 21 بيزنەس-جوبا ىرىكتەلىپ, جارتىلاي فينالعا ءوتتى. وتىنىمدەردى ىرىكتەۋدىڭ باستاپقى كەزەڭىن قۇرامىندا بەلگىلى بيزنەسمەندەر, تاۋەلسىز ساراپشىلار, قارجى جانە بيزنەس قۇرىلىمدارىنىڭ وكىلدەرى بار كونكۋرستىق كوميسسيا جۇرگىزدى.
مەملەكەت كاسىپكەرلىكتى دامىتۋعا بەلسەندى تۇردە كومەكتەسەدى جانە گرانتتار تۇرىندەگى مەملەكەتتىك قولداۋ بيزنەستى قۇرۋ مەن دامىتۋعا ىقپال ەتەدى, بىراق ەكىنشى جاعىنان, ءونىمدى ەڭبەككە, باستاماشىلىق پەن دەربەستىك تانىتۋعا دەگەن ىنتاسىن تومەندەتەدى. سوندىقتان Startup Bolashaq بايقاۋىنىڭ بەسىنشى ماۋسىمىنان باستاپ گرانتتاردان باس تارتۋ تۋرالى شەشىم قابىلداندى.
Startup Bolashaq بايقاۋىنىڭ بەسىنشى ماۋسىمى بريتاندىق Dragons`Den جانە امەريكالىق Shark Tank رەاليتي-شوۋلارىنا ۇقساس ءوتتى. ونىڭ ينۆەستورلارىنىڭ ءبىرى اتاقتى ميللياردەر مارك كيۋبان. بۇل شوۋلاردا ستارتاپەرلەر بيزنەس-پەرىشتەلەر الدىندا وزدەرىنىڭ جوباسىن ۇسىنىپ, ينۆەستيتسيالاۋدى سۇرايدى.
فيناليستەر ناقتى ۋاقىت رەجيمىندە پيتچ-سەسسيالار جاساپ, شوۋ قاتىسۋشىلارى جوباعا قوسىلۋ پرينتسيپتەرىن, جوباداعى ۇلەستىڭ پايىزىنا جانە ينۆەستيتسيا كولەمىن كەلىسىپ الدى. فينالعا ون بيزنەس-جوبا ءوتتى.
جوبانىڭ بيزنەس - پەرىشتەلەرى رەتىندە بەلگىلى كاسىپكەرلەر بولدى. Freedom Holding Corp ينۆەستيتسيالىق توبىنىڭ نەگىزىن قالاۋشى تيمۋر تۋرلوۆ EasyTap ستارتاپىنا 50 000 دوللاردان استام, BOBO ستارتاپىنا 12 ميلليون تەڭگە جانە QazTracker ستارتاپىنا 50 000 دوللار ينۆەستيتسيالادى; Ordamed نەگىزىن قالاۋشى ەركىن دىلىمبەتوۆ Medical Software ستارتاپىنا 10 ميلليون تەڭگە ينۆەستيتسيالادى; Kusto Group كومپانياسىنىڭ تەڭ يەسى قانات كوپباەۆ Eco Cash back ستارتاپىنا 10 ميلليون تەڭگە ينۆەستيتسيالادى; «ISS Corporation LLP» حولدينگىنىڭ اكتسيونەرى ەرلان يسەكەشەۆ FocusEDnow ستارتاپىنا 50 000 دوللار ينۆەستيتسيالادى; نۇرعيسا جۇماعۇلوۆ, كاسىپكەر جانە K7 Group ديرەكتورى Smartestprep ستارتاپىنا 150 000 دوللار ينۆەستيتسيالادى; Alawwal Partners سەرىكتەسى قانىش تۋلەۋشين The Winner ستارتاپىنا 10 ميلليون تەڭگە ينۆەستيتسيالادى; Core Capital باسقارۋشى سەرىكتەسى نۇرلان اسىلبەكوۆ پەن «ITspace» جشس باس ديرەكتورى نۇرجان نۇرالباەۆ Medical Software ستارتاپىنا 10 ميلليون تەڭگە ينۆەستيتسيالادى.
Startup Bolashaq بايقاۋىنىڭ بەسىنشى ماۋسىمىنىڭ فيناليستەرى 200 ميلليون تەڭگەگە جۋىق ينۆەستيتسيا تارتتى. رەاليتي-شوۋ قازاقستاننىڭ جەتەكشى تەلەارنالارى مەن Telegram جەلىسىندە كورسەتىلىپ كەلەدى.
الماس قۇدايبەرگەن,
«Bolashaq» قاۋىمداستىعىنىڭ كەڭەس توراعاسى,
Centrasia Group باسقارماسىنىڭ توراعاسى