ماجىلىستە قازاقستان مەن كيپر قىلمىستىق ىستەر بويىنشا ءوزارا قۇقىقتىق كومەك كورسەتۋگە كەلىستى. 2022 جىلى قول قويىلعان قازاقستان مەن كيپر اراسىنداعى قىلمىستىق ىستەر بويىنشا قۇقىقتىق كومەك تۋرالى شارت بۇگىن جالپى وتىرىستا راتيفيكاتسيالاندى, دەپ حابارلايدى Egemen.kz تومەنگى پالاتانىڭ ءباسپاسوز قىزمەتىنە سىلتەمە جاساپ.
«قۇجاتتا كومەكتىڭ ءتىزىمى, كومەك بەرۋدەن باس تارتۋ نەگىزدەرى, قۇپيالىلىق تۋرالى شارتتار, ەكى تاراپتىڭ اۋماقتارىندا الىنعان مالىمەتتەردى نەمەسە دالەلدەمەلەردى پايدالانۋداعى شەكتەۋلەر ايقىندالعان. سونداي-اق قىلمىستىق قىزمەتتەن تۇسكەن زاتتاردى, قۇجاتتاردى, قارجى اكتيۆتەرىن جانە باسقا دا كىرىستەردى انىقتاۋ, تابۋ, شەكتەۋ قويۋ جانە تاركىلەۋ بويىنشا كومەك كورسەتۋ شارتتارى كورسەتىلگەن», دەپ جازىلعان.
شارتتى جۇزەگە اسىرۋ ارقىلى قازاقستان مەن كيپر قىلمىسقا قارسى كۇرەستە ىنتىماقتاستىقتى نىعايتا تۇسپەك.