مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ ۇيىمداستىرۋىمەن بيىل ەكىنشى رەت «ارحيۆ جانە بولاشاق ۇرپاق» جوباسى اياسىندا ەلىمىزدەگى بارلىق مەملەكەتتىك ارحيۆتەر مەن قولجازبالار جانە سيرەك كىتاپتار ۇلتتىق ورتالىقتارىندا اشىق ەسىك كۇنى ءوتتى. مادەني ءىس-شاراعا 15 مىڭنان استام ءجاسوسپىرىم قاتىستى.
بۇگىنگى تاڭدا رەسپۋبليكا بويىنشا بارلىعى 223 مەملەكەتتىك ارحيۆ جۇمىس ىستەيدى. ونىڭ ىشىندە 5-ەۋى رەسپۋبليكالىق. اتاپ ايتقاندا: ۇلتتىق ءارحيۆى, ورتالىق مەملەكەتتىك ءارحيۆى, ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆى, ورتالىق مەملەكەتتىك عىلىمي-تەحنيكالىق قۇجاتتاما ءارحيۆى جانە قولجازبالار مەن سيرەك كىتاپتار ۇلتتىق ورتالىعى.
«جوعارىداعى جوبانىڭ ماقساتى – وسكەلەڭ ۇرپاقتى اتا-بابالارىنىڭ تاريحى ءھام سالت-داستۇرىمەن تانىستىرىپ, وتانعا, تۋعان جەرگە دەگەن پاتريوتتىق سەزىمىن وياتۋ جانە عىلىمي-زەرتتەۋ جۇمىستارىنا ىنتالاندىرۋ, ارحيۆتىك قۇجاتتار مەن ارحيۆ سالاسىنىڭ تاريحي ماڭىزىن سەزىندىرۋ. ويتكەنى ارحيۆ دەرەك ساقتاۋشى مەكەمە رەتىندە ەلدىڭ زياتكەرلىك مەنشىگى مەن مادەني يگىلىگىنىڭ تۇتاستىعىن قامتاماسىز ەتەدى. سونداي-اق وتكەن, قازىرگى جانە بولاشاق كوكجيەكتەرىن بايلانىستىراتىن پلاتفورما», دەيدى ارحيۆ, قۇجاتتاما جانە كىتاپ ءىسى كوميتەتىنىڭ باسقارما باسشىسى يبرايم باباەۆ.
ءىس-شارا اياسىندا تاقىرىپتىق فوتوقۇجاتتىق ەكسپوزيتسيالار مەن كورمەلەر, ەكسكۋرسيالار, شىعارماشىلىق كەزدەسۋلەر جانە سيرەك كىتاپتاردى رەستاۆراتسيالاۋ جۇمىستارى, شەبەرلىك ساباقتارى وتكىزىلىپ, ارحيۆ جۇيەسى ماماندارىنىڭ قىزمەت كورسەتۋ جانە عىلىمي زەرتتەۋ جۇمىسىن جۇرگىزۋ ءىسى ناسيحاتتالدى. سونىمەن قاتار جاس كورەرمەنگە ارحيۆ ءىسىن بىرىڭعاي جەتىلدىرۋ, قوعامدىق اقپارات كوزدەرىنىڭ ىقپالىن ارتتىرۋ جولى ءارى ورتالىقتاندىرىلعان دەرەككوزىن پايدالانۋ ارەكەتى سياقتى زاماناۋي جۇمىستار تانىستىرىلدى.
اشىق ەسىك كۇنىنىڭ تابىستى وتۋىنە – بەلگىلى عالىمدار مەن ارحيۆ سالاسىنىڭ ماماندارى اتسالىسىپ, جاسوسپىرىمدەرگە ارحيۆتىك قۇجاتتاردى ساقتاۋ, رەستاۆراتسيا جاساۋ, كونە كىتاپتار مەن قولجازبالاردى اۋدارۋ, قۇندىلىعىن انىقتاۋ بويىنشا دارىستەر وتكىزدى.