الماتىداعى مەملەكەتتىك ورتالىق مۋزەيدە قازاق بالەت ونەرىنىڭ حاس شەبەرى, پەداگوگ, بالەتمەيستەر بولات ايۋحانوۆتىڭ تۋعانىنا 85 جىل تولۋىنا ارنالعان «مەنىڭ بالەتىم» اتتى كورمە اشىلدى.
ەل كولەمىندە اتالىپ جاتقان ەڭبەك كۇنى اياسىندا ەسىك اشقان كورمە تاڭعاجايىپ تالانت يەسىنىڭ ءومىر بەلەستەرىنەن, شىعارماشىلىق جولىنان حابار بەرەدى. كورمەنىڭ اشىلۋ سالتاناتىنا قاتىسقان قوناقتار ايۋحانوۆتىڭ ومىرىنەن سىر شەرتەتىن ءار جىلدارداعى فوتوماتەريالدارمەن, ونەر يەسىنىڭ تىرشىلىگىندە تۇتىنعان زاتتارىمەن, ماراپاتتارى جانە عىلىمي ەڭبەكتەرىمەن تانىستى.
كورمە ەكسپوزيتسياسىنىڭ ەلەۋلى بولىگىنە ءبيشىنىڭ ءتۇرلى قويىلىمداردا كيگەن ساحنالىق كوستيۋمدەرى قويىلعان. ولاردىڭ قاتارىندا بولات ايۋحانوۆتىڭ ۇستازى, قازاق كسر حالىق ءارتىسى ا.ۆ. سەلەزنەۆقا تيەسىلى بولعان, كەيىننەن ب. ايۋحانوۆقا سىيعا بەرىلگەن ساحنالىق كيىم كەلۋشىلەردىڭ زور قىزىعۋشىلىعىن تۋدىرارى ءسوزسىز. سونداي-اق, «جاس بالەت» تەاترىندا كۋبا بيىنە ارنايى تىگىلگەن كوستيۋم (1965 ج.), يان سيبەليۋستىڭ مۋزىكاسىنا جازىلعان «مۇڭلى ۆالس» كلاسسيكالىق بيىنە كيگەن كالەتاسى جانە «گاملەت» بالەتىندەگى ءوزىنىڭ سۇيىكتى پارتياسىن ورىنداعاندا كيگەن كوستيۋمى دە كورمە تورىنەن ورىن العان.
ايتۋلى شارانى اشقان مەملەكەتتىك ورتالىق مۋزەي ديرەكتورى راشيدا حاريپوۆا تاعدىر بەرگەن تالانتىن ەل مادەنيەتىن وركەندەتۋگە ارناعان ايتۋلى تۇلعانىڭ ايشىقتى مۇرالارى كەيىنگى ۇرپاق ءۇشىن ولمەس ونەگە ەكەنىن اتادى.
«مەملەكەت باسشىسىنىڭ باستاماسىمەن ەلىمىزدە ەڭبەك كۇنى ەرەكشە ماندە اتالىپ ءوتتى. ەڭبەك ادامدارى قاي كەزدە دە قوعامدى العا سۇيرەيتىن قۋاتتى كۇش. ەڭبەك ادامدارى قاي كەزدە دە سۇيكىمدى. وسىنى العا ۇستاعان پرەزيدەنتىمىز: «ادال ازاماتقا ءتان ەڭبەكقورلىق, ىسكەرلىك, جاۋاپكەرشىلىك, بىلىمپازدىق جانە جاقسىدان ۇيرەنۋ, جاماننان جيرەنۋ سىندى اسىل قاسيەتتىڭ ءبارى شىنايى ەڭبەك ادامىنىڭ بويىنان تابىلادى. سوندىقتان ءوز ءىسىنىڭ مايتالماندارى قاشاندا قوعامنىڭ نازارىندا بولۋعا ءتيىس. ال, جاستارىمىز سولارعا قاراپ بوي تۇزەۋى كەرەك» دەگەن بولاتىن. ۇلت مادەنيەتىنە ادال ەڭبەك ەتىپ, سانالى عۇمىرىن ۇرپاق تاربيەسىنە ارناعان بولات عازيز ۇلى شىن مانىندە حالقىمىزدىڭ ماقتانىشى. بۇگىنگى كورمە ءبىر جاعىنان عاجايىپ ونەر يەسىنىڭ عيبراتتى جولىن ۇلگى ەتۋگە ارنالسا, ەكىنشى جاعىنان ەڭبەك ادامىنا قۇرمەت رەتىندە ۇيىمداستىرىلىپ وتىر», دەيدى راشيدا حاريپوۆا.
كورمە قازاقستان رەسپۋبليكاسى مەملەكەتتىك ورتالىق مۋزەيى قورىنداعى بولات ايۋحانوۆتىڭ جەكە كەشەنىنەن جانە قازاقستان رەسپۋبليكاسى مەملەكەتتىك اكادەميالىق بي تەاترىنان الىنعان ماتەريالدار نەگىزىندە جاساقتالعان.
بولات عازيز ۇلى ايۋحانوۆ 1938 جىلى 13 قىركۇيەكتە سەمەي قالاسىندا دۇنيەگە كەلگەن. 1955 ج. الماتى حورەوگرافيا ۋچيليششەسىن, 1964 ج. ا.ۆ. لۋناچارسكي اتىنداعى ماسكەۋ تەاتر ونەرى ينستيتۋتىنىڭ بالەتمەيستەرلىك فاكۋلتەتىن تامامداعان. العاشقى ەڭبەك جولىن 1957 ج. اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەت ءارتىسى بولىپ باستاعان. 1964 ج. باستاپ اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەتمەيستەر, 1965 جىلدان «قازاقكونتسەرت» ەكى اكتەرلى تەاترىنىڭ بالەت ءسوليسى, ال 1967 جىلدان «قازاقكونتسەرت» جانىنداعى الماتى جاستار بالەتى كوركەمدىك جەتەكشىسى, بالەت ءسوليسى بولدى. 1975 ج. قازاقستان كلاسسيكالىق بي ءانسامبلىنىڭ كوركەمدىك جەتەكشىسى, كەيىننەن ديرەكتورى قىزمەتىن اتقاردى. 1991 ج. قازاق مەملەكەتتىك كلاسسيكالىق بي انسامبلىنىڭ كوركەمدىك جەتەكشىسى, 2003 جىلدان ءومىرىنىڭ سوڭىنا دەيىن ءوزى نەگىزىن قالاعان قر مەملەكەتتىك اكادەميالىق بي تەاترىنىڭ ديرەكتورى بولدى.
الماتى