جىگىتتەرىمىزگە جىگەر جەتىسپەدى

ەنشىمىزدە – جالقى جۇلدە

كەزىندە ەلەنا شالىگينانىڭ ەل سپورتىنا ەلەۋلى ەڭبەك سىڭىرگەنى بارشاعا ءمالىم. ول ءبىر رەت وليمپيادادا جانە ءۇش مارتە الەم چەمپيوناتىندا جۇلدەلى ورىنداردى يەلەندى. ازيا ويىندارىندا التىننان القا تاعىپ, ەكى دۇركىن قۇرلىق چەمپيونى اتاندى. بىراق ەلەنانىڭ وسى تابىستارعا ەرتەرەكتە قول جەتكىزگەنىن ەستەن شىعارماعان ابزال. ول بەيجىڭ وليمپياداسىنىڭ قولا مەدالىن موينىندا جارقىراتقاندا جالىنداپ تۇرعان 22 جاستا ەدى. سودان بەرى باقانداي 15 جىل ءوتتى. سوڭعى رەت 2010 جىلى ماسكەۋدە الەمدىك دودادا جەڭىس تۇعىرىنا كوتەرىلدى. سودان بەرى 13 جىل دا زىمىراپ وتە شىقتى. ۋاقىت وزعان سايىن وزىنەن الدەقايدا جاس, جىلدام ءارى ەپتى بالۋاندارمەن الىسىپ-ج ۇلىسۋ شالىگيناعا قيىنعا سوعۋدا. بەلگرادتاعى باسەكەدە سوعان انىق كوز جەتكىزدىك. شىنى كەرەك, ءۇش ايدان كەيىن 37 جاسقا تولعالى وتىرعان ارداگەر سپورتشىنى الەمدىك دوداعا قاتىستىرۋدىڭ قانداي قاجەتتىگى بولعانىن ەش تۇسىنە المادىق.

اتالعان جارىستىڭ ەكىنشى كەزەڭىندە 68 كيلو سالماق دارەجەسىندە سىنعا تۇسكەن ەلەنا دەلگەرماا ەنحسايعاننان ويسىراي ۇتىلدى. موڭعوليانىڭ وكىلى فينالعا شىعىپ, جەرلەسىمىز جۇبانىش باسەكەسىندە باق سىنادى. بىراق بۇل مەجەدە جولى بولمادى. فرانتسيالىق كامبو لاروكقا جارىتىپ قارسىلىق كورسەتە الماعان ول جارىستان شىعىپ قالدى. ۇلتتىق قۇراما باپكەرلەرى ەندى ەلەنانى حانچجوۋداعى ازيا ويىندارىندا كۇرەستىرەمىز دەپ وتىر. بىراق شاۋ تارتىپ قالعان شالىگينا سارى قۇرلىقتىڭ باستى دوداسىندا وزا شابادى دەگەنگە سەنۋ قيىن. ونىڭ ورنىنا تالاپتى جاستاردىڭ ءبىرىن اپارعان الدەقايدا ءتيىمدى ەدى.

72 كيلو سالماقتاعى ءجاميلا باقبەرگەنوۆا باستاپقى ەكى باسەكەدە قارسىلاستارىن ەش قينالماي ەڭسەرگەندە ءبىر جەلپىنىپ قالدىق. بارشا جۇرت الاشتىڭ اياۋلى قىزىن قاتارىنان ءۇشىنشى رەت الەم چەمپيوناتىنىڭ فينالىندا كورۋدى ارماندادى. ونىڭ 2021 جىلى نورۆەگيا جانە 2022 جىلى سەربيادا جەڭىس تۇعىرىنىڭ ەڭ بيىك ساتىسىنا ءبىر قادام جەتپەي ءسۇرىنىپ, كۇمىسپەن كۇپتەلگەنى ەسىمىزدە. بىراق جاميلاعا بەلگرادتا التىن تۇعىرعا كوتەرىلۋ باقىتى بۇيىرمادى. جارتىلاي فينالدا باقبەرگەنوۆانى موڭعوليالىق داۆااناسان ەنح امار توقتاتتى. ەسەسىنە ءۇشىنشى ورىن ءۇشىن تارتىستا جەرلەسىمىز ساۋاتتى تاكتيكا قۇردى. پولشالىق ناتاليا سترجالكامەن بەلدەسۋدە ءجاميلا تىرنەكتەپ ءجۇرىپ ءتورت ۇپاي جينادى دا, قولا مەدالگە قول سوزدى. بۇل – قازاقستاننىڭ ايەلدەر قۇراماسىنىڭ قورجىنىنداعى جالعىز جۇلدە.

جالپى ەسەپتە جاپونيا قۇراماسى جەكە-دارا كوش باستادى. ولار 8 (6 التىن+1 كۇمىس+ 1 قولا) جۇلدە الدى. ەكىنشى جانە ءۇشىنشى ورىنداردى اقش (1+2+4) پەن قىرعىزستاننىڭ (1+1+0) قىزدارى يەلەندى. ءتورتىنشى جانە بەسىنشى ساتىعا قىتاي (1+0+2) مەن تۇركيا (1+0+1) جايعاستى. مىنە, سەربيانىڭ استاناسىندا وسى ەلدەردىڭ عانا ءانۇرانى شىرقالدى.

جۇلدە دە, جولداما دا جوق

بەلگرادتاعى الەم چەمپيوناتىن گرەك-ريم كۇرەسى شەبەرلەرى قورىتىندىلادى. جۇما كۇنى ءتورت سالماق دارەجەسىنىڭ ءتۇرلى-ءتۇستى مەدالدەرى ساراپقا سالىندى. سونىڭ ۇشەۋىندە جەرلەستەرىمىز ونەر كورسەتتى. اسا اۋىر سالماق دارەجەسىندەگى ەلىمىزدىڭ ەڭ بەلدى بالۋانى ءالىمحان سىزدىقوۆ جاراقاتىنا بايلانىستى جارىس جولىنا شىقپادى. ال ءالىمحاندى الماستىراتىن بىردە-ءبىر ءاپايتوس كەڭ بايتاق قازاق ەلىنەن تابىلمادى. وكىنىشتى-اق! بۇل جاعداي ەل سپورتىنىڭ تىزگىنىن ۇستاعان ازاماتتارعا ۇلكەن وي سالۋعا ءتيىس.

وزگە جىگىتتەر جايىندا ايتار بولساق, 80 كيلو سالماقتاعى دياس قالەن تۇساۋكەسەر كەزدەسۋىندە رەسەيلىك اۋەس گانيبوۆقا جول بەردى. 50 كيلو سالماقتاعى مارلان مۇقاشەۆ شيرەك فينالدا جەڭىلىس تاپتى. ازەربايجاننىڭ ماقتانىشى, الەم مەن ەۋروپانىڭ ەكى دۇركىن چەمپيونى ەلدەنيز ازيزليگە ونىڭ ءالى جەتپەدى. باستاپقى باسەكەلەردە حورۆاتيالىق انتونيو كامەنياسەۆيچ پەن تۇرىكمەنستاندىق پرۋد ورازوۆتىڭ تاس-تالقانىن شىعارعان 77 كيلو سالماقتاعى دەمەۋ جادىراەۆ ودان كەيىن بىلتىرعى الەم چەمپيوناتىنىڭ ءفيناليسى ماجارستاندىق زولتان لەۆايدى جەڭىپ, قازاق جانكۇيەرلەرىن ءبىر قۋانتىپ تاستادى. بىراق شيرەك فينالدا الەم چەمپيوناتىنىڭ كۇمىس جۇلدەگەرى, ەۋروپا چەمپيونى ازەربايجاندىق سانان سۋلەيمانوۆ ونى سان سوقتىردى.

جۇبانىش بەلدەسۋىندە مارلان مۇقاشەۆ جاپونيالىق تايگا ونيشيدەن ايلاسىن اسىرسا, دەمەۋ جادىراەۆ مولدوۆالىق الەكساندر گۋتۋدى جەڭدى. ءسويتىپ, قوس قانداسىمىز قولا مەدال ءۇشىن تالاستى. مارلان الەم كۋبوگىنىڭ يەگەرى, ازيا چەمپيونى, جاستار اراسىنداعى الەم بىرىنشىلىگىنىڭ (U-23) جەڭىمپازى يراندىق پويا دادمارزبەن شەبەرلىك بايقاستى. بۇل باسەكەدە پارسى ەلىنىڭ پەحلەۆانى قانداسىمىزعا ەش مۇمكىندىك بەرمەدى ال جادىراەۆ 2021 جىلعى الەم چەمپيونى, 2022 جىلعى الەم چەمپيوناتىنىڭ كۇمىس جۇلدەگەرى, ەۋروپا بىرنشىلىگىنىڭ ەكى دۇركىن جەڭىمپازى ارمەنيالىق مالحاس امويانمەن ايقاستى. بىرازعا دەيىن تارازى باسى تەڭسەلىپ تۇرعان باسەكەنىڭ ەكىنشى كەزەڭىندە قانداسىمىز قاپيادا قارسىلاسىنىڭ ءتورت ۇپايلىق ادىسىنە ءتۇسىپ قالدى. ناتيجەسىندە, دەمەۋ دە بەسىنشى ورىندى قاناعات تۇتتى.

دەمەۋ جادىراەۆ پەن وزبەكستاندىق ارام ۆاردانيان 77 كيلو سالماق دارەجەسىنىڭ بەسىنشى وليمپيادا جولداماسىن ءوزارا ساراپقا سالدى. ەكەۋى دە الەم چەمپيوناتىندا ءبىر مارتە جانە ازيا بىرىنشىلىگىندە ەكى رەتتەن جەڭىس تۇعىرىنا كوتەرىلگەن. اتاق-داڭقى بىردەي جانە دەڭگەيلەرى دە شامالاس. العاشقى بولىپ تورتتاعانعا جادىراەۆ ءتۇستى. ۆاردانيان بەس ۇپاي ەنشىلەدى. ەكىنشى كەزەڭدە تورەشى وزبەكستاندىقتى پارتەرگە قويدى. قازاقتىڭ ورەنى ءتورت ۇپايمەن شەكتەلدى. ءسويتىپ, قاسيەتتى جۇمادا ەلىمىزدىڭ گرەك-ريم كۇرەسى شەبەرلەرى نە جۇلدەگە, نە جولداماعا يەلىك ەتە المادى.

ءدال سول كۇنى قازاقتىڭ ءۇش بالۋانى ىرىكتەۋ سايىستارىن وتكىزدى. ولجاس سىرلىباي (97 كيلو) العاشقى اينالىمدا يتاليالىق نيكولوز كاحەلاشۆيليدەن جەڭىلسە, ولجاس سۇلتان (60 كيلو) ەكىنشى كەزەڭدە وڭتۇستىككورەيالىق سىنحاك كيمگە جول بەردى. ال يبراگيم ماگومادوۆ (72 كيلو) شيرەك فينالدا يبراگيم گانەگە ەسە جىبەردى. كوپ كەشىكپەي گانە تۇركيالىق سەلجيۋك كاندى قاپى قالدىرىپ, فينالعا شىقتى. سونىڭ ارقاسىندا وتانداسىمىز قولا مەدال ءۇشىن تالاسۋ قۇقىعىن ساقتاپ قالدى. بىراق جەرلەسىمىز ءوز جانكۇيەرلەرىن قۋانتۋعا جارامادى. باستاپقىدا بولگاريالىق ستويان كۋباتوۆتى 5:0 ەسەبىمەن جەڭىپ جاتقان يبراگيم سول باسىمدىعىن باسەكەنىڭ سوڭىنا دەيىن ساقتاپ قالا المادى.

سەنبى كۇنى تاعى ءۇش سالماق دارەجەسىندە وتكەن باسەكەلەردى تاپجىلماي تاماشالادىق. بوز كىلەمگە ءبىرىنشى بولىپ 67 كيلو سالماقتاعى المات كەبىسباەۆ شىقتى. ول رەسەي چەمپيونى اسلان ۆيسايتوۆتىڭ اياعىن كوكتەن كەلتىردى. الايدا كەلەسى كەزەڭدە المات فرانتسيالىق ماماداسسا سيللادان جەڭىلدى. 63 كيلو سالماقتا مامىربەك مۇحامەدالي رەسەيلىك استەمير بيجوەۆتىڭ الدىندا دارمەنسىزدىك تانىتتى. 87 كيلو سالماقتاعى نۇرسۇلتان تۇرسىنوۆ يتاليالىق ميركو مينگۋتستسي مەن وڭتۇستىككورەيالىق سانحەن پاركتان ايلاسىن اسىردى. شيرەك فينالدا سەمەيدىڭ ساڭلاعى يراندىق ناسەر اليزادەنىڭ سىلىكپەسىن شىعاردى. جارتىلاي فينالدا ول تۇركيانىڭ تارلانى ءالي شىڭعىسپەن شەبەرلىك بايقاستى. بۇل ايقاس انادولى ەلى وكىلىنىڭ پايداسىنا شەشىلدى. دەسەك تە تۇرسىنوۆ قولا مەدال جانە پاريج وليمپياداسىنىڭ جولداماسى ءۇشىن تالاسۋ مۇمكىندىگىن ساقتاپ قالدى. قازاق جانكۇيەرلەرى ەندى ونىڭ جولىنا ۇلكەن ۇمىتپەن قاراپ وتىر.