پرەمەر-مينيستر ءاليحان سمايىلوۆتىڭ توراعالىعىمەن وتكەن ەكونوميكانى دەمونوپوليزاتسيالاۋ جونىندەگى كوميسسيا وتىرىسىندا مۇناي ءوندىرۋ جانە تاسىمالداۋ, دەنساۋلىق ساقتاۋ جانە تەمىرجول ينفراقۇرىلىمىن پايدالانۋ سالالارىندا مونوپولياعا قارسى شارالاردى قابىلداۋ ماسەلەلەرى تالقىلاندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كەڭەستە كەن ورىندارىنىڭ بىرىنەن شيكىزات وڭدەۋ ءۇشىن بيتۋم زاۋىتىنا جىبەرىلەتىن مۇناي قۇبىرى بار جەكە كومپانيانىڭ قىزمەتى قارالدى. اتالعان باعىتتا وسىعان ۇقساس باسقا قۇبىرلار بولماعاندىقتان, مۇنايدى بالاما جولمەن تاسىمالداۋ مۇمكىن ەمەس.
سوعان وراي كومپانيا ءوزىنىڭ مونوپوليالىق جاعدايىن پايدالانىپ, مۇنايدى وسىنداي قاشىقتىققا تاسىمالداۋ ءۇشىن نارىقتىڭ باسقا قاتىسۋشىلارى قولدانىپ وتىرعان تاريفتەن 30 ەسە جوعارى تاريف بەلگىلەگەن.
تالقىلاۋ قورىتىندىسىنا سايكەس ۋاكىلەتتى مەملەكەتتىك ورگاندارعا بەلگىلەنگەن باعالاردىڭ نەگىزدىلىگىنە تالداۋ جاساۋ جانە قر ۇەم تابيعي مونوپوليالاردى رەتتەۋ كوميتەتى ارقىلى قاجەتتى شارالار قابىلداۋ تاپسىرىلدى.
سونداي-اق جيىندا ءاموز جانە پمحز-عا اۋتسورسينگ شەڭبەرىندە كورسەتىلەتىن بىرقاتار سەرۆيستىك قىزمەتتەردى زاۋىتتاردىڭ ءوز قۇزىرەتىنە قايتارۋ ماسەلەسى دە قارالدى. اتاپ ايتقاندا, پمحز-دا اۆتوماتيكا مەن قۇبىر جەلىلەرىنە تەحنيكالىق قىزمەت كورسەتۋ, سۋمەن جابدىقتاۋ جانە سانتەحنيكالىق قىزمەت كورسەتۋ فۋنكتسيالارىن كاسىپورىننىڭ قاراماعىنا بەرۋدىڭ ءبىرىنشى كەزەڭى اياقتالعانى ايتىلدى. قازىرگى ۋاقىتتا مۇنداي جۇمىستار قۇرىلىس-مونتاجداۋ قىزمەتتەرى, ەلەكتر جەلىلەرى مەن جەلدەتۋ جۇيەلەرىنە تەحنيكالىق قىزمەت كورسەتۋ, جۇك جونەلتۋشىنىڭ قىزمەتتەرى جانە ت.ب. بويىنشا جۇرگىزىلەدى. بۇل جۇمىستار جىل سوڭىنا دەيىن اياقتالۋى ءتيىس.
سونىمەن قاتار جيىنعا قاتىسۋشىلار مەديتسينالىق ۇيىمداردى جابدىقتارمەن جانە تەحنيكامەن جاراقتاندىرۋ سالاسىندا جۇمىس ىستەيتىن كاسىپورىندى سەنىمگەرلىك باسقارۋدان دەنساۋلىق ساقتاۋ مينيسترلىگىنىڭ قاراماعىنا بەرۋ, سونداي-اق بۇرىن مەملەكەت مەنشىگىنە قايتارىلعان تەمىرجول كىرمە جولدارىن پايدالانۋ ماسەلەلەرىن تالقىلادى.