مەملەكەت باسشىسى قاسىم-جومارت توقاەۆ نيۋ-يوركتەگى جۇمىس ساپارىنىڭ اياسىندا «ورتالىق ازيا – اقش» مەملەكەتتەر باسشىلارىنىڭ سامميتىنە قاتىستى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«پرەزيدەنت قاسىم-جومارت توقاەۆ نيۋ-يورك قالاسىنا جۇمىس ساپارى اياسىندا ورتالىق ازيا مەن اقش مەملەكەتتەرى باسشىلارىنىڭ سامميتىنە قاتىستى. جيىندا س5+1 سەرىكتەستىگى ارقىلى ەكونوميكا, ەنەرگەتيكا جانە قاۋىپسىزدىك سالالارىندا ورتالىق ازيانىڭ ەگەمەندىگىن, ورنىقتى دامۋىن جانە وركەندەۋىن ودان ءارى نىعايتۋ ءۇشىن بىرلەسىپ جۇمىس ىستەۋ ماسەلەسى تالقىلاندى. سامميتتە مەملەكەت باسشىسى قاسىم-جومارت توقاەۆ اقش پرەزيدەنتى دجوزەف بايدەننەن كەيىن سويلەدى», دەلىنگەن اقپاراتتا.
سامميتتە قىرعىزستان پرەزيدەنتى سادىر جاپاروۆ, تاجىكستان پرەزيدەنتى ەمومالي راحمون, تۇرىكمەنستان پرەزيدەنتى سەردار بەردىمۇحامەدوۆ, وزبەكستان پرەزيدەنتى شاۆكات ميرزيوەۆ تە ءسوز سويلەپ, ستراتەگيالىق سەرىكتەستىكتى, ساياسي ديالوگتى, ساۋدا-ەكونوميكالىق, ينۆەستيتسيالىق جانە گۋمانيتارلىق سالالارداعى ىنتىماقتاستىقتى ودان ءارى دامىتۋ, ەۋرازيا قۇرلىعىنداعى بەيبىتشىلىك پەن تۇراقتىلىقتى ساقتاۋ ماسەلەلەرى جان-جاقتى تالقىلاندى. سامميتتە ەكونوميكالىق ىنتىماقتاستىق ماسەلەسىنە, سونداي-اق امەريكالىق كومپانيالاردىڭ ماڭىزدى قازبا بايلىقتاردى يگەرۋ, جاڭارتىلاتىن ەنەرگيا كوزدەرى, وڭدەۋ ونەركاسىبى جانە باسقا دا باعىتتاردى دامىتۋ مۇمكىندىكتەرى ايتىلدى.
س5+1 فورماتىنداعى سامميتتە قاۋىپسىزدىك پروبلەمالارىن, سونىڭ ىشىندە كيبەرقاۋىپسىزدىك, تەرروريزم, ەكسترەميزم, زاڭسىز ميگراتسيا جانە ەسىرتكى تاسىمالى سەكىلدى قاۋىپ-قاتەرلەردى شەشۋ ءۇشىن ىنتىماقتاستىقتى نىعايتۋعا دا باسا ءمان بەرىلدى.
پرەزيدەنت ق.توقاەۆ ءوز سوزىندە كەلەشەكتە الماتى قالاسىندا ورتالىق ازيا مەن اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى ايماقتىق ورتالىعىن اشۋ ىسىندە اقش تاراپىنىڭ قولداۋىنا سەنىم ارتاتىنىن جەتكىزدى.