«ورداباسى» ۇتىلىپ قالدى

جارىس كەستەسىندە ءۇشىنشى ورىندا كەلە جاتقان «استانا» «توبىلدى» قابىلدادى. كەزدەسۋدىڭ 5-مينۋتىندا دەمبو داربو قاق­پاشىمەن بەتپە-بەت قالىپ, ونى وڭاي الداپ ءوتتى دە دوپتى تورعا توعىتتى. سودان كەيىن ويىن ءبىراز سايابىرسىپ قالدى. قوس كوماندا ۇزاققا دەيىن ءبىر-ءبىرىنىڭ قاقپا كىلتىن تابا المادى. 77-مينۋتتا الەكس امانوۆيچ ەكىنشى گولدى سوقتى. قوستانايلىقتاردىڭ تەك ءبىر عانا ناتيجەلى سوققىمەن جاۋاپ قايىرۋعا كۇش-جىگەرلەرى جەتتى. باسەكەنىڭ سوڭىندا سەرج دەبلە 11 مەترلىك نۇكتەدەن نىسانانى ءدوپ كوزدەدى – 2:1.

 «اقتوبە» مەن «ورداباسى» اراسىنداعى كەزەسۋدە اسحات تاعىبەرگەن 17 مەتردەي قاشىقتىقتان ايىپ دوبىن ءمىنسىز ورىنداعان ەدى. ونىڭ قاڭىراتا تەپكەن دوبى قاقپانىڭ باعاناسىنا ءتيىپ, تۋرا توردان تابىلدى. بىراق شىمكەنتتىكتەر بۇل باسىمدىقتى ساقتاپ قالا المادى. 61-مينۋتتا اندريا فيليپوۆيچ جانە 81-مينۋتتا فرانكا نيانگبو گول سوعىپ, الاڭ يەلەرىنە جەڭىس اپەردى – 2:1. ماتچتىڭ اياقتالۋىنا ساناۋلى سەكۋندتار قالعاندا تاعىبەرگەن 11 مەترلىك نۇكتەدەن ءمۇلت كەتتى. ال «اتىراۋ» مەن «قىزىلجار» اراسىنداعى ماتچتا ەسەپ اشىلعان جوق – 0:0.