قر عىلىم جانە جوعارى ءبىلىم ءمينيسترى ساياسات نۇربەك ءوزىنىڭ Telegram ارناسىندا 2024 جىلعى ۇلتتىق بىرىڭعاي تەستىلەۋىنە ەنگىزىلەتىن وزگەرىستەر تۋرالى جازدى, دەپ حابارلايدى Egemen.kz.
«بۇگىن سىزدەرمەن 2024 جىلعى ۇبت جاڭالىقتارىن بولىسكىم كەلەدى. بىلتىر ۋادە بەرگەنىمىزدەي, ەمتيحاننىڭ فورماتىنداعى بارلىق وزگەرىس جاڭا وقۋ جىلىنىڭ باسىندا جاريا ەتىلەدى. بۇل بولاشاق تالاپكەرلەرگە جوعارى وقۋ ورنىنا تۇسۋگە جاقسى دايىندالۋعا كومەكتەسەدى.
جوعارى ءبىلىمدى وڭتايلى ەتۋدىڭ ماڭىزدى قادامى – ۇبت تاپسىرمالارىن جەتىلدىرۋ. ءبىز ناتيجەلەردى قالىپتاستىرۋ مەن تالداۋدا پسيحومەتريالىق تاسىلدەردى قولدانا وتىرىپ, ستاندارتتالعان فورماتقا كوشەمىز. بۇل وزگەرىستەر قازاقستان رەسپۋبليكاسىنىڭ 2023-2029 جىلدارعا ارنالعان جوعارى ءبىلىم مەن عىلىمدى دامىتۋ تۇجىرىمداماسىنا سايكەس كەلەدى», دەپ جازدى ساياسات نۇربەك.
ونىڭ جازۋىنشا, 2024 جىلعى ۇبت-دا تەست سۇراقتارىنىڭ سانى وزگەرەدى, سونداي-اق بەيىندىك پاندەرگە جاڭاشا تاپسىرمالار قوسىلىپ, تەستىلەۋ ۋاقىتى قىسقارادى.
«️ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا. الايدا, «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقارادى. ال بەيىندىك پاندەردىڭ سۇراقتار سانى ارتىپ, 40 تەست تاپسىرماسىنان تۇراتىن بولادى. اتاپ وتەيىن, بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلادى. بۇل وزگەرىستەر – تەست تاپسىرمالارىنىڭ ساپاسىن ارتتىرۋ مەن ولاردىڭ فۋنكتسيونالدىق ساۋاتتىلىق پەن سىني ويلاۋ داعدىلارىن باعالاۋدىڭ الەمدىك ستاندارتتارىنا سايكەستىگى باعىتىنداعى جۇمىستاردىڭ قيسىندى جالعاسى», دەپ ءتۇسىندىردى مينيستر.
وسىلايشا, ۇبت تاپسىرمالارىنىڭ سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى.
«جوعارىدا اتالعان وزگەرىستەرگە بايلانىستى تەستىلەۋ ۋاقىتى قىسقارادى. ەندى ۇبت تاپسىرۋعا وقۋشىلارعا 3 ساعات 30 مينۋت (210 مينۋت) بولىنەدى. بۇرىن 4 ساعات (240 مينۋت) بەرىلگەن. بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك», دەدى س.نۇربەك.
سونداي-اق ۇبت-عا ەنگىزىلەتىن تاعى ءبىر جاڭالىق شىعارماشىلىق باعىتتاردى تاڭداعان تالاپكەرلەرگە قاتىستى, ەندى ولار «قازاقستان تاريحى» مەن «وقۋ ساۋاتتىلىعى» پاندەرىمەن قاتار «ماتەماتيكالىق ساۋاتتىلىقتى» مىندەتتى ءپان رەتىندە تاپسىرادى. «ماتەماتيكالىق ساۋاتتىلىقتان» تەست تاپسىرمالارى تالاپكەرلەردىڭ ومىردە ماتەماتيكالىق لوگيكا بويىنشا العان بىلىمدەرىن, داعدىلارىن قولدانا الۋىن تەكسەرۋگە باعىتتالادى.
«بەيىندىك پاندەردىڭ كومبيناتسياسى بويىنشا دا وزگەرىستەر بار. وقۋشىلاردىڭ, اتا-انالاردىڭ جانە پەداگوگيكالىق قاۋىمنىڭ پىكىرلەرى مەن ۇسىنىستارىن ەسكەرە وتىرىپ, «B059 – كوممۋنيكاتسيالار جانە كوممۋنيكاتسيالىق تەحنولوگيالار», «B055 – ماتەماتيكا جانە ستاتيستيكا», «B063 – ەلەكتروتەحنيكا جانە اۆتوماتتاندىرۋ» ءبىلىم بەرۋ باعدارلامالارىنىڭ توپتارىنا تۇسۋشىلەر «ماتەماتيكا-ينفورماتيكا» كومبيناتسياسىن تاپسىرادى.
قورىتىندىلاي كەلە, وتكەن جىلى قر عىلىم جانە جوعارى ءبىلىم مينيسترلىگى نەگىزگى ۇبت-نى ەكى رەت تاپسىرىپ, ۇزدىك ناتيجەمەن گرانت تاعايىنداۋ كونكۋرسىنا قاتىسۋ مۇمكىندىگىن رەسمي تۇردە بەكىتكەنىن ەسكە سالعىم كەلەدى. ەگەر اقىلى نەگىزدە ءتۇسۋ ءۇشىن ۇبت تاپسىرۋدىڭ تاعى ءۇش مۇمكىندىگى بار ەكەنىن ەسكەرەتىن بولساق, وندا 2024 جىلعى تالاپكەرلەر تەستىلەۋدەن بەس رەت وتە الادى», دەپ قورىتىندىلادى مينيستر.