بۇل تۋرالى پرەزيدەنت وتاندىق كاسىپكەرلەرمەن كەزدەسۋ بارىسىندا ايتتى, دەپ حابارلايدى Egemen.kz اقورداعا سىلتەمە جاساپ.
كۇردەلى جانە ورنىقتى ەكونوميكاعا ءونىمدى ورتاشا جانە جوعارى دەڭگەيدە وڭدەۋ سەگمەنتتەرىن بەلسەندى يگەرەتىن وڭدەۋ ونەركاسىبى نەگىز بولاتىنى بەلگىلى. سونىمەن قاتار بۇل باعىتتا كەدەرگىلەردىڭ كوپتىگى كاسىپورىندار «عۇمىرىنىڭ» ۇزاققا سوزىلماۋىنان بايقالادى. پرەزيدەنت تە بۇل ماسەلەنى كوتەرىپ, قازاقستانداعى بيزنەس-احۋال ءالى دە جەتىلدىرۋدى قاجەت ەتەتىنىن ايتتى.
«ەلىمىزدەگى كومپانيالاردىڭ تورتتەن ءبىرى عانا اشىلعاننان كەيىن ەكىنشى جىلى نارىقتا قالادى. سالىستىرار بولساق, بۇل كورسەتكىش باسقا ەلدەردە 70-80 پايىزعا تەڭ. كوپ جاعدايدا بۇل قازاقستانداعى بيزنەس-احۋالدىڭ ءالى دە جەتىلمەگەنىن كورسەتەدى. بىراق مۇنىڭ باسقا دا اسپەكتىلەرى بار. ماسەلەن, قازىرگى جاعدايدا كوپتەگەن ەل ىشكى نارىقتى قورعاۋ جانە قولداۋ شارالارىن بەلسەندى قولدانىپ جاتىر. وسى وزىق تاجىريبەنى باتىل ءارى كەڭىنەن مەڭگەرۋىمىز كەرەك. مەن مۇنى ۇكىمەتكە ايتىپ وتىرمىن», دەدى مەملەكەت باسشىسى.
پرەزيدەنتتىڭ ايتۋىنشا, قازاقستاندا ءوندىرىستىڭ جەرگىلىكتى ۇلەسىن ارتتىرۋ ءۇشىن قولايلى جاعداي جاسالعان. سالىقتىق پرەفەرەنتسيالار مەن جەڭىلدەتىلگەن نەسيەلەندىرۋ بەرىلەدى, سونداي-اق ءونىمدى وتكىزۋ بويىنشا كومەك كورسەتىلەدى. الايدا تاۋار ءوندىرىسىنىڭ جەرگىلىكتى ۇلەسى ازىرگە تومەندەۋ.
«شىن مانىندە, ءبىز يمپورتتى سۋبسيديالاۋ ءىسىن جالعاستىرىپ جاتىرمىز. بۇل ءوندىرىستىڭ باستاپقى قالىپتاسۋ ساتىسىنداعى تابيعي قۇبىلىس ەكەنىن تۇسىنەمىن. سوندىقتان اتالعان ماسەلەگە ء«وسىم دەرتى» رەتىندە قارايمىز. ەشتەڭە بولماعاننان گورى, وسىنداي ءوندىرىستىڭ بولعانى دۇرىس. الايدا ۇكىمەت ءوندىرىستىڭ جەرگىلىكتى قامتۋ ۇلەسىن ارتتىرۋ ماسەلەسىمەن مۇقيات جانە جان-جاقتى اينالىسۋعا ءتيىس. كەيبىر كومپانيالار جەرگىلىكتى قامتۋ ۇلەسىنە ەڭبەكاقى تولەۋ قورىن, كوممۋنالدىق قىزمەتتەرگە جانە جارناماعا جۇمسالعان شىعىنداردى قوساتىن جاعدايعا جەتتى. مۇنداي كوزبوياۋشىلىقتىڭ بىزگە قاجەتى جوق. بۇل جەردە «اتامەكەن» پالاتاسىنىڭ ءرولى اناعۇرلىم بەلسەندى ءارى پايدالى بولۋعا ءتيىس», دەدى پرەزيدەنت.