كولىك كوميتەتىنىڭ توراعاسى التاي ءالى «نۇرلى جول» تەمىر جول ۆوكزالىندا وتكەن سالتاناتتى ءىس-شاراعا قاتىستى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
«جولاۋشىلار تاسىمالى» اق پاركى وتاندىق جاڭا جولاۋشىلار ۆاگوندارىمەن تولىقتى. سۋ جاڭا ۆاگونداردى قازاقستاننىڭ «زيكستو» زاۋىتى جاساپ شىعارعان. ۆاگوندار زاماناۋي تالاپقا ساي جاسالىنعان. اتاپ ايتقاندا, كونديتسيونەر, اۋانى تازارتۋ سۇزگىلەرى, داتچيكتەر, تامبۋرلارداعى بەينەباقىلاۋ جۇيەسى, ەلەكتر روزەتكالارىمەن قامتاماسىز ەتىلگەن. كوميتەت توراعاسىنىڭ ايتۋىنشا, قازىرگى ۋاقىتتا جولاۋشىلار ۆاگوندارىنىڭ پاركى شامامەن 2500 بىرلىكتى قۇرايدى.
«مينيسترلىك تاراپىنان جولاۋشىلار تاسىمالىنا ارنالعان تەمىر جول پاركىن جاڭارتۋ بويىنشا جۇمىستار تۇراقتى نەگىزدە جۇرگىزىلىپ كەلەدى. وسى رەتتە ۆاگونداردى وتاندىق وندىرۋشىلەردى قولداپ, سولاردان الۋىمىز قۋانتارلىق جاعداي, ارينە. «زيكستو»-مەن جاسالعان شارتقا سايكەس 50 جاڭا جولاۋشىلار ۆاگونى ساتىپ الىندى. بۇل شارالار تاسىمالداۋ پروتسەسىن جۇزەگە اسىرۋ كەزىندە جولاۋشىلارعا بارىنشا جاعداي جاساۋ ماقساتىندا قولعا الىنىپ وتىر», دەدى ا.ءالى.
جاڭا جىلجىمالى قۇرام پلاتسكارت جانە كۋپە ۆاگوندارىنان تۇرادى, قىزمەت ەتۋ مەرزىمى 40 جىلعا دەيىن.
«كەلەسى جىلدىڭ باسىندا «زيكستو» اق جولاۋشىلار تاسىمالىنا ارنالعان تاعى 100 ۆاگون جاساپ شىعارادى», دەدى ءسوز كەزەگىندە «جولاۋشىلار تاسىمالى» اق باس ديرەكتورى جانىبەك تايجانوۆ.
ايتا كەتەرلىگى, سوڭعى 10 جىلدا تەمىر جول كولىگى پاركى 50 پايىزعا جاڭارتىلعان. وسى ۋاقىت ارالىعىندا زاماناۋي حالىقارالىق تالاپتارعا سايكەس كەلەتىن 1200-دەن استام ۆاگون ساتىپ الىنعان.