پرەمەر-مينيستر ءاليحان سمايىلوۆ پەن Sinopec كومپانياسىنىڭ پرەزيدەنتى يۋي باوتساي مۇناي-گاز سالاسىندا جاڭا جوبالاردى جۇزەگە اسىرۋ ماسەلەلەرىن تالقىلادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ۇكىمەت باسشىسى Sinopec كومپانياسىنىڭ تىكەلەي قاتىسۋىمەن ەلىمىزدە بىرقاتار ماڭىزدى جوبانىڭ جۇزەگە اسقانىن, ونىڭ ىشىندە اتىراۋ مۇناي وڭدەۋ زاۋىتىن مودەرنيزاتسيالاۋدى اتاپ ءوتتى.
سونداي-اق ول پرەزيدەنت قاسىم-جومارت توقاەۆتىڭ حالىققا جولداۋىندا ەلىمىزدىڭ مىقتى ونەركاسىپتىك نەگىزىن قالىپتاستىرۋ قاجەتتىگىن اتاپ وتكەنىن ەسكە سالدى. اتاپ ايتقاندا, مۇناي-گاز حيميا ءوندىرىسىن جەدەل دامىتۋ مىندەتى قويىلدى.
«سول سەبەپتى نەگىزگى «پوليەتيلەن» جوباسى مۇناي-گاز حيميا ونەركاسىبىن دامىتۋداعى ماڭىزدى كەزەڭ بولىپ تابىلادى. ونى جۇزەگە اسىرۋ ەل ەكونوميكاسىنا مۋلتيپليكاتيۆتى اسەرىن تيگىزبەك. Sinopec كومپانياسى مۇناي-گاز حيميا سالاسىنداعى الەمدىك كوشباسشىلاردىڭ ءبىرى ەكەنىن ەسكەرسەك, كومپانيانىڭ جوباعا تەڭ قۇقىلى سەرىكتەس رەتىندە كەلۋى ستراتەگيالىق ماڭىزدى ماسەلە», دەدى ءاليحان سمايىلوۆ.
سونىمەن قاتار Sinopec كومپانياسىنىڭ ەلىمىزدەگى باسقا دا پەرسپەكتيۆالىق جوبالارعا قاتىسۋ مۇمكىندىگىن قاراستىرىپ جاتقانى اتالدى.
ءوز كەزەگىندە Sinopec كومپانياسىنىڭ باسشىسى قازاقستان مەن قىتاي اراسىنداعى ەنەرگەتيكا سالاسى بويىنشا ىنتىماقتاستىق جوعارى قارقىنمەن دامىپ كەلە جاتقانىن اتاپ ءوتتى. بۇل, ءوز كەزەگىندە, ەكى ەل حالىقتارىنىڭ ءال-اۋقاتىن ارتتىرۋعا زور ۇلەس قوسىپ جاتىر.
بۇدان بولەك, Sinopec پرەزيدەنتى مۇناي-گاز سالاسىنداعى قازاقستاندىق مامانداردىڭ كاسىبي تاعىلىمدامادان ءوتۋىن ۇيىمداستىرۋ جونىندە باستاما كوتەردى.