مەملەكەت باسشىسى شاقىرۋىن قابىل الىپ, قازاقستان استاناسىنا كەلگەنى ءۇشىن البانيا پرەزيدەنتىنە العىس ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
– بۇل – تاريحتاعى البانيا پرەزيدەنتىنىڭ قازاقستانعا جاساعان العاشقى ساپارى. ءسىزدىڭ رەسمي ساپارىڭىز ءوزارا ىنتىماقتاستىقتى دامىتۋ تۇرعىسىنان وتە ماڭىزدى. قازاقستان ءسىزدىڭ ەلىڭىزبەن تىعىز قارىم-قاتىناس جاساۋعا نيەتتى. ءبىز ەكى تاراپتىڭ مۇددەسىنە ساي كەلەتىن كوپتەگەن سالادا ءوزارا ءتيىمدى ىنتىماقتاستىقتى دامىتۋعا مۇمكىندىك مول دەپ سانايمىز. ەكى اپتادان سوڭ ەلدەرىمىز اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولادى. ءسىزدىڭ ساپارىڭىزدىڭ وسى ايتۋلى داتامەن تۇسپا-تۇس كەلۋىنىڭ سيمۆولدىق ءمانى بار, – دەدى پرەزيدەنت.
البانيا پرەزيدەنتى بايرام بەگاي استاناعا شاقىرعانى جانە قوناقجايلىق كورسەتكەنى ءۇشىن قاسىم-جومارت توقاەۆقا ريزاشىلىعىن ءبىلدىردى.
– قازاقستانعا ساپارمەن كەلگەنىم ءۇشىن وتە قۋانىشتىمىن. ارنايى شاقىرعانىڭىز ءۇشىن سىزگە ريزاشىلىعىمدى بىلدىرەمىن. ءوزىڭىز ايتقانداي, بۇل ساپار ديپلوماتيالىق بايلانىستارىمىزدىڭ 30 جىلدىق مەرەيتويىمەن تۇسپا-تۇس كەلىپ وتىر. بۇل ءبىزدىڭ ساياسي قارىم-قاتىناسىمىزدىڭ جوعارى دەڭگەيدە ەكەنىن كورسەتەدى. ەندى ەكونوميكالىق ىنتىماقتاستىعىمىزدى ودان ءارى نىعايتۋ ءۇشىن جاڭا مۇمكىندىكتەر تاۋىپ, بىرلەسە جۇمىس ىستەۋىمىز كەرەك. ءسىزدى البانياعا ساپارمەن كەلۋگە شاقىرامىن, – دەدى بايرام بەگاي.