2023-2024 جاڭا وقۋ جىلىندا قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنا وقۋعا 158 ادام قابىلداندى. ولاردىڭ باسىم بولىگى – ەلىمىزدىڭ تۇكپىر-تۇكپىرىنەن جينالعان مەملەكەتتىك قىزمەتشىلەر, دەپ جازادى Egemen.kz اكادەميانىڭ ءباسپاسوز قىزمەتىنە سىلتەمە جاساپ.
بۇگىن اكادەميادا ءبىلىم كۇنىنە وراي سالتاناتتى ءىس-شارا ءوتتى. رەكتور ەرلان ءابىل پروفەسسورلىق-وقىتۋشىلىق قۇرامدى, وقۋعا كەلگەن ماگيسترانتتار مەن دوكتورانتتاردى مەرەكەمەن قۇتتىقتادى. سونداي-اق «وڭىرلىك دامۋ» جانە «مەملەكەتتىك باسقارۋ» باعدارلاماسىنىڭ مودۋلدىك باعىتى بويىنشا ءبىلىم العان 24 تۇلەگىنە ديپلوم تابىستاپ, قىزمەتتەرىنە ساتتىلىك تىلەدى.
«جاڭا 2023-2024 وقۋ جىلىندا اكادەميانىڭ العا قويعان ۇلكەن تالاپتارى مەن مىندەتتەرى بار. ەڭ الدىمەن, پروفەسسورلىق-وقىتۋشىلىق قۇرامنىڭ ساپاسى ماڭىزدى. اكادەميا ۇجىمى باسەكەگە قابىلەتتى, كاسىبي ماماندارمەن تولىقتىرىلدى. جالپى, جاڭا وقۋ جىلىندا ءبىلىم الۋعا 158 ۇمىتكەر قابىلداندى. ولاردىڭ 2/3 بولىگى وڭىرلەردەن ءبىلىمى مەن قۇزىرەتتەرىن شىڭداۋعا كەلدى. وقۋعا تۇسكەن ازاماتتاردىڭ قاتارىندا ءۇش پرەزيدەنتتىك جاستار كادر رەزەرۆىنىڭ مۇشەسى بار. بۇل – اكادەمياعا دەگەن ۇلكەن سەنىمنىڭ كورسەتكىشى», دەدى رەكتور.
وقۋعا تۇسكەندەردىڭ ىشىندە 132 ادام مەملەكەتتىك ءبىلىم بەرۋ تاپسىرىسى نەگىزىندە, 26 ادام اقىلى نەگىزدە ءبىلىم الادى. وقۋعا قابىلدانعانداردىڭ ىشىندە 81 ادام (61,0%) باسشىلىق قىزمەتتە, 51 ادام (39,0%) ورىنداۋشى مامان بولىپ جۇمىس ىستەيدى. ماگيسترانتتاردىڭ ورتاشا جاسى – 35,5, دوكتورانتتار – 40 جاس.
اكادەميا رەكتورى ەرلان ءابىل وقۋعا كەلگەن ماگيسترانتتار مەن دوكتورانتتارعا زور ءۇمىت ارتاتىنىن اتاپ ءوتتى.
«الداعى وقۋ جىلىندا سىزدەردەن كۇتەتىنىمىز – مەملەكەتتىك قىزمەتتەگى ماڭىزدى سالالار بويىنشا زەرتتەۋ جۇرگىزىپ, جەرگىلىكتى جانە مەملەكەتتىك ورگانداردا, پىكىرتالاس الاڭدارىندا ەكسپەرتتىك ساراپتاما جۇرگىزۋ قابىلەتىن ارتتىرۋ, مەملەكەتتىك باسقارۋداعى وزەكتى ماسەلەلەرگە سىني-تالداۋ جاساۋ, ساپالى اناليتيكالىق جازبالارمەن قامتاماسىز ەتۋ. اكادەمياعا وقۋعا, ۇيرەنۋگە دەگەن ىنتا-جىگەرمەن, جاڭاشىل كوزقاراسپەن كەلدىڭىزدەر دەگەن سەنىمدەمىن. اكادەميا ءوز كەزەگىندە سىزدەرگە ءتيىمدى شارتتارىن ۇسىنۋعا دايىن. جاڭا وقۋ جىلى بارلىعىمىز ءۇشىن تابىستى, جەتىستىككە تولى جىل بولسىن», دەدى ول.
2023-2024 وقۋ جىلىنىڭ رەسمي اشىلۋ سالتاناتى مەملەكەت باسشىسى قاسىم-جومارت توقاەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن تىڭداۋمەن جالعاسىن تاپتى.