مەملەكەت باسشىسى قاسىم-جومارت توقاەۆتىڭ ايتۋىنشا, ادال ازامات جانە تۇعىرلى تۇلعا بولۋدىڭ نەگىزى بالا كەزدەن قالىپتاسادى. سوندىقتان جاس ۇرپاقتىڭ قازاقستاندا قاۋىپسىز ءارى الاڭسىز ءومىر ءسۇرۋى بارىنشا قامتاماسىز ەتىلۋى ءتيىس, دەپ حابارلايدى Egemen.kz.
«ازاماتتاردىڭ مۇددەسى مەن سۇرانىسى – قازاقستاننىڭ ەكونوميكالىق دامۋ ستراتەگياسىنىڭ وزەگى. ياعني, ادامنىڭ قاجەتتىلىگى ءاردايىم باستى نازاردا بولادى. سول ءۇشىن ءبىز شيكىزاتقا تاۋەلدى بولۋدان بىرتىندەپ ارىلۋىمىز قاجەت. بۇل جۇمىس تاباندى تۇردە جۇرگىزىلۋگە ءتيىس. ەلىمىزدە جىل سايىن 400 مىڭنان استام بالا دۇنيەگە كەلەدى. جىل سوڭىنا دەيىن حالقىمىزدىڭ سانى 20 ميلليونعا جەتەدى. ءومىر ءسۇرۋ ۇزاقتىعى دا ارتىپ كەلە جاتىر. بىلتىر بۇل كورسەتكىش 74 جاستان استى», دەپ اتاپ ءوتتى قاسىم-جومارت كەمەل ۇلى قازاقستان حالقىنا جولداۋى بارىسىندا.
قازاقستان – الەمدەگى ەڭ جاس مەملەكەتتىڭ ءبىرى ەكەنى بەلگىلى. ەل ازاماتتارىنىڭ ورتاشا جاسى – 32 جاس. تۇرعىنداردىڭ ۇشتەن ءبىرى – جاستار.
«ۇكىمەتتىڭ مىندەتى – قازىرگى دەموگرافيالىق احۋالدى ەلىمىزدىڭ باسەكەگە قابىلەتىن ارتتىرۋعا پايدالانۋ. ادال ازامات جانە تۇعىرلى تۇلعا بولۋدىڭ نەگىزى بالا كەزدەن قالىپتاسادى. سوندىقتان ءبىز جاس ۇرپاقتىڭ قاۋىپسىز ءارى الاڭسىز ءومىر ءسۇرۋىن قامتاماسىز ەتۋگە ءتيىسپىز», دەدى قازاقستان پرەزيدەنتى.
جيىن بارىسىندا پرەزيدەنت كامەلەتكە تولماعاندارعا جاسالعان زورلىق-زومبىلىقتىڭ كەز كەلگەن تۇرىنە قاتىستى جازانى كۇشەيتۋدى تالاپ ەتتى.
«مەن مەملەكەت باسشىسى رەتىندە كامەلەتكە تولماعاندارعا جاسالعان زورلىق-زومبىلىقتىڭ كەز كەلگەن تۇرىنە قاتىستى جازانى كۇشەيتۋدى تالاپ ەتەمىن. جول, عيمارات, كيىم-كەشەك, ازىق-ت ۇلىك, ياعني بارلىعى بالالار ءۇشىن قاۋىپسىز بولۋى كەرەك. سونداي-اق وسكەلەڭ ۇرپاقتىڭ پسيحيكالىق ساۋلىعى – وتە ماڭىزدى ماسەلە. ءبىلىم بەرۋ مەكەمەلەرىندەگى پسيحولوگيالىق قولداۋ قىزمەتىن ينستيتۋتسيونالدى تۇردە كۇشەيتۋ قاجەت. بىرىڭعاي سەنىم تەلەفونىن ۇيىمداستىرعان ءجون. زورلىق-زومبىلىققا جانە قىسىمعا, ياعني بۋللينگكە تاپ بولعاندارعا كومەك كورسەتۋگە ارنالعان باعدارلاما ازىرلەۋ كەرەك. ساپالى ورتا ءبىلىم الۋ – ءاربىر بالانىڭ مىزعىماس قۇقىعى. مۇنداعى ەڭ ءتۇيىندى ءسوز – «ساپا». سوندىقتان ءبىلىم ساپاسىن جاقسارتۋ جانە مۇعالىمدەردىڭ بىلىكتىلىگىن ارتتىرۋ اۋاداي قاجەت», دەپ قاداپ ايتتى پرەزيدەنت.